1-3. (a) Fruteri san Esekièl e si èn san a e yere. (Luku a prenki na a bigin fu a kapitel.) (b) Fa Esekièl kisi a fisyun fu en èn fa a e firi te a e kisi a fisyun?

 ESEKIÈL de na ini wan sabana. A e smara en ai fu man si san de na en fesi. Dan a e piri den ai fu en fu di a no man bribi san a e si. A e si wan bigi winti e wai kon. Ma a winti disi de tra fasi. A winti tranga so te taki a e wai Esekièl en wiwiri nanga en krosi. A e si wan bigi wolku tu èn faya e koti na ini a wolku. A wolku e brenki leki gowtu di moksi nanga solfru. Te a wolku e kon moro krosibei fu Esekièl, a e yere wan babari di de leki a babari fu wan bigi legre.​—Esek. 1:4, 24.

² Esekièl abi 30 yari te a e kisi a fosi fisyun fu Yehovah. A o kisi moro fisyun di a no o frigiti noiti moro. Bijbel e taki dati na „a krakti fu Yehovah” e meki a kisi den fisyun disi. A krakti disi na a santa yeye fu Yehovah. A yeye dati o meki a si èn yere moro kefalek sani leki san yu e si na ini son felem. A fisyun di Esekièl kisi seki en so te, taki a e boigi nanga en fesi go na gron.​—Esek. 1:3, 28.

 ³ Ma Yehovah no ben wani sori Esekièl wan moi fisyun nomo. Neleki den tra fisyun di Esekièl kisi, a fosi fisyun leri en furu. Den futuboi fu Yehovah na ini a ten disi e leri furu tu fu den fisyun fu Esekièl. Meki wi go luku san Esekièl si èn san a yere.

4, 5. Fa sani ben de na a ten di Esekièl kisi a fisyun?

⁴ Leisi Esekièl 1:1-3. Meki wi luku fosi fa sani ben de na ini a ten fu Esekièl. A ben de a yari 613 Fosi Krestes. Na ini a kapitel na fesi wi leri taki Esekièl ben e libi na ini Babilon makandra nanga tra Dyu krosibei fu Kebar-liba. Na sma ben diki a liba disi. A watra ben komoto fu na Eufraat-liba èn a ben lon go baka na a liba dati.

⁵ Yerusalem, a kondre fu den Dyu, ben de sowan 800 kilometer fu Babilon. a Sma ben e anbegi falsi gado na a tempel pe Esekièl papa ben dini leki priester. Den kownu di ben tiri na ini Yerusalem ben gi Yehovah syen, den no ben de leki David nanga Salomo. Kownu Yoyakin ben de na ini Babilon makandra nanga den tra katiboman, ma a no ben e du san Yehovah ben taki. Sedekia di ben tron kownu baka en, ben de wan ogri man di ben du ala san a kownu fu Babilon ben taigi en.​—2 Kow. 24:8-12, 17, 19.

6, 7. San ben hati Esekièl?

⁶ Fu di Esekièl ben abi wan tranga bribi, meki a ben hati en fu si taki den sani di ben pasa ben swaki a bribi fu den  tra Dyu. Kande sonwan fu den katiboman ben aksi densrefi: ’Yehovah gowe libi wi? Babilon nanga den someni falsi gado fu en o meki taki sma no o man anbegi a tru Gado moro? Yehovah no o abi tiriman na grontapu moro di e teki presi gi en?’

⁷ Now yu sabi fa sani ben de na ini a ten fu Esekièl. Fosi yu bigin studeri san Esekièl e taki fu a fisyun di a si, dan a bun fu leisi a heri fisyun (Esek. 1:4-28). Te yu e leisi a pisi disi, pruberi fu si san Esekièl ben si èn fu yere san a ben yere.

8. San Esekièl si na ini a fisyun èn san a sani disi e prenki?

⁸ San Esekièl si? A ben si wan bigi hemel wagi. A wagi disi ben abi fo bigi wiel èn fo yeye ben tanapu na sei den wiel. Den yeye disi na kerub-engel (Esek. 10:1). Na tapusei fu den yeye a ben si wan bigi plata sani di ben gersi wan plata pisi ijs. Na tapu a sani disi a ben si a kownusturu fu Gado èn Yehovah ben sidon na en tapu. San a hemel wagi e prenki? A e prenki a pisi fu Yehovah organisâsi  di de na hemel. Fu san ede wi kan taki dati? Meki wi go luku dri sani.

