1. San ben tapu pasi gi a famiri fu Adam nanga Eva fu go na ini a dyari fu Eden? Sortu sani Abel ben wani trutru?

ABEL e luku fa na ipi skapu fu en e nyan grasi na a bergiskin. Kande a e luku pasa den skapu go na wan presi farawe pe a ben kan si wan sani e brenki. A ben sabi taki leti drape wan feti-owru di ben e bron nanga faya ben e drai lontu doronomo. A feti-owru disi ben e tapu a pasi di e go na a dyari fu Eden. Fosi, Abel en papa nanga mama ben e libi drape, ma now den nanga den pikin fu den no ben man go drape moro. Prakseri fa a winti fu a lati bakadina e wai Abel wiwiri te a e luku go na loktu e prakseri en Mekiman. Libisma nanga Gado o kon bun baka wan dei? Na dati nomo Abel ben wani.

2-4. Na sortu fasi Abel e taki nanga wi na ini a ten disi?

² Abel e taki nanga yu tide. Yu man yere en? Kande yu e denki taki dati no kan. Wi sabi taki a di fu tu manpikin disi fu Adam dede langa ten kaba. Noti fu en no tan abra moro. Pikinmoro 6000 yari kaba a tron doti. Luku san Bijbel e taki fu den dedewan: „Den dedewan no sabi notinoti” (Preik. 9:5, 10). Boiti dati, nowan enkri wortu di Abel taki skrifi na ini Bijbel. Sobun, fa a kan taki nanga wi?

³ Gado ben meki na apostel Paulus skrifi a sani disi fu Abel: „Na so fasi Abel e taki te now ete, aladi a dede kaba.” (Leisi Hebrewsma 11:4.) Fa Abel e taki nanga wi? A e taki nanga wi nanga yepi fu a bribi fu en. Abel ben de a fosi libisma di ben kweki a tumusi moi fasi dati. A ben abi so wan tranga bribi, taki a de wan moi eksempre gi wi na ini a ten disi. Te wi e pruberi fu sori a srefi bribi fu Abel, dan a sa de neleki a e taki nanga wi.

⁴ Ma efu Bijbel no e taki furu fu Abel, dan san wi kan leri fu en èn fu a bribi fu en? Meki wi go luku.

5. Fu san ede Yesus sori taki Abel ben libi „na a ten di grontapu seti”? (Luku sosrefi den sani di skrifi na ondrosei fu a bladzijde disi.)

⁵ Abel gebore syatu baka di Gado meki den fosi libisma. Bakaten, wan sani di Yesus ben taki ben sori taki Abel ben gebore na „a ten di grontapu seti”. (Leisi Lukas 11:50, 51.) Soleki fa a sori, dan Yesus ben taki fu den sma di abi a howpu fu kisi frulusu fu sondu. Abel ben de a di fu fo sma di ben libi na grontapu èn soleki fa a sori, dan a ben de a fosi sma di Gado ben feni taki a warti fu kisi frulusu. * A de krin taki Abel no ben abi sma na en lontu di ben de wan bun eksempre gi en.

6. Fa a papa nanga a mama fu Abel ben de?

⁶ Aladi libisma no ben de na grontapu langa ete, toku tumusi sari sani ben miti den kaba. A no de fu taki dati Abel papa nanga mama, Adam nanga Eva, ben de moi sma di ben man du furu sani. Ma den ben meki wan bigi fowtu na ini den libi èn den ben sabi dati. Na a bigin, den no ben abi sondu èn den ben abi a howpu fu libi fu têgo. Ne den opo densrefi teige Yehovah Gado, èn a puru den na ini a Dyari fu Eden, a Paradijs pe den ben e tan. Fu di den ben denki densrefi nomo, èn fu di den no ben e broko den ede srefi nanga den pikin fu den, meki den tron sondusma èn den lasi a howpu fu libi fu têgo.​—Gen. 2:15–3:24.

7, 8. San Eva taki di Kain gebore, èn san a ben kan abi na prakseri?

⁷ Di Adam nanga Eva ben musu go tan na dorosei fu a dyari, den kon si taki a libi ben tranga. Toku di Kain, a fosi pikin fu den gebore, Eva taki: „Yehovah yepi mi fu kisi wan manpikin.” A sani di a taki e sori taki kande a ben e prakseri san Gado ben pramisi na ini a dyari fu Eden. Gado ben taki dati wan uma ben o kisi wan „pikin” di ben o pori na ogriwan di ben meki Adam nanga Eva drai baka gi En (Gen. 3:15; 4:1). A de so taki Eva ben denki taki na en na a uma dati èn taki Kain ben de a pramisi „pikin”?

