1. Fa wi kan kari Yehovah?

NA INI Yehovah en famiri fu anbegiman yu abi Yesus di de „a fosiwan fu ala sani di Gado meki” èn milyunmilyun engel (Kol. 1:15; Ps. 103:20). Di Yesus ben de na grontapu, dan a yepi sma fu frustan taki den kan kari Yehovah den Papa. Di Yesus ben e taki nanga den disipel fu en, dan a kari Yehovah „mi Tata nanga un Tata” (Yoh. 20:17). Te wi e gi wisrefi abra na Yehovah èn te wi e dopu, dan wi e kon na ini wan famiri fu sma di lobi makandra.​—Mark. 10:29, 30.

2. San wi o luku na ini na artikel disi?

² Son sma feni en muilek fu si Yehovah leki wan lobi-ati Papa. Trawan no sabi fa den musu sori lobi gi den brada nanga sisa. Na ini na artikel disi wi o luku fa Yesus e yepi wi fu si Yehovah leki wan Papa di lobi wi èn di kan tron wi mati. Wi o luku tu fa a fasi fa Yehovah e sori lobi gi wi kan yepi wi fu libi bun nanga wi brada nanga sisa.

3. Fa a begi fu Yesus e yepi wi fu kon moro krosibei na Yehovah?

³ Yehovah na wan lobi-ati Papa. Yesus wani taki wi si Yehovah soleki fa en e si en. Yehovah na wan lobi-ati Papa èn wi kan taki nanga en ala ten. A no de wan sma di no abi switifasi èn di e taigi wi nomo san wi musu du. Wi kan si dati te wi e luku fa Yesus ben leri den disipel fu en fu begi. A bigin a begi fu en nanga den wortu disi: „Wi Tata” (Mat. 6:9). Yesus ben kan taigi wi fu kari Yehovah „na Almaktiwan”,  „A Mekiman”, noso „Têgo Kownu”. Ala den nen dati fiti Yehovah èn den skrifi na ini Bijbel (Gen. 49:25; Yes. 40:28; 1 Tim. 1:17). Ma Yesus ben kari Yehovah „Tata”, fu di dati e sori taki a ben lobi en trutru.

4. Fa wi du sabi taki Yehovah wani taki wi tron mati fu en?

⁴ Yu feni en muilek fu si Yehovah leki wan lobi-ati Papa? A muilek gi sonwan fu wi. Efu yu papa no ben abi switifasi, dan a kan muilek gi yu fu bribi taki wan papa de di lobi yu. A de wan trowstu fu sabi taki Yehovah e frustan heri bun fa yu e firi. A wani taki yu tron en mati. Dati meki a Wortu fu en e taigi wi: „Kon krosibei na Gado èn a o kon krosibei na unu” (Yak. 4:8). Yehovah lobi yu èn a e taki dati a o de a moro bun Papa di yu kan abi.

5. Fa Yesus e yepi wi fu kon moro krosibei na Yehovah, soleki fa Lukas 10:22 e sori?

⁵ Yesus kan yepi wi fu kon moro krosibei na Yehovah. Yesus sabi Yehovah heri bun èn a e sori den fasi fu en soifri tu. Dati meki a taki: „A sma di si mi, si a Tata tu” (Yoh. 14:9). Neleki wan bigi brada, Yesus e leri wi fa fu lespeki wi Papa, fa fu gi yesi na en, fa fu wai pasi gi sani di a no feni bun, èn san wi kan du so taki a feni wi bun. Ma te wi e luku a libi fu Yesus na grontapu, dan dati e sori wi krin taki Yehovah abi switifasi èn taki a lobi wi. (Leisi Lukas 10:22.) Meki wi luku wan tu eksempre.