9. Fu san ede wi kan taki dati a fasi fa Yehovah e tiri den engel de neleki a e rèi wan wagi?

⁹ Yehovah e tiri den yeye na hemel. Na ini a fisyun disi wi e si taki a kownusturu fu Yehovah de na tapusei fu den kerub-engel. Tra Bijbeltekst e taki tu dati Yehovah e sidon na tapu den kerub-engel noso taki a de na mindri den (leisi 2 Kownu 19:15; Eks. 25:22; Ps. 80:1). A no de fu taki dati Yehovah no e sidon trutru na tapu den kerub-engel. Yehovah no abi den engel disi fanowdu fu tyari en go pe a wani èn a no de fanowdu tu taki a musu rèi na ini wan trutru wagi. Ma den kerub-engel e gi yesi na Yehovah leki a Moro Hei Tiriman èn a kan seni den go na iniwan presi fu grontapu noso hemel fu du san a wani. Neleki ala den tra engel den na dinari fu Yehovah èn den e du san a taki (Ps. 104:4). Sobun, te Bijbel e taki dati Yehovah e „rèi” tapu den engel, dan dati wani taki dati a e tiri den.

10. San e sori taki a hemel wagi fu Yehovah abi moro leki fo kerub-engel?

¹⁰ A no fo kerub-engel nomo de na ini a pisi fu Yehovah en organisâsi di de na hemel. Esekièl ben si fo  kerub-engel na ini a fisyun. Nofo tron te Bijbel e gebroiki a nomru fo, dan a e sori go na wan sani di no e mankeri noti. Sobun, den fo kerub-engel e prenki ala den tra engel di e gi yesi na Yehovah. Luku taki den wiel ben abi ai na ala sei èn den engel srefi ben abi ai na den heri skin. Disi e sori taki a no soso den fo kerub-engel de na ai, ma ala den tra engel tu. Boiti dati, a wagi di Esekièl ben si ben bigi srefisrefi (Esek. 1:18, 22; 10:12). Disi e sori taki a pisi fu Yehovah en organisâsi di de na hemel bigi èn taki a abi moro leki fo kerub-engel.

11. Sortu fisyun Danièl ben kisi fu hemel èn san disi e leri wi?

¹¹ A fisyun di Danièl ben kisi fu hemel. A profeiti Danièl srefi ben de leki katiboman na ini Babilon èn en srefi ben kisi wan fisyun fu hemel. Na ini a fisyun dati a kownusturu fu Yehovah ben abi wiel tu. A fisyun fu Danièl ben sori o furu engel de na ini na osofamiri fu Yehovah na hemel. Danièl si „dusun tron dusun . . . èn tin dusun tron tin dusun” engel di ben e tanapu leti na Yehovah fesi. Wan Grankrutu ben e hori na hemel èn a sori leki ala den engel ben sabi sortu frantwortu den abi (Dan. 7:9, 10, 13-18). Sobun, a de krin taki a hemel wagi di Esekièl si e prenki ala den engel di Danièl si.

12. Fu san ede a bun fu studeri a fisyun fu Esekièl fu a hemel wagi?

¹² Yehovah sabi taki a o de wan kibri gi wi te wi e poti prakseri na „den sani di wi no e si”, soleki fa na apostel Paulus ben taki. Fu san ede? Fu di leki libisma wi lobi poti prakseri na „den sani di wi e si”. Wi e broko wi ede furu nanga den sani di wi abi fanowdu. Ma den sani dati na fu wan pisi ten nomo. (Leisi 2 Korentesma 4:18.) Satan sabi fa libisma de èn dati meki a wani kisi wi fu poti tumusi furu prakseri na sani di a sondu skin wani. Fu yepi wi fu kakafutu gi Satan, Yehovah gi wi en Wortu. Na ini en Wortu yu abi tori leki a fisyun fu Esekièl di e memre wi o moi èn o bigi a pisi fu Yehovah organisâsi na hemel de.

13, 14. (a) San Esekièl taki fu den wiel di a si? (b) Fu san ede a fiti taki a kownusturu fu Yehovah abi wiel?