 ⁸ Efu dati de so, dan a ben e kori ensrefi. Boiti dati, efu na den sani dati en nanga Adam ben e leri Kain di a ben e gro kon bigi, dan kande na den sani disi meki taki Kain kisi bigifasi. Baka wan pisi ten, Eva kisi ete wan boi, ma Bijbel no e sori taki a ben taki den sortu kefalek sani dati fu en. Den kari en Abel, san wani taki „Bro” noso „Fu soso” (Gen. 4:2). A de so taki a nen fu Abel ben e sori taki den no ben e fruwakti bigi sani fu en neleki fa den ben e fruwakti dati fu Kain? We, wi no sabi seiker.

9. San papa nanga mama na ini a ten disi kan leri fu a fosi papa nanga mama fu wi?

⁹ Papa nanga mama na ini a ten disi kan leri furu fu a fosi papa nanga mama dati. Den sani di unu e taki èn e du o meki taki den pikin fu unu kisi bigifasi? Den o suku biginen, noso den o denki densrefi nomo? Noso unu o leri den fu lobi Yehovah Gado èn fu suku fu tron mati fu en? A de wan sari sani taki a fosi papa nanga mama no tyari a frantwortu fu den na a yoisti fasi. Toku howpu ben de gi den bakapikin fu den.

10, 11. Sortu wroko Kain nanga Abel ben e du, èn sortu fasi Abel kon abi?

¹⁰ Di den tu boi ben e gro kon moro bigi, dan a musu fu de so taki Adam leri den fu wroko fu man sorgu na osofamiri. Kain tron wan gronman, èn Abel tron wan skapuman.

¹¹ Ma Abel ben du wan sani di prenspari moro ala tra sani.  Na ini den yari di a ben e gro kon bigi, Abel kon abi bribi, a moi fasi di Paulus ben skrifi fu en bakaten. Denki a tori! Abel no ben abi nowan libisma di a ben kan teki leki eksempre. Dan fa a kon abi bribi na ini Yehovah Gado? Meki wi go luku dri prenspari sani di yepi en kande fu kon abi bribi.

12, 13. Fa den sani di Yehovah meki yepi Abel fu kon abi moro bribi?

¹² Den sani di Yehovah meki. Soleki fa wi sabi, dan Yehovah ben fluku a gron, so taki soso makabon nanga takru wiwiri ben e gro na tapu. A sani disi ben e meki en muilek fu prani gron. Toku a gron ben e gi furu nyanyan di ben e hori Abel en famiri na libi. Ma Gado no ben fluku den meti, den fowru, noso den fisi. Boiti dati, a no ben fluku den bergi, den liba, den se, a loktu, den wolku, a son, a mun nanga den stari. Ala sei pe Abel ben e luku, a ben e si krin taki Yehovah Gado di meki ala sani, abi trutru lobi, koni nanga bun-ati. (Leisi Romesma 1:20.) Fu di Abel ben e denki dipi fu den sani disi, meki a bribi fu en ben e kon moro tranga.

¹³ A musu fu de so taki Abel ben e teki en ten fu prakseri Yehovah. Pruberi fu si fa a ben e luku den skapu fu en. Wan skapuman ben musu waka furu. A ben e tyari den meti fu en abra bergi, pasa na ini lagipresi, èn abra liba. Doronomo a ben e suku den moro grun grasi, den moro bun watra-olo nanga den moro bun presi pe den ben kan rostu. Te yu e luku den meti di Gado meki, dan a gersi leki skapu na den wan di abi yepi nanga kibri fanowdu fu libisma. Kande Abel ben si tu taki en srefi ben abi yepi nanga kibri fanowdu fu wan sma di ben koni èn makti moro iniwan libisma. A no de fu taki dati a begi furu fu a sani dati, èn dati meki a bribi fu en ben e kon tranga moro nanga moro.

14, 15. Fa den pramisi fu Yehovah yepi Abel fu denki dipi fu sani?

¹⁴ Den pramisi fu Yehovah. A ben musu fu de so taki Adam nanga Eva fruteri den manpikin fu den fu san ede Gado puru den na ini a Dyari fu Eden. Sobun, furu sani ben de di Abel ben kan denki dipi fu den.

¹⁵ Yehovah ben taki dati a ben o fluku a gron. Abel ben man si dati krin na den makabon nanga den takru wiwiri. Yehovah ben taki tu dati Eva ben o abi pen te a ben o de nanga bere èn taki a ben o meki pikin nanga skin-ati. A no de fu taki dati Abel si a sani disi di den brada nanga sisa fu en  gebore. Yehovah ben taki dati Eva ben o angri fu a lobi fu en masra èn taki en masra, Adam, ben o basi en. Abel ben si nanga en eigi ai fa a sani disi ben pasa. Awansi fa a no fa, Abel ben si taki a ben kan bribi ala den sani di Yehovah ben taki. Sobun, Abel ben abi bun reide fu bribi Gado di a taki dati wan dei wan „pikin” ben o lusu den problema di ben bigin na ini Eden.​—Gen. 3:15-19.

