Aladi wan trowpaar breiti srefisrefi te den kisi wan beibi, toku a kan hebi gi den tu. Te unu kisi un fosi pikin, dan unu o si taki unu o gebroiki moro furu fu un ten nanga krakti fu sorgu gi a beibi. Unu o lasi sribi, unu no o firi bun ala ten, èn den sani disi kan hebi gi unu. Yu nanga yu trowpatna o abi fu tyari kenki kon fu man sorgu un beibi èn fu man tan abi wan bun trowlibi. Fa rai fu Bijbel kan yepi unu na ini a muilek situwâsi disi?

SAN BIJBEL E TAKI: „Lobi abi pasensi èn a abi switifasi.” Lobi „no e suku en eigi bun èn a no e mandi esi” (1 Korentesma 13:4, 5). A no de fu taki dati yu leki mama di kisi en fosi pikin, o poti furu prakseri na yu beibi. Ma yu masra kan kisi a firi leki yu no abi ten gi en moro. Dati meki yu no musu frigiti fu poti prakseri na en. Meki a sabi taki yu abi en fanowdu tu fu sorgu a pikin fu unu èn du dati nanga pasensi èn nanga switifasi.

„Un masra, tan libi nanga un wefi na wan fasi di e sori taki unu e frustan den bun” (1 Petrus 3:7). Hori na prakseri taki yu wefi o gi moro furu fu en krakti fu sorgu un beibi. A abi nyun frantwortu now leki mama. Disi kan hebi gi en, a kan weri srefisrefi èn a kan firi brokosaka. Son leisi a kan mandi nanga yu. Ma pruberi fu hori yusrefi. Hori na prakseri taki „a sma di ati no e bron esi betre moro wan tranga man” (Odo 16:32). Pruberi fu frustan fa a e firi èn yepi en te dati de fanowdu.​—Odo 14:29.

SAN YU KAN DU:

• Papa: Yepi yu wefi fu sorgu gi a beibi, èn du dati tu na neti. No gebroiki tumusi furu ten fu du tra sani so taki yu kan abi moro ten gi yu wefi nanga yu beibi

• Mama: Te yu masra wani yepi yu nanga a beibi, dan teki a yepi. Efu a no e du en bun, dan no krutu en, ma sori en fa a musu du en èn du dati na wan switi fasi

SAN BIJBEL E TAKI: „Den o tron wán skin” (Genesis 2:24). Aladi a beibi na wan nyun memre fu a famiri, toku yu no musu frigiti taki yu nanga yu patna na „wán skin” ete. Du ala san yu man fu tan sori lobi gi makandra.

Wefi, de nanga tangi te yu masra e yepi yu. Te yu e taigi en taki yu e warderi a yepi di a e gi, dan dati kan meki a firi bun (Odo 12:18). Masra, taigi yu wefi o furu yu lobi en èn taki yu e warderi en. Prèise en fu di a e sorgu so bun gi na osofamiri.​—Odo 31:10, 28.

„Ibriwan sma no musu tan suku en eigi bun, ma a musu suku a bun fu trawan” (1 Korentesma 10:24). Du ala ten san bun gi yu patna. Yu nanga yu patna musu teki ten fu taki nanga makandra, fu prèise makandra èn fu arki makandra. No denki yusrefi nomo te a abi fu du nanga un sekslibi. Hori na prakseri fa yu patna e firi. Bijbel e taki: „No weigri fu gi makandra san unu abi reti na tapu boiti efu unu ala tu agri fu du dati” (1 Korentesma 7:3-5). Sobun, taki krin nanga makandra fu a tori disi. Te unu abi pasensi èn e frustan fa a trawan e firi, dan unu o lobi makandra moro.

SAN YU KAN DU:

• No frigiti fu meki ten gi un tu wawan

• Du pikinpikin sani fu sori yu patna taki yu lobi en. Fu eksempre, seni wan sms gi en noso gi en wan pikin kado

SAN BIJBEL E TAKI: „Sensi di yu ben de wan beibi, yu kon leri den sani di skrifi na ini den Santa Buku di kan meki yu kon koni, so taki yu kan kisi frulusu” (2 Timoteyus 3:15). Taki nanga makandra fa unu o gi un beibi leri. A beibi man leri sani, srefi fosi a gebore. Te a de na ini en mama bere a kan leri sabi un sten. A fasi fa unu e firi kan abi krakti na tapu en tu. Leisi gi en aladi a de wan beibi ete. Awinsi a no e frustan san yu e leisi, toku dati kan yepi en fu lobi leisi te a kon bigi.

Awinsi fa yu beibi yongu, yu kan taki nanga en fu Gado. Meki a yere te yu e begi Yehovah (Deuteronomium 11:19). Srefi te yu nanga a beibi e prei yu kan taki nanga en fu den sani di Gado meki (Psalm 78:3, 4). Te a pikin e gro kon bigi a o si taki yu lobi Yehovah èn a o leri fu lobi en tu.

SAN YU KAN DU:

• Begi Yehovah fu gi yu koni so taki yu man gi yu beibi leri

• Taki son prenspari wortu ibri leisi baka so taki yu beibi e bigin leri frukufruku kaba