¹³ Esekièl e poti prakseri fosi na den fo kerub-engel. Na ini kapitel 4 fu a buku disi wi o si san den engel disi e leri wi fu Yehovah. Na sei den fo kerub-engel, Esekièl e si fo wiel di de na fo uku. Sobun, den ben meki wan bigi fokanti. (Leisi Esekièl 1:16-18.) A ben gersi leki den wiel ben meki fu krisolit-ston. Krisolit-ston e brenki, a kan geri noso grun èn son leisi yu kan si pasa en.

 ¹⁴ Esekièl e taki furu fu den wiel fu a wagi. Den kownusturu fu libisma no abi wiel èn den de na wán presi, fu di libisma tiriman abi makti soso na ini a kontren pe den e tiri. Ma a makti fu Yehovah no de leki di fu libisma tiriman. Esekièl ben o leri taki Yehovah abi a makti fu du ala san a wani (Neh. 9:6). Leki a Moro Hei Tiriman, a man tiri na iniwan presi na hemel nanga grontapu!

15. O bigi den wiel de di Esekièl si èn fa den ben meki?

¹⁵ Esekièl ben fruwondru di a si o bigi den wiel de. A skrifi: „Den lanki fu den ben hei so te, taki den ben meki sma frede.” Yu man si fa Esekièl e opo en ede fu luku den bigi wiel disi di e brenki èn di e doro bijna te na hemel? Esekièl taki tu: „Den lanki fu ala den fo wiel ben abi ai na ala sei.” Ma san ben moro aparti na a fasi fa den meki. A taki: „Den wiel ben meki na so wan fasi taki a ben gersi leki wan wiel ben de na mindri fu wan tra wiel.”

16, 17. (a) San den wiel ben man du? (b) San disi e leri wi fu a hemel wagi fu Yehovah?

¹⁶ San den wiel ben man du fu di den ben meki na so wan fasi? Esekièl e taki: „Te den ben e gowe, den ben kan go na iniwan sei pe den ben wani go. Den no ben abi fu drai fu go na wan tra sei.” San a sani disi e leri wi fu a hemel wagi di Esekièl si?

¹⁷ Den wiel bigi so te taki te den drai wán leisi nomo, dan a wagi e doro bun fara kaba. Fu taki en leti, a fisyun e sori taki a wagi gaw leki faya di e koti na hemel (Esek. 1:14). Den wiel e sori taki a wagi disi e rèi bun esi èn taki a man drai go na iniwan sei sondro fu stop. Libisma no man meki den sortu wagi disi. Wan tra sani na taki a wagi no e rèi bruyabruya. Den ai na den wiel e sori taki a wagi e si ala sani na en lontu èn a e si go na iniwan sei.

18. San den bigi wiel nanga den ai na den wiel e leri wi fu a pisi fu Yehovah en organisâsi di de na hemel?

¹⁸ San Yehovah ben wani leri Esekièl nanga den tra futuboi fu en fu a pisi fu en organisâsi di de na hemel? Meki wi luku san wi kon si te nanga now. A pisi fu Yehovah en organisâsi di de na hemel bigi èn a moi, neleki fa den bigi wiel moi srefisrefi. Na organisâsi sabi ala sani di e pasa, soleki fa den someni ai na den wiel e sori. Yehovah en eigi ai e si ala sani (Odo 15:3; Yer. 23:24). Boiti dati, Yehovah abi milyunmilyun engel di a kan seni go na iniwan sei fu grontapu noso hemel èn den e fruteri en ala san den si.​—Leisi Hebrewsma 1:13, 14.

19. A hemel wagi gaw èn a man drai go na iniwan sei. San disi e leri wi fu a pisi fu Yehovah en organisâsi na hemel?

¹⁹ Wi si tu taki a hemel wagi gaw èn taki a man drai go na iniwan sei. Sobun, wan bigi difrenti de na mindri a  pisi fu Yehovah en organisâsi di de na hemel èn den libisma regering nanga organisâsi. Den regering nanga organisâsi disi no sabi fa den musu lusu den problema na grontapu èn den no man fiti densrefi te sani e kenki. Dati meki den no man yepi libisma èn Yehovah o pori den. Ma a hemel wagi man fiti ensrefi na iniwan situwâsi neleki Yehovah, a sma di e rèi en. Soleki fa a nen fu Yehovah e sori, dan a man tron iniwan sani di de fanowdu fu meki a wani fu en kon tru (Eks. 3:13, 14). Fu eksempre, a man tron wan tranga fetiman di e feti gi en pipel. Ma a de gaw tu fu gi den pardon fu den sondu te den abi berow èn fu trowstu den.​—Ps. 30:5; Yes. 66:13.

