A ten doro taki Yosef nanga en osofamiri, makandra nanga den mati nanga famiri fu den o go na Yerusalem soleki fa den gwenti du ibri yari. Den e go drape fu hori a Paskafesa soleki fa a Wet e taki (Deuteronomium 16:16). Den musu waka sowan 120 kilometer fu Nasaret go na Yerusalem. Furu sani de fu du èn ala sma breiti. Yesus abi 12 yari now. Gi en, disi na wan spesrutu okasi fu di a o go na a Paskafesa èn a o de krosibei fu a tempel baka.

Yosef nanga en osofamiri no e go na Yerusalem fu hori wan fesa fu wán dei nomo. A fosi fesa di den e hori, na a Paskafesa. A dei baka a Paskafesa, na a fosi dei fu a fesa fu brede sondro srudeki. Den e hori a fesa disi seibi dei langa (Markus 14:12). Den e kari a pisi ten disi Paskaten. Sobun, den o waka fu Nasaret go na Yerusalem, den o tan wan pisi ten na ini Yerusalem, dan den o waka go na oso baka. Ala nanga ala disi o teki sowan tu wiki. Ma disi yari a o teki pikinso moro langa fu di wan sani e pasa di abi fu du nanga Yesus. A sani disi pasa te den e gowe libi Yerusalem fu drai go na oso baka.

Te den de na pasi e drai go baka na noordsei, dan Yosef nanga Maria e denki taki Yesus e waka nanga den tra famiri nanga mati fu den. Ma te den e tapu fu sreka sribipresi, den no man feni Yesus. Dati meki den e go suku en na den tra sma, ma den no man feni en drape tu. Nowan presi a boi de fu feni! Fu dati ede Yosef nanga Maria e drai go baka na Yerusalem fu suku en.

Wan heri dei den e suku Yesus sondro fu feni en. A di fu tu dei den no man feni en tu. Te fu kaba, na a di fu dri dei den e feni a boi fu den na ini a tempel di abi furu kamra. Den e si Yesus e sidon na mindri wan tu Dyu leriman. A e aksi den sani, a e arki den, èn den e fruwondru fu a fasi fa a e denki fu sani.

„Pikin, fu san ede yu du disi nanga wi?”, na so Maria e aksi. „Mi nanga yu papa ben e suku yu èn wi ben bruya srefisrefi.”​—Lukas 2:48.

Yesus e fruwondru taki den no ben sabi pe a ben de. A e taigi den: „Fu san ede unu ben e suku mi? Unu no sabi taki mi musu de na ini na oso fu mi Tata?”​—Lukas 2:49.

Now di den feni Yesus, den e drai go baka na Nasaret èn Yesus e tan gi yesi na Yosef nanga Maria. Na so a e gro kon bigi èn a e kisi moro koni. Wan moi sani fu Yesus, na taki ala sma nanga Gado ben lobi en aladi a ben de yongu ete. Srefi di a ben de wan pikin-nengre a ben de wan moi eksempre gi wi, fu di a ben lobi sani di abi fu du nanga Gado èn a ben abi lespeki gi en papa nanga mama.