16, 17. San Abel ben leri kande fu den kerub-engel fu Yehovah?

¹⁶ Den futuboi fu Yehovah. Abel no feni nowan bun eksempre na ini a libisma famiri, ma libisma no ben de den wan-enkri sma di ben e libi na grontapu na a ten dati. Di Yehovah puru Adam nanga Eva na ini a dyari, dan A sorgu taki den nanga den pikin fu den no ben o man poti futu na ini a Paradijs dati. Na mofodoro fu a dyari, Yehovah poti makti kerub-engel èn sosrefi a feti-owru tu di ben e bron nanga faya èn di ben e drai lontu doronomo.​—Leisi Genesis 3:24.

¹⁷ Prakseri fa a ben de gi Abel fu si den engel dati di a ben de wan yongu boi. Fu di den ben teki libisma skin, meki Abel ben man si taki den ben makti srefisrefi. Boiti dati, a „feti-owru” di ben e bron èn ben e drai lontu doronomo ben abi krakti tu na en tapu. Di Abel ben e gro kon bigi, dan yu denki taki wan dei a si taki den kerub-engel kon weri èn taki den gowe libi a presi pe den ben musu tanapu? Nôno. Den makti engel disi tan tanapu leti na a presi dati, dei nanga neti, yari-go-yari-kon, omeni tenti yari langa. Na so Abel kon si taki Yehovah Gado ben abi reti-ati futuboi di ben e tan gi yesi na en. Abel ben si taki den kerub-engel dati ben e dini Yehovah doronomo èn taki den ben e gi yesi na en. En eigi famiri no ben abi den fasi dati. A no de fu taki dati na eksempre fu den engel disi tranga a bribi fu en.

18. Sortu reide wi abi fu tranga a bribi fu wi na ini a ten disi?

 ¹⁸ Den sani di Yehovah ben meki, den pramisi fu en, nanga na eksempre fu den futuboi fu en, yepi Abel fu kon sabi furu fu a Gado disi. Fu di Abel ben e denki dipi fu den sani dati, meki a bribi fu en ben e kon tranga moro nanga moro. Wi kan leri furu fu Abel, a no so? Spesrutu yonguwan kan kisi deki-ati te den sabi taki den kan kon abi trutru bribi na ini Yehovah Gado, awansi san tra sma na ini na osofamiri e du. Wi abi so furu moi sani na wi lontu di Gado meki, wi abi a heri Bijbel, èn wi abi furu eksempre fu sma di ben abi wan tranga bribi. Ala den sani disi e tranga a bribi fu wi na ini a ten disi.

19. Sortu prenspari tru tori Abel kon frustan te fu kaba?

¹⁹ Di a bribi di Abel ben abi na ini Yehovah ben e kon moro tranga, dan a ben wani feni wan fasi fu sori taki a abi bribi. Ma san wan pôti man ben kan gi a Mekiman fu hemel nanga grontapu? A no de fu taki dati Gado no ben abi nowan kado fu libisma fanowdu èn nowan yepi tu. Te fu kaba, Abel kon frustan wan prenspari sani: Efu a ben e gi Yehovah a moro bun sani di a ben abi, èn efu a ben e du dati nanga wan krin ati, dan en lobi Tata na hemel ben o breiti.

20, 21. San Kain nanga Abel tyari leki ofrandi gi Yehovah, èn fa Yehovah ben feni den ofrandi dati?

 ²⁰ Abel bosroiti fu tyari wan tu skapu fu en leki ofrandi. A teki den moro bunwan, noso den fosi pikin skapu di gebore, èn a tyari den moro bun pisi fu den leki ofrandi. Na a srefi ten, Kain ben wani tu taki Gado blesi en èn taki a feni en bun. Dati meki a bosroiti fu tyari wan tu fu den nyanyan fu en gron leki ofrandi. Ma a no ben abi a srefi denki leki Abel. A sani dati kon na krin di den brada tyari na ofrandi fu den.

²¹ A kan taki ala tu manpikin fu Adam ben bron den ofrandi fu den na tapu altari. Kande den kerub-engel ben man si fa den ben e tyari den ofrandi dati. Den engel dati ben de den wan-enkri sma di ben e teki presi gi Yehovah na grontapu na a ten dati. Fa Yehovah ben feni den ofrandi dati? Bijbel e taki: „Yehovah ben e prisiri nanga Abel èn nanga na ofrandi fu en” (Gen. 4:4). Ma Bijbel no e taki fa Gado sori dati.

