Bijbel ben taki na fesi dati baka a dede fu Krestes, falsi leriman ben o opo kon na mindri den fosi Kresten èn den ben o drai den tru tori fu Bijbel (Tori fu den apostel 20:29, 30). Bakaten, na dati ben pasa trutru. Den ben moksi den leri fu Yesus nanga leri fu sma di ben dini tra gado èn na so wan falsi Kresten bribi kon de (2 Timoteyus 4:3, 4). Fa wi kan de seiker na ini a ten disi taki wi e frustan bun san Bijbel e leri trutru?

A ten ben doro gi Yehovah fu meki sma kon sabi den tru tori fu Bijbel. A ben taki dati na ’a ten fu a kaba sma ben o kon sabi bun furu tru tori’ (Danièl 12:4). Na ini 1870, wan pikin grupu fu sma di ben e suku a tru bribi kon si taki furu fu den sani di kerki ben e leri sma no ben e kruderi nanga Bijbel. Fu dati ede den bigin suku fu kon frustan den sani di Bijbel e leri trutru. Yehovah blesi den fu di a gi den a koni fu frustan Bijbel.

Reti-ati man ben studeri Bijbel finifini. Den fayafaya Bijbel Ondrosukuman, soleki fa sma ben sabi Yehovah Kotoigi na a ten dati, ben kon nanga wan fasi fu studeri Bijbel èn te nanga a dei fu tide wi e du dati. Den ben taki nanga makandra fu wán Bijbel tori èn baka dati den ben go na wan trawan. Te den ben doro wan Bijbeltekst di muilek fu frustan, dan den ben e suku tra vers di tyari a tori kon na krin. Te den ben agri nanga makandra èn tra tekst ben e horibaka gi dati, dan den ben skrifi en tapu papira. Fu di den meki Bijbel fruklari ensrefi, meki den kon sabi san Bijbel e leri trutru fu Gado nen nanga a Kownukondre. Den kon sabi tu san A o du gi libisma nanga grontapu, san e pasa nanga wan sma te a dede, èn den kon sabi na opobaka howpu. Den sani di den ondrosuku meki den kon fri fu falsi bribi nanga gwenti.—Yohanes 8:31, 32.

Na ini 1879, den Bijbel Ondrosukuman ben frustan taki a ten ben doro fu meki sma na ala sei kon sabi den tru tori fu Bijbel. Sobun, na ini a yari dati den bigin meki a tijdschrift, The Watchtower Announcing Jehovah’s Kingdom (A Waktitoren—A e taki fu Yehovah Kownukondre), di wi e meki te nanga a dei fu tide. Now wi e fruteri sma den tru tori fu Bijbel na ini 239 kondre èn na ini sowan 750 tongo. Noiti ete sma ben kon sabi so furu tru tori!

• San ben pasa nanga den tru tori fu Bijbel, baka di Krestes dede?

• San yepi wi fu kon sabi den tru tori fu Gado Wortu?