20. Fu san ede wi musu warderi a pisi fu Yehovah en organisâsi di de na hemel?

²⁰ A fisyun fu Esekièl no meki taki yu kisi moro warderi gi a pisi fu Yehovah en organisâsi na hemel? Wi no musu frigiti taki a wagi e tan go na fesi. Noiti wi musu denki taki Yehovah, en Manpikin nanga den engel no e si den problema di e meki wi lasi-ati. Wi no musu frede tu taki Gado no o yepi wi na a yoisti ten noso taki en organisâsi no o man fiti ensrefi na a situwâsi na grontapu di kan kenki wantronso. Hori na prakseri taki Yehovah en organisâsi e tan go na fesi. Esekièl ben yere wan sten komoto fu hemel di ben taigi den wiel: „Un bigin go!” (Esek. 10:13) A moi fu si fa Yehovah e tiri en organisâsi. Ma san moro moi na san a fisyun e taki fu Yehovah srefi.

21, 22. San e hori den sani fu a hemel wagi na den presi?

²¹ Te Esekièl e luku go na tapusei fu den wiel a e si ’wan bigi plata sani di gersi wan plata pisi ijs di e brenki èn di moi srefisrefi’ (Esek. 1:22). A sani disi ben bradi èn a ben de tapusei fu den kerub-engel. Ma kande den sma di sabi sani fu wagi e aksi densrefi: ’San e hori a bigi plata sani na en presi? Fa den wiel e drai sondro wan as di e hori den na makandra?’ Ma wi musu hori na prakseri taki a wagi disi a no wan trutru wagi. Esekièl e taki wan tra prenspari sani tu: „A yeye di ben de na ini den libisani, ben de na ini den wiel tu” (Esek. 1:20, 21). San na a yeye di ben de na ini den kerub-engel èn na ini den wiel?

²² A no de fu taki dati a yeye disi na a santa yeye fu Yehovah, a moro tranga krakti di de. Na a santa yeye e hori ala sani fu a wagi na en presi, a e gi en krakti èn a  e tyari en go pe a musu go. Meki wi luku now san Esekièl e si fu a sma di e rèi a hemel wagi.

23. Sortu wortu Esekièl e gebroiki furu te a e taki fu Yehovah na ini a fisyun disi èn fu san ede a e du dati?

²³ Leisi Esekièl 1:26-28. Te Esekièl e taki fu a fisyun disi a e gebroiki den wortu „a ben gersi” furu. Ma na ini den vers disi a e gebroiki den wortu dati moro furu srefi. A gersi leki a ben muilek gi en fu feni wortu fu fruteri san a e si. A ben si ’wan sani di gersi wan kownusturu fu safir-ston’. Oiti yu si wan kownusturu di meki fu blaw safir-ston? Esekièl e si taki wan sma e sidon na tapu a kownusturu. A sma disi ben ’gersi wan libisma’.

24, 25. (a) Na sortu sani na alenbo di de lontu a kownusturu fu Yehovah e memre wi? (b) Fa son futuboi fu Yehovah ben firi baka di den kisi den sortu fisyun disi?

²⁴ Esekièl no ben man si a sma di e sidon na tapu a sturu krin, fu di wan sani di gersi faya ben de lontu Yehovah fu en dyonku go na loktu èn fu en dyonku go na ondro. Sobun, a ben musu fu de so taki Esekièl ben smara en ai èn a ben poti en anu fesi en ai fu luku a sma di e sidon na tapu a kownusturu. A sani di Esekièl e si now moro moi srefi. A e taki: „Wan brenki leti ben de na en  lontu. A brenki leti di ben de na en lontu ben gersi wan alenbo di de fu si na den wolku, baka te hebi alen fadon.” Fa yu e firi te yu e si wan alenbo? A no de fu taki dati yu e firi bun. Na alenbo nanga den furu kloru e memre wi na a glori fu wi Mekiman! A e memre wi tu na a frubontu di Yehovah meki baka a Frudu (Gen. 9:11-16). Aladi Yehovah na a Almaktiwan, toku en na wan Gado fu freide (Hebr. 13:20). Fu di en na wan Gado fu freide meki ala den sma di e anbegi en abi freide tu.

