Yesus de fu go na Yerusalem, ma a kan taki en nanga den disipel fu en de ete na a oso fu Sakeyus. Den disipel e denki taki heri esi „a Kownukondre fu Gado” o seti èn taki Yesus o tron Kownu (Lukas 19:11). Den no e frustan a tori disi bun èn den no e frustan tu taki Yesus musu dede. Dati meki a e fruteri den wan agersitori fu yepi den fu si taki a o teki wan heri pisi ten fosi a Kownukondre seti.

Yesus e taki: „Wan heihei man ben o go na wan farawe kondre fu tron kownu èn baka dati a ben o drai kon na oso baka” (Lukas 19:12). A heihei man disi ben o gowe fu wan langa pisi ten. A de krin taki Yesus na a „heihei man” di e go na „wan farawe kondre”. A kondre dati na hemel, pe en Tata o meki a tron Kownu.

Fosi a „heihei man” gowe, a e kari tin srafu kon èn a e gi ibriwan fu den wan solfru moni. A e taigi den: „Du bisnis nanga a moni teleki mi kon baka” (Lukas 19:13). A solfru moni disi abi furu waarde. Wan gronman musu wroko moro leki dri mun fu meki a moni disi.

Kande den disipel e frustan taki den na den tin srafu na ini na agersitori, fu di Yesus ben teki den gersi kaba nanga wrokoman di e du kotiwroko (Mateyus 9:35-38). A de krin taki a no aksi den fu go koti aleisi. Na presi fu dati, den musu meki tra sma tron disipel, so taki den srefi kan go na ini a Kownukondre fu Gado. Den disipel e gebroiki ala den ten, den krakti nanga den gudu fu den fu meki moro sma kisi na okasi fu tiri makandra nanga Yesus na ini a Kownukondre.

Sortu tra sani Yesus e tyari kon na krin na ini na agersitori? A e taki dati den sma fu a kondre „no ben lobi [a heihei man] kwetikweti èn den seni boskopuman go na en fu taki: ’Wi no wani taki yu tron wi kownu’” (Lukas 19:14). Den disipel sabi taki den Dyu no e poti bribi na ini Yesus. Sonwan fu den wani kiri en srefi. Baka te Yesus dede èn a opo go na hemel, a Dyu pipel o sori fa den e denki fu en. Den o frufolgu den disipel fu en. Den gensman disi e sori krin taki den no wani Yesus leki Kownu.​—Yohanes 19:15, 16; Tori 4:13-18; 5:40.

Ma fa den tin srafu e gebroiki den solfru moni na ini a pisi ten fosi a „heihei man” tron „kownu” èn a drai kon baka? Yesus e fruteri: „Baka di a tron kownu, a drai kon na oso baka èn a seni kari den srafu di a ben gi a solfru moni. A ben wani sabi omeni moni den ben meki nanga a bisnis di den du. Ne a fosiwan kon èn a taki: ’Masra, nanga a solfru moni fu yu, mi meki tin solfru moni.’ Dati meki a taigi a srafu: ’Heri bun, yu na wan bun srafu! Fu di mi ben man frutrow yu nanga so wan pikin sani, meki yu e kisi makti fu tiri tin foto.’ Now a di fu tu srafu kon èn a taki: ’Masra, nanga a solfru moni fu yu, mi meki feifi solfru moni.’ A taigi a srafu disi tu: ’Yu srefi kan tiri feifi foto.’”​—Lukas 19:15-19.

Neleki fa den srafu wroko tranga fu meki den gudu fu a masra kon moro furu, na so den disipel musu du ala san den man fu meki moro disipel. Efu den e du dati, dan Yesus o breiti nanga den. Boiti dati, den kan de seiker taki den o kisi furu blesi gi a muiti di den e meki. A no de fu taki dati a no ala den disipel fu Yesus man du a srefi. Boiti dati, den alamala no abi den srefi okasi noso koni. Toku Yesus, di o tron „kownu”, o si a tranga muiti di den o du fu meki disipel èn a o blesi den tu.​—Mateyus 28:19, 20.

Ma wan fu den srafu du wan heri tra sani. Luku san Yesus e taki na a kaba fu na agersitori: „Ma wan tra srafu kon èn a taki: ’Masra, luku a solfru moni fu yu dya. Mi ben kibri en na ini wan duku. Yu sabi, mi e frede yu, bika yu na wan muilek man. Yu e teki moni di no de fu yu èn yu e koti  nyanyan di yu no sai.’ A taigi a srafu: ’Nanga yu eigi wortu mi o krutu yu, yu takru srafu. Yu ben sabi taki mi na wan muilek man, taki mi e teki moni di no de fu mi, èn taki mi e koti nyanyan di mi no sai, a no so? We dan fu san ede yu no poti a solfru moni fu mi na bangi? Te mi ben o kon baka, mi ben o man teki a moni nanga rente.’ Baka dati a taigi den wan di ben e tanapu drape: ’Puru a solfru moni na en anu, dan un gi dati na a srafu di abi tin solfru moni.’”​—Lukas 19:20-24.

A srafu disi no du noti fu suku moro gudu gi a kownukondre fu a masra. Dati meki a srafu lasi furu. Den apostel e fruwakti taki Yesus o tiri leki Kownu na ini Gado Kownukondre. Sobun, den sani di a fruteri den fu a lasti srafu e meki den frustan taki son disipel no o wroko fayafaya. Dati meki den no o go na ini a Kownukondre.

Den sani di Yesus taki musu fu gi den disipel deki-ati fu wroko moro tranga. Yesus e taki: „Mi e taigi unu: A sma di abi, sa kisi moro. Ma a sma di no abi, den sa puru srefi den sani di a abi.” Yesus e taki dati a o kiri den feanti fu en di no wani taki a „tron den kownu”. Baka dati Yesus e hari go doro na Yerusalem.​—Lukas 19:26-28.