Wan pisi ten baka a Paskafesa, Yesus nanga den disipel fu en ben e go na Galilea. Den ben e waka pasa na ini Samaria. Krosibei fu a foto Sikar, Yesus stop na a peti fu Yakob. A go sidon sei a peti fu rostu pikinso. Den disipel fu en ben go na ini a foto fu go bai nyanyan.

Wan uma kon na a peti fu kisi watra. Yesus taigi en: ’Gi mi pikinso watra fu dringi.’ Na uma piki en: ’Fu san ede yu e taki nanga mi? Mi na wan Samaria uma. Den Dyu no e taki nanga den Samariasma.’ Yesus taki: ’Efu yu ben sabi suma na mi, dan yu ben o aksi mi watra fu dringi èn mi ben o gi yu watra di e gi libi.’ Na uma taki: ’Mi no e frustan san yu e taki. Yu no abi wan emre srefi fu kisi watra.’ Yesus taki: ’Efu wan sma e dringi a watra di mi o gi en, dan watra no o kiri en noiti moro.’ Na uma taki: ’Masra, gi mi a watra dati.’

Yesus taigi na uma: ’Go kari yu masra, dan yu kon baka na a peti.’ A piki: ’Mi no abi masra.’ Yesus taki: ’Yu abi leti. Yu ben trow feifi leisi èn a man di yu abi now, a no yu masra fu di yu no trow nanga en.’ Na uma taki: ’Mi si taki yu na wan profeiti. Den sma fu mi e bribi taki wi musu anbegi Gado na tapu a bergi disi, ma den Dyu e taki dati wi musu anbegi en soso na ini Yerusalem. Mi e bribi taki te a Mesias kon, a o leri wi fa fu anbegi Gado.’ Dan Yesus taigi na uma wan sani di a no ben taigi nowan tra sma. A taki: ’Mi na a Mesias.’

 Na uma lon go na ini a foto èn a taigi den Samariasma: ’Mi denki taki mi feni a Mesias. A sabi ala sani fu mi. Un kon luku!’ Ne den sma waka baka na uma go na a peti fu arki den leri fu Yesus.

Den Samariasma aksi Yesus fu tan nanga den èn a tan drape tu dei. A gi den leri èn furu sma ben poti bribi na ini en. Den taigi na uma: ’Now di wi yere san a man disi leri wi, wi si taki en na a frulusuman fu grontapu trutru.’