Yesus du furu na a dei disi. Baka di a komoto na a kontren fu Dekapolis, a dresi wan uma di ben lasi brudu furu yari langa èn a gi na umapikin fu Yairus wan opobaka. Ma a o du moro na a dei disi. Te Yesus e gowe fu na oso fu Yairus, tu breni man e waka na en baka. Den e bari: „Abi sari-ati nanga wi, Manpikin fu David.”​—Mateyus 9:27.

Den man e kari Yesus „Manpikin fu David”. Disi e sori taki den e bribi taki Yesus na a bakapikin fu David di o tron Kownu èn taki en na a Mesias. Yesus e du leki a no e yere den, kande fu di a wani si efu den man disi o horidoro. Na dati den e du tu. Te Yesus e go na ini wan oso, den tu man e kon na en. Yesus e aksi den: „Unu e bribi taki mi man meki unu si?” Nanga overtoigi den e taki: „Iya, Masra.” Dati meki Yesus e fasi den ai èn a e taki: „Meki a pasa soleki fa unu e bribi.”​—Mateyus 9:28, 29.

Wantronso den man kan si! Yesus e taigi den man disi tu fu no fruteri tra sma san a du gi den. Ma fu di den breiti so te, meki den e panya a tori na ini a heri kontren.

Te den tu man disi e gowe, sma e tyari wan man kon di no man taki fu di wan ogri yeye de na en tapu. Yesus e puru na ogri yeye na a man tapu èn wantewante a man e bigin taki. Den sma no man bribi san den e si. Dati meki den e taki: „Noiti ete wi si so wan sani na ini Israel.” Den Fariseiman de drape tu. Den srefi si taki Yesus e du wondru. Disi leisi den e taki baka dati na „a tiriman fu den ogri yeye e meki taki a kan yagi ogri yeye puru na sma tapu”.​—Mateyus 9:33, 34.

Syatu baka dati Yesus e drai go baka na Nasaret, a foto pe a kweki. Disi leisi a e go nanga den disipel fu en. Wan yari na fesi a ben gi leri na ini a snoga drape. Biginbigin den sma ben fruwondru fu den sani di a ben e taki. Ma bakaten den no ben lobi son sani di a ben taki èn den pruberi fu kiri en. Now Yesus e pruberi baka fu yepi den sma fu en foto.

Na a Sabat-dei a e go baka na ini a snoga fu gi leri. Furu sma e fruwondru èn den e aksi: „Fu pe a man disi komopo nanga a koni disi èn nanga den bigi wondru disi?” Den e taki: „A no a manpikin fu a temreman? A no en mama den e kari Maria? A no Yakobus, Yosef, Simon, nanga Yudas na den brada fu en? A no ala den sisa fu en de nanga wi? Dan fu pe a man disi komopo nanga ala den sani disi?”​—Mateyus 13:54-56.

Den sma feni taki Yesus na wan sma leki den, a no de wan aparti man. Den e denki: ’Na dyaso a kweki, dan fa en kan de a Mesias?’ Dati meki den no wani bribi en, aladi den e si fa a koni èn fa a e du wondru. Fu di den famiriman fu Yesus sabi en langa ten kaba, meki den srefi no wani bribi en. Dati meki Yesus e taki: „Na ala presi den e lespeki wan profeiti, boiti na ini en eigi kontren èn na ini en eigi oso.”​—Mateyus 13:57.

Iya, Yesus e fruwondru taki den sma no e bribi en. Dati meki a no e du bigi wondru drape. A wan-enkri sani di a e du, na „taki a ben poti en anu na tapu wan tu siki sma èn taki a meki den kon betre”.​—Markus 6:5, 6.