6. Gi wan tu eksempre fu sori fa Yehovah ben arki Yesus.

⁶ Yehovah e arki den pikin fu en. Luku fa Yehovah ben arki en fosi Manpikin. Di Yesus ben de na grontapu, dan a no de fu taki dati Yehovah arki furu begi fu en (Luk. 5:16). A arki di Yesus ben begi fu prenspari bosroiti di a ben musu teki, soleki di a ben musu luku suma a ben o teki leki den twarfu apostel fu en (Luk. 6:12, 13). Yehovah ben arki a begi fu Yesus tu di sani ben kon hebi gi en. Syatu fosi  Yudas tori Yesus, dan Yesus begi en Papa fayafaya fu di hebi tesi ben o miti en. Boiti taki Yehovah arki a begi fu Yesus, a seni wan engel tu fu tranga en Manpikin di a ben lobi so te.​—Luk. 22:41-44.

7. Fa wi e firi te wi sabi taki Yehovah e arki den begi fu wi?

⁷ Na ini a ten disi, Yehovah e arki den begi fu en futuboi tu. A e piki den na a yoisti ten èn na a moro bun fasi (Ps. 116:1, 2). Wan sisa na ini India ben si fa Yehovah piki den begi fu en. A ben gwenti broko en ede nanga ala sortu pikinpikin sani èn a begi Yehovah fayafaya fu yepi en. A skrifi: „A JW Broadcasting programa fu mei 2019 di e sori san wi kan du te wi abi broko-ede, ben de precies san mi ben abi fanowdu. A ben de a piki tapu den begi fu mi.”

8. Na sortu fasi Yehovah sori lobi gi Yesus?

⁸ Yehovah e sori lobi gi wi na a srefi fasi fa a sori lobi gi Yesus na a ten di a ben de na grontapu (Yoh. 5:20). A yepi Yesus fu tan abi wan tranga bribi, a gi en deki-ati di a ben abi broko-ede, èn a sorgu taki Yesus ben abi ala sani di a ben abi fanowdu fu man tan na libi. Yehovah taigi en Manpikin tu taki a lobi en èn taki a ben breiti nanga en (Mat. 3:16, 17). Fu di Yesus ben sabi taki en lobi hemel Tata ben o de nanga en ala ten, meki noiti a ben e firi leki a ben de en wawan.​—Yoh. 8:16.

9. Sortu buweisi wi abi taki Yehovah lobi wi?

⁹ Neleki Yesus, wi alamala si fa Yehovah sori lobi gi wi na difrenti fasi. Denki a tori: Yehovah meki wi tron en mati èn a gi wi furu lobi brada nanga sisa di e meki wi firi prisiri èn di e gi wi deki-ati te wi e firi brokosaka (Yoh. 6:44). Yehovah e gi wi ala sani di wi abi fanowdu fu kan abi wan tranga bribi èn a e yepi wi tu fu feni den sani di wi abi fanowdu fu tan na libi (Mat. 6:31, 32). Te wi e prakseri a lobi di Yehovah abi gi wi, dan a lobi di wi abi gi en e kon moro tranga.

10. San wi kan leri fu a fasi fa Yehovah e sori lobi gi wi brada nanga sisa?

¹⁰ Yehovah lobi den brada nanga sisa fu wi. Ma a no ala ten a makelek fu lobi wi brada nanga sisa èn fu sori taki wi lobi den. Son leisi a muilek, fu di wi komoto fu difrenti kulturu èn wi kweki na difrenti fasi. Èn wi alamala e meki fowtu di kan meki trawan ati bron noso sari. Ma toku wi kan du tranga muiti fu kon abi moro lobi gi wi brada nanga sisa. Fa wi kan du dati? Wi musu sori lobi gi wi brada nanga sisa neleki fa wi Papa e du dati (Ef. 5:1, 2; 1 Yoh. 4:19). Meki wi go luku san wi kan leri fu na eksempre fu Yehovah.

11. Fa Yesus sori taki Yehovah abi „trutru sari-ati”?

¹¹ Yehovah abi „trutru sari-ati” (Luk. 1:78). Wan sma di abi sari-ati, no lobi te a e si taki wan trawan e pina. A e suku fasi fu yepi a sma dati èn fu trowstu en. A fasi fa Yesus ben e libi nanga sma e sori fa Yehovah e firi gi den (Yoh. 5:19). Wan leisi di Yesus si wan grupu sma, dan „a ben e sari den, bika sma ben e pina den èn den ben e waka bruyabruya leki skapu di no abi skapuman” (Mat. 9:36). Yesus no ben e firi lobi nomo gi den, ma a du wan sani fu yepi den. A dresi den sikiwan èn a yepi den sma di ben musu ’wroko hebi èn tyari hebi lai’.​—Mat. 11:28-30; 14:14.