22, 23. Fu san ede Yehovah ben feni na ofrandi fu Abel bun?

²² Ma fu san ede Gado ben feni Abel bun? Na a ofrandi fu en ben meki taki Gado feni en bun? A tru taki Abel ben tyari wan libilibi skapu leki ofrandi èn a meki a warti brudu fu a skapu dati lon. A de so taki Abel ben sabi o warti so wan ofrandi ben o de? Furu hondrohondro yari baka a ten fu Abel, Gado gebroiki na ofrandi fu wan pikin skapu di no abi nowan mankeri, fu prenki na ofrandi fu en eigi Manpikin. A Manpikin disi, di Bijbel e kari „a Pikin Skapu fu Gado”, no ben abi sondu èn a ben o dede fu a bun fu trawan (Yoh. 1:29; Eks. 12:5-7). Ma a no de fu taki dati Abel no ben sabi notinoti fu den sani dati èn a no ben frustan den tu.

²³ San wi sabi na disi: Abel ben gi a moro bun sani di a ben abi. Boiti taki Yehovah ben feni na ofrandi fu Abel bun, a ben feni Abel bun tu. Abel ben tyari na ofrandi fu en fu di a ben lobi Gado èn fu di a ben e frutrow na en tapu nanga en heri ati.

24. (a) A de so taki na ofrandi fu Kain no ben bun? (b) Fa Kain ben de leki furu sma na ini a ten disi?

²⁴ Ma Kain no ben de so. Yehovah „no ben e prisiri nanga Kain èn nanga na ofrandi fu en” (Gen. 4:5). Dati no wani taki dati na ofrandi fu Kain no ben bun, bika bakaten a Wèt fu Gado ben e gi pasi taki sma tyari den nyanyan fu den gron fu den leki ofrandi (Lef. 6:14, 15). Ma Bijbel e taki dati Kain  „ben e du ogri”. (Leisi 1 Yohanes 3:12.) Neleki furu sma na ini a ten disi, a de krin taki Kain ben denki taki te a ben e du neleki a ben e dini Gado, dan dati ben nofo kaba. Ma heri esi den sani di a ben e du sori taki a no ben e bribi trutru na ini Yehovah èn taki a no ben lobi en tu.

25, 26. Sortu warskow Yehovah gi Kain, ma san Kain du?

²⁵ Di Kain si taki Yehovah no feni en bun, dan san a du? A suku fu teki leri fu na eksempre fu Abel? Nôno. A ben e teige en brada. Yehovah ben si san ben e pasa na ini na ati fu Kain èn na wan lobi-ati fasi a taki nanga en. A warskow Kain taki efu a ben e go so doro, dan a ben o du seryusu sondu. Yehovah taigi Kain tu taki efu a ben o kenki den fasi fu en, dan a ben o „prisiri” baka nanga en.​—Gen. 4:6, 7.

²⁶ Kain no gi yesi na a warskow fu Gado. Na presi fu dati a kari en yongu brada di ben e frutrow en, fu go teki wan waka nanga en na ini a gron. Drape Kain naki Abel kiri (Gen. 4:8). Fu taki en leti, Abel tron a fosi sma di sma kiri fu a bribi fu en ede. A dede, ma a tori fu en no kaba ete.

27. (a) Fu san ede wi kan de seiker taki Abel o kisi wan opobaka? (b) San wi musu du efu wi wani miti Abel wan dei?

²⁷ Na agersi fasi, a brudu fu Abel ben bari kari Yehovah Gado fu strafu a sma di ben du na ogri nanga en. Na dati Gado du nanga Kain (Gen. 4:9-12). San moro prenspari, na taki wi kan leri wan sani fu a bribi fu Abel. A ben libi kande 100 yari nomo èn dati ben syatu te yu e luku o langa sma fu a ten dati ben e libi. Ma Abel ben libi na wan fasi di Gado ben feni bun. A dede nanga na overtoigi taki Yehovah, en Tata na hemel, ben lobi en èn taki a ben feni en bun (Hebr. 11:4). Dati meki wi kan de seiker taki Yehovah di man memre ala sani, no frigiti Abel, èn te a ten doro Abel o kisi wan opobaka na ini a paradijs na grontapu (Yoh. 5:28, 29). Yu o miti Abel drape? Yu o man miti en efu yu abi a fasti bosroiti fu arki en te a e taki èn efu yu e du ala san yu man fu sori a srefi tranga bribi di a ben abi.