Te Yesus de na ini Yerusalem gi a Paskafesa na ini a yari 30, dan a e du wondru. Dati meki furu sma e bribi na ini en. A e hari a prakseri tu fu Nikodeimus di de wan Fariseiman èn wan memre fu a grankrutu fu den Dyu di den e kari Sanhedrin. Fu di Nikodeimus wani sabi moro, a e go na Yesus na neti. Kande a e du disi fu di a e frede taki den tra Dyu fesiman o denki takru fu en efu den e si taki a e go na Yesus.

Nikodeimus e taki: „Rabbi, wi sabi taki yu na wan leriman di komopo fu Gado, bika nowan sma man du den wondru di yu e du, efu Gado no de nanga en.” Yesus e fruteri en taki efu wan sma wani go na ini a Kownukondre fu Gado, a musu „gebore baka”.​—Yohanes 3:2, 3.

Ma fa wan sma kan gebore baka? „A no man go baka na ini en mama bere fu gebore ete wan tron, a no so?”, na so Nikodeimus e taki.​—Yohanes 3:4.

Dati tru. Ma fu „gebore baka” no wani taki dati wan sma o gebore ete wan tron leki wan beibi. Yesus e tyari a tori disi kon na krin te a e taki: „Efu wan sma no gebore fu watra nanga yeye, dan a no sa man go na ini a Kownukondre fu Gado” (Yohanes 3:5). Sobun, di Yesus dopu èn santa yeye kon na en tapu, a ben „gebore fu watra nanga yeye”. Di dati pasa, Gado taki komoto fu hemel: „Disi na mi Manpikin, a lobiwan di mi feni bun” (Mateyus 3:16, 17). Na so Gado sori taki a ben o meki Yesus tron wan yeye manpikin fu en di ben o go na ini a Kownukondre na hemel. Bakaten na a Pinksterfesa fu a yari 33 santa yeye ben o kon tu na tapu tra sma di dopu èn den srefi ben o gebore baka fu tron yeye manpikin fu Gado.​—Tori 2:1-4.

A muilek gi Nikodeimus fu frustan san Yesus e leri en fu a Kownukondre. Dati meki Yesus e fruteri en moro fu a spesrutu posisi fu en leki a libisma Manpikin fu Gado. Yesus e taki: „Neleki fa Moses ben opo a sneki go na loktu di a ben de na a sabana, na so den sa musu opo a Manpikin fu libisma go na loktu tu, so taki ala sma di e bribi na ini en, kan kisi têgo libi.”​—Yohanes 3:14, 15.

Na ini owruten, di takru sneki ben beti den Israelsma, den ben musu luku wan kopro sneki efu den ben wani tan na libi (Numeri 21:9). Na so ala libisma musu poti bribi na ini Gado Manpikin efu den wani kisi frulusu fu sondu nanga dede èn efu den wani kisi têgo libi. Yesus wani sori Nikodeimus omeni lobi Yehovah abi gi libisma. Dati meki a e taigi en now: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Sobun, dyaso na ini Yerusalem, sowan siksi mun baka di Yesus bigin nanga a wroko fu en, a e sori krin taki sma kan kisi frulusu nanga yepi fu en.

Yesus e taigi Nikodeimus: „Gado no seni en Manpikin kon na grontapu fu krutu grontapu.” Disi wani taki dati Gado no seni en fu krutu sma na wan ogri-ati fasi, so taki den alamala ben o kisi pori. Na presi fu dati, Yesus e taki dati Gado seni en „fu meki grontapu kisi frulusu nanga yepi fu en”.​—Yohanes 3:17.

Nikodeimus kon na Yesus na neti fu di a ben e frede. Dati meki a moi taki Yesus e tapu a takimakandra fu den nanga den wortu disi: „We, na fu a sani disi ede den o kisi krutu. A leti a  kon na grontapu, ma libisma ben lobi a dungru moro leki den ben lobi a leti, bika den ben du ogri. Bika a sma di e du ogri sani, no lobi a leti èn a no e kon na ini a leti tu, so taki sma no sa si taki a e du ogri. Ma a sma di e du san reti, e kon na ini a leti, so taki sma kan si krin taki a du sani soleki fa Gado wani.”​—Yohanes 3:19-21.

Now Nikodeimus di de wan Fariseiman èn wan leriman fu den Israelsma, musu go denki fu a posisi di Gado gi Yesus, soleki fa Yesus ben sori en.