²⁵ San pasa nanga Esekièl di a si a glori fu Yehovah Gado? Esekièl skrifi san pasa: „Di mi si a sani disi mi boigi nanga mi fesi go na gron.” Den moi sani di Esekièl si seki en so te taki a fadon tapu en kindi. Tra profeiti ben du so wan sani tu di den kisi fisyun fu Yehovah. Den sani di den ben si ben memre den o pikin den de èn sonwan fu den ben frede srefi (Yes. 6:1-5; Dan. 10:8, 9; Openb. 1:12-17). Ma te fu kaba den fisyun di den ben kisi ben tranga den bribi. Na so a ben de nanga Esekièl. Èn wi bribi o kon moro tranga te wi e studeri den Bijbel tori disi.

26. Fa a fisyun gi Esekièl deki-ati?

²⁶ Efu Esekièl ben broko en ede nanga a situwâsi fu Gado en pipel na ini Babilon, dan a musu de so taki a fisyun gi en deki-ati. A ben de krin taki awinsi den reti-ati futuboi fu Gado ben de na ini Yerusalem, na ini Babilon noso na wan tra presi, Yehovah nanga den engel fu en ben o man yepi den. Nowan tirimakti di de ondro a makti fu Satan ben o man feti nanga Gado di e tiri so wan bigi organisâsi. (Leisi Psalm 118:6.) Esekièl ben si tu taki a hemel wagi disi no de fara fu libisma fu di den wiel fu a wagi e doro na grontapu (Esek. 1:19). Sobun, Yehovah ben e broko en ede nanga den reti-ati futuboi fu en na ini Babilon. Ala ten Yehovah ben o man yepi den.

27. San wi e leri fu a fisyun fu Esekièl?

²⁷ Wi kan leri wan sani fu a fisyun fu Esekièl? Seiker! Na ini a ten disi Satan e meki moro muiti fu meki sma drai baka gi a tru anbegi. A wani taki wi denki taki wi de wi wawan èn taki wi hemel Tata nanga en organisâsi no man yepi wi. Noiti yu musu bribi den lei disi! (Ps. 139:7-12) Neleki Esekièl a fisyun disi abi furu krakti na wi tapu. Kande wi no e boigi nanga wi fesi go na gron neleki Esekièl. Ma wi e kon abi furu warderi gi a pisi fu Yehovah en  organisâsi di de na hemel, te wi e si fa a bigi, o gaw a man du sani, o bun a man fiti ensrefi na nyun situwâsi èn fa a moi.

28, 29. San e sori taki a hemel wagi fu Yehovah tan go na fesi na ini den yari di pasa?

²⁸ Hori na prakseri taki na organisâsi fu Yehovah abi wan pisi na grontapu tu. Na sondu libisma de na ini a pisi disi fu na organisâsi. Ma toku Yehovah e gebroiki den fu du bigi sani dyaso na grontapu! Na heri grontapu Yehovah e yepi libisma fu du sani di densrefi noiti no ben o man du (Yoh. 14:12). Na ini a buku Gado Kownukondre e tiri! wi kan leisi fa a preikiwroko du na heri grontapu na ini den yari di pasa. Boiti dati, wi no musu frigiti den skoro di na organisâsi orga fu gi wi leri, den krutu-afersi di wi wini èn a fasi fa wi e gebroiki den nyun sani soleki computer nanga Internet fu du a wani fu Gado!

²⁹ Te wi e si ala den sani di na organisâsi e du fu seti a tru anbegi na ini den lasti dei fu na ogri grontapu, dan a de krin taki a hemel wagi fu Yehovah e go na fesi. A de wan bigi grani fu de na ini na organisâsi disi èn fu dini a Moro Hei Tiriman!​—Ps. 84:10.

30. San wi o luku na ini a tra kapitel?

³⁰ Ma wi kan leri moro fu a fisyun fu Esekièl. Na ini a tra kapitel wi o taki fu den fo „libisani” noso kerub-engel. San den e leri wi fu wi Moro Hei Tiriman, Yehovah Gado?