12. Fa wi kan sori taki wi e broko wi ede nanga wi brada nanga sisa?

¹² Efu wi wani sori taki wi e broko wi ede nanga wi brada nanga sisa, dan wi  musu luku fosi sortu problema den abi. Fu eksempre, kande wan sisa e siki seryusu. Noiti a e taki fu a problema dati. Ma kande a ben o breiti efu wan sma ben kan yepi en. Kande a no makriki gi en fu sorgu gi en osofamiri. A ben o breiti efu wan sma ben o yepi en fu bori noso fu krin en oso? Kande wan brada lasi a wroko fu en. Wi kan gi en pikinso moni fu yepi en teleki a feni wan tra wroko. A no abi fu sabi suma gi en a moni.

13-14. Fa wi kan de leki Yehovah di lobi fu gi sma sani?

¹³ Yehovah lobi gi sma sani (Mat. 5:45). Wi no musu wakti teleki wi brada nanga sisa e aksi wi fu yepi den, fosi wi du wan sani gi den. Neleki Yehovah, wi kan du sani gi den, fosi den e aksi wi. Yehovah e meki a son opo gi wi ibri dei, sondro taki wi abi fu aksi en. Èn ala sma e firi a waran fu a son, a no soso den wan di e sori en taki den de nanga tangi. Fu di Yehovah lobi wi, meki a e gi wi den sani di wi abi fanowdu. A no de fu taki dati wi lobi Yehovah fu di a abi switifasi èn fu di a lobi gi sma sani.

¹⁴ Neleki den Papa na hemel, furu fu wi brada nanga sisa no e draidrai fu du bun gi trawan. Fu eksempre, na ini 2013, a bigi draiwinti Haiyan tyari bigi pori kon na ini den Filippijnen. Furu fu wi brada nanga sisa lasi den oso nanga den sani di den ben abi. Ma esi-esi den brada nanga sisa fu den na heri grontapu du wan sani fu yepi den. Furu fu den gi moni èn na ini wan yari ten, den yepi fu bow sowan 750 oso. Na ini a COVID-19 situwâsi di de now, furu Kotoigi wroko tranga fu yepi den brada nanga sisa. Te wi no e draidrai fu yepi wi Kresten brada nanga sisa, dan wi e sori taki wi lobi den.

15-16. San na wan prenspari fasi fa wi kan teki na eksempre fu wi hemel Tata, soleki fa Kolosesma 3:13 e sori?

¹⁵ Fu di Yehovah abi sari-ati, meki a lobi gi sma pardon. (Leisi Kolosesma 3:13.) Ibri dei Yehovah e gi wi pardon (Ps. 103:10-14). Den bakaman fu Yesus ben e meki  fowtu, ma toku a ben e gi den pardon. A gi en libi srefi so taki wi kan kisi pardon fu sondu (1 Yoh. 2:1, 2). Fu di Yehovah nanga Yesus abi sari-ati èn fu di den de klariklari fu gi wi pardon, meki a lobi di wi abi gi den e kon moro tranga.

¹⁶ A lobi di wi abi gi makandra e kon moro tranga te wi e ’gi makandra pardon nanga wi heri ati’ (Ef. 4:32). A no de fu taki dati a no ala ten a makelek fu gi trawan pardon. Dati meki wi musu du muiti fu du dati. Wan sisa ben taki dati a Waktitoren artikel di nen „Gi makandra pardon nanga un heri ati” yepi en fu du dati. * A skrifi: „Di mi studeri na artikel disi, dan mi bigin denki tra fasi fu a tori dati.” Na artikel sori taki te wi de klariklari fu gi trawan pardon, dan disi no wani taki dati wi e du neleki a sani di a sma du no fowtu noso taki a sani dati no hati wi. Ma te wi e gi wan sma pardon, dan disi wani taki dati wi no e hori a sma na ati èn dati e meki wi firi bun. Te wi de klariklari fu gi wi brada nanga sisa pardon, dan wi e sori taki wi lobi den èn wi e teki na eksempre fu wi Tata Yehovah.

