LES 46
Fu san ede yu musu gi yusrefi abra na Yehovah èn fu san ede yu musu dopu?
Fa yu e gi yusrefi abra na Yehovah? Yu e du dati te yu e pramisi en na ini begi taki yu o anbegi en wawan èn taki yu o du a wani fu en (Psalm 40:8). Baka dati yu kan dopu. Te yu e dopu, yu e sori trawan taki yu gi yusrefi abra na Yehovah. Te wan sma e gi ensrefi abra na Yehovah, dan dati na a moro prenspari bosroiti di a o teki. A bosroiti disi o kenki en libi. Yu wani gi yusrefi abra na Yehovah? Fu san ede yu wani du dati?
1. Fu san ede wan sma e gi ensrefi abra na Yehovah?
Wi e gi wisrefi abra na Yehovah fu di wi lobi en (1 Yohanes 4:10, 19). Bijbel e taki dati ’wi musu lobi Yehovah wi Gado nanga wi heri ati, nanga wi heri libi, nanga wi heri frustan, èn nanga ala wi krakti’ (Markus 12:30). Wi no musu taki nomo taki wi lobi Gado, ma wi musu du sani fu sori en taki wi lobi en. Te wan man nanga wan uma lobi makandra, dan den e trow. Na so a de tu taki efu wi lobi Yehovah wi o gi wisrefi abra na en èn wi o dopu.
2. Sortu blesi yu o kisi te yu tron wan dopu Kotoigi?
Te yu dopu, yu e kon na ini a koloku osofamiri fu Yehovah. Yehovah o sori moro lobi gi yu èn yu o tron wan moro bun mati fu en. (Leisi Maleaki 3:16-18.) Yehovah o de leki wan Papa gi yu èn ala den sma di e dini en na heri grontapu o tron yu brada nanga sisa. Den o lobi yu. (Leisi Markus 10:29, 30.) Ma yu musu du wan tu sani fosi yu kan dopu. Yu musu kon sabi Yehovah, yu musu lobi en, yu musu bribi na ini en Manpikin èn yu musu gi yusrefi abra na en. Te yu du den sani disi èn yu dopu, dan yu de na a pasi fu kisi têgo libi. Bijbel e taki: „A dopu e frulusu unu.”—1 Petrus 3:21.
SORTU TRA SANI YU KAN LERI?
Wi o si fu san ede a prenspari fu gi yusrefi abra na Yehovah èn fu dopu.
3. Wi alamala musu bosroiti suma wi o dini
Na ini Israel fu owruten, son sma ben denki taki den ben kan anbegi Yehovah nanga a falsi gado Bâal. Ma Yehovah seni a profeiti Elia fu sori den taki dati no de so. Leisi 1 Kownu 18:21 èn taki fu na aksi disi:
-
Sortu bosroiti den Israelsma ben musu teki?
Neleki den Israelsma wi srefi musu bosroiti suma wi o dini. Leisi Lukas 16:13 èn taki fu den aksi disi:
-
Te wi e dini Yehovah, dan fu san ede wi no kan dini wan tra sma noso wan tra sani tu?
-
Fa wi kan sori Yehovah taki wi bosroiti fu dini en?
4. Prakseri o furu Yehovah lobi yu
Yehovah gi wi furu moi sani. San wi kan gi en? Prei a FELEM.
Fa Yehovah sori taki a lobi yu? Leisi Psalm 104:14, 15 nanga 1 Yohanes 4:9, 10. Baka dati taki fu den aksi disi:
-
Sortu sani di Yehovah gi yu, yu e warderi moro?
-
Fa yu feni en taki Yehovah gi yu ala den sani disi?
Te wi kisi wan kado di wi lobi, dan wi wani sori a sma di gi wi en taki wi e warderi san a du gi wi. Leisi Deuteronomium 16:17 èn taki fu na aksi disi:
-
Te yu e prakseri ala den sani di Yehovah du gi yu, dan san yu wani du gi en?
5. Yu o kisi furu blesi te yu gi yusrefi abra na Yehovah
Furu sma e bribi taki den musu pôpi, taki den musu abi wan bun wroko noso taki den musu abi furu moni fu man de koloku. Ma a sani dati tru? Prei a FELEM èn taki fu den aksi disi:
-
Fu san ede a man na ini a felem stop prei voetbal aladi a ben lobi en?
-
A bosroiti fu gebroiki en libi fu dini Yehovah na presi fu gi ala en ten na voetbal. Yu denki taki a teki wan bun bosroiti? Fu san ede yu e taki dati?
Fosi na apostel Paulus tron wan Kresten a ben kan meki en na ini a grontapu. Paulus ben kisi leri fu wan fu den moro bigi leriman fu a ten dati, di ben leri en den wet fu den Dyu. Ma a libi ala den sani dati na baka fu kan tron wan Kresten. Paulus ben sari taