TAIGI mi, sortu buku yu lobi moro?— Son pikin ben o teki wan buku di e taki fu meti. Tra pikin ben o teki wan buku di abi wan lo prenki na ini. A kan de wan prisiri sani fu leisi den sortu buku dati.

Ma den moro bun buku di de, na den wan di e fruteri wi a waarheid fu Gado. Wan fu den sortu buku dati warti moro leki ala trawan. Yu sabi sortu buku na dati?— Dati na Bijbel.

Fu san ede Bijbel prenspari so?— Fu di na Gado gi wi a buku dati. Bijbel e fruteri wi fu Gado èn fu den bun sani di a sa du gi wi. Boiti dati, a buku disi e sori wi san wi musu du so taki Gado kan prisiri nanga wi. Bijbel de leki wan brifi di Gado seni gi wi.

Te yu e luku en bun, dan Gado ben kan skrifi a heri Bijbel na ini hemel, èn baka dati a ben kan gi libisma a buku disi. Ma a no du dati. A tru taki den prakseri na ini na fu Gado, ma a gebroiki den futuboi fu en na grontapu moro furu fu skrifi a Bijbel.

Fa Gado du dati?— Fu man frustan fa a du dati, dan prakseri a sani disi. Te wi e yere a sten fu wan sma na radio, dan a sten dati kan de fu wan sma di de farawe. Te wi e luku telefisi, dan wi kan si sma fu tra kondre fu grontapu srefi, èn wi kan yere san den e taki.

Libisma kan go te na a mun srefi na ini den spesrutu sortu opolani fu den, èn te den de drape, den kan seni boskopu kon na grontapu. Yu ben sabi dati?— Efu libisma kan du dati, dan yu denki taki Gado man seni boskopu komoto fu hemel?— Iya, a kan du dati trutru! Èn a ben du dati wan langa pisi ten bifo libisma ben abi radio noso telefisi.

 Moses ben de wan man di ben yere a sten fu Gado trutru. A no ben man si Gado, ma a ben man yere Gado sten. Milyunmilyun sma ben de drape di a sani disi pasa. Fu taki en leti, a dei dati Gado meki wan heri bergi seki, dondru ben bari èn faya ben koti na hemel. Den sma ben sabi taki na Gado ben taki, ma den ben frede srefisrefi. Fu dati ede den taigi Moses: „No meki Gado taki nanga wi so taki wi no e dede.” Bakaten Moses skrifi den sani di Gado ben taki. Èn den sani di Moses ben skrifi de na ini Bijbel.​—Exodus 20:​18-21.

Moses ben skrifi den fosi feifi buku fu Bijbel. Ma en no ben de a wan-enkri skrifiman fu a Bijbel. Gado meki sowan 40 man skrifi pisi fu Bijbel. Den man disi ben e libi wan bun langa ten pasa, èn a teki furu yari bifo a Bijbel ben kaba skrifi. Iya, a teki wan pisi ten fu sowan  1600 yari! Sonwan fu den man disi noiti no ben miti makandra, ma toku ala sani di den skrifi e kruderi dorodoro nanga makandra. A sani disi na wan fruwondru sani trutru.

Sonwan fu den man di Gado gebroiki fu skrifi a Bijbel ben abi biginen. Aladi Moses ben de wan skapuman fosi, toku a tron a fesiman fu a pipel fu Israel. Salomo ben de wan kownu di ben de a moro koni man èn sosrefi a moro gudu man na grontapu. Ma trawan fu den skrifiman no ben abi so wan biginen. Amos ben de wan man di ben e sorgu gi figabon.

Boiti dati, wan fu den Bijbel skrifiman ben de wan datra. Yu sabi en nen?— A ben nen Lukas. Wan tra skrifiman ben abi a wroko fu piki belasting moni gi lanti. A man disi ben nen Mateyus. Ete wan tra skrifiman ben de, èn a man dati ben de wan afkati di ben sabi den wet fu a Dyu bribi heri bun. A man disi ben skrifi moro buku fu Bijbel leki iniwan tra skrifiman. Yu sabi en nen?— En nen ben de Paulus. Petrus nanga Yohanes, di ben de disipel fu Yesus, ben de Bijbel skrifiman tu, èn den man disi ben de fisiman.