17. Fa wi kan gi grani na wi hemel Tata, soleki fa Mateyus 5:16 e sori?

¹⁷ A de wan bigi grani fu abi brada nanga sisa na heri grontapu di lobi makandra. Wi wani taki moro nanga moro sma anbegi wi Gado makandra nanga wi. Dati meki wi musu luku bun taki noiti wi e tyari wisrefi na wan fasi di e meki taki sma e denki takru fu wi hemel Tata Yehovah èn fu en pipel. Wi e pruberi fu tyari wisrefi na wan fasi di e meki taki sma o wani arki a bun nyunsu.​—Leisi Mateyus 5:16.

18. San kan yepi wi fu preiki sondro frede?

¹⁸ A kan pasa son leisi taki sma e krutu wi, noso kande den e frufolgu wi srefi fu di wi e gi yesi na wi hemel Tata. Ma san wi musu du te wi e frede fu taki nanga trawan fu a bun nyunsu? Wi musu abi a frutrow taki Yehovah nanga en Manpikin o  yepi wi. Yesus ben pramisi den disipel fu en taki den no ben abi fu broko den ede nanga fa den ben o taki noso san den ben o taki. Fu san ede? A ben taigi den: „Na a ten dati unu o sabi san un musu taki, bika a no unu srefi o taki, ma a Tata o gi unu krakti so taki unu o sabi san fu taki.”​—Mat. 10:19, 20.

19. Gi wan eksempre fu wan sma di ben preiki sondro frede.

¹⁹ Luku na eksempre fu Robert. Wan pisi ten pasa, di a bigin studeri Bijbel, a ben musu go na fesi wan krutubangi na ini Zuid-Afrika fu fruteri a krutuman fu san ede a no ben wani go na ini a legre. Aladi a no ben sabi so furu ete, toku a no ben frede fu fruteri a krutubangi taki a no ben wani go na ini legre fu di a lobi wi Kresten brada nanga sisa. A ben breiti fu de na ini so wan bigi famiri. „Suma na yu brada nanga sisa?”, a krutuman aksi en wantronso. Robert no ben fruwakti na aksi dati, ma wantewante a prakseri a tekst fu a dei dati. A tekst dati ben de Mateyus 12:50 pe skrifi: „Den sma di e du a wani fu mi Tata di de na hemel, na mi brada, mi sisa, nanga mi mama.” Aladi Robert no ben studeri Bijbel langa ete, toku a yeye fu Yehovah yepi en fu piki na aksi dati èn wan tu tra aksi di a no ben fruwakti. Yehovah ben musu fu breiti nanga Robert. Yehovah breiti nanga wi tu te wi abi a frutrow taki a o yepi wi fu preiki sondro frede na ini muilek situwâsi.

20. San wi musu du ala ten? (Yoh. 17:11, 15)

²⁰ Meki wi tan warderi a grani di wi abi fu de na ini so wan lobi-ati famiri. Wi abi a moro bun Papa di de èn wi abi furu brada nanga sisa di lobi wi. Ala ten wi musu de nanga tangi gi den sani disi. Satan nanga den ogri-ati bakaman fu en wani meki wi denki taki wi hemel Tata no lobi wi èn den wani tyari prati kon na wi mindri. Ma Yesus ben begi gi wi èn a aksi wi Papa fu yepi wi fu tan na ini wánfasi. (Leisi Yohanes 17:11, 15.) Yehovah e piki a begi dati. Neleki Yesus, wi noiti no musu tweifri taki wi hemel Papa lobi wi èn taki a e horibaka gi wi. Meki wi tan sori moro lobi gi wi Kresten brada nanga sisa.