Furu fu den Bijbel skrifiman ben skrifi fu sani di Gado ben o du na ini a ten di e kon. Fa den ben sabi den sani dati aladi den no ben pasa srefisrefi ete?— Gado ben fruteri den man dati san den ben musu skrifi. A ben taigi den san ben o pasa.

Na a ten di Yesus, a Bigi Leriman, ben de na grontapu, dan wan bigi pisi fu Bijbel ben skrifi kaba. Ma memre taki a Bigi Leriman ben de na ini hemel bifo a ben kon na grontapu. A ben sabi san Gado ben du. A ben bribi taki a Bijbel ben kon fu Gado?— Iya, a ben bribi dati.

Te Yesus ben e taki nanga sma fu den sani di Gado du, dan a ben leisi gi den san skrifi na ini Bijbel. Son leisi a ben taigi den san Bijbel e taki, sondro fu luku na ini a Bijbel. Boiti dati, Yesus ben kon fruteri wi tra sani tu di a yere fu Gado. Yesus ben taki: „Den srefi sani di mi yere fu en, mi kon fruteri na grontapu” (Yohanes 8:26). Yesus ben  yere furu sani fu Gado fu di a ben libi nanga Gado. Èn pe wi kan leisi den sani dati di Yesus ben taki?— Na ini Bijbel. Gado meki sma skrifi ala den sani dati so taki wi kan leisi den.

A no de fu taki dati di Gado meki sma skrifi a Bijbel, dan den du dati na ini a tongo di den ben gwenti fu taki. Fu dati ede, a moro bigi pisi fu Bijbel ben skrifi na ini Hebrewtongo, wan pisi na ini Arameisitongo, èn wan tra bigi pisi na ini Grikitongo. Ma furu sma na ini a ten disi no sabi fa fu leisi den tongo dati. Dati meki sma poti a Bijbel abra na ini tra tongo. Na ini a ten disi, sma kan leisi pisi fu Bijbel na ini moro leki 2260 tongo. Denki a sani dati! Bijbel na wan brifi di Gado skrifi gi libisma na heri grontapu. Ma awansi na ini omeni tongo sma poti a brifi dati abra, toku a boskopu e tan a boskopu fu Gado.

Den sani di Bijbel e taki de prenspari gi wi. Bijbel ben  skrifi wan langa ten pasa kaba, ma a e fruteri wi fu sani di e pasa na ini a ten fu wi. A e taigi wi tu san Gado o du heri esi. Den sani di Bijbel e fruteri e gi wi prisiri trutru! Den e gi wi wan tumusi moi howpu.

Bijbel e fruteri wi sosrefi fa Gado wani taki wi musu libi. A e fruteri wi san bun èn san no bun. Yu musu sabi dati, èn misrefi musu sabi dati tu. Bijbel e fruteri wi fu sma di ben du takru sani èn san ben pasa nanga den. Na so fasi wi kan luku bun taki wi no kisi den problema di den sma dati ben kisi. Bijbel e fruteri wi sosrefi fu sma di ben du bun èn san na den bun bakapisi di den ben kisi. Gado meki sma skrifi ala den sani disi so taki wi kan kisi wini fu den.

Ma fu man kisi wini dorodoro fu den sani di skrifi na ini Bijbel, dan wi musu kon sabi a piki tapu wan spesrutu aksi. Na a aksi de: Suma gi wi a Bijbel? San yu ben o piki?— Iya, a heri Bijbel e komoto fu Gado. Ma fa wi kan sori taki wi koni trutru?— Wi musu arki Gado èn wi musu du san a e taigi wi.

Fu dati ede wi musu teki ten fu leisi Bijbel nanga makandra. Te wi e kisi wan brifi fu wan sma di wi lobi trutru, dan wi e leisi en ibri tron baka. A brifi dati warti gi wi. Na so Bijbel musu warti gi wi tu, fu di a de wan brifi fu a Sma di lobi wi moro leki iniwan tra sma. A de wan brifi fu wan lobi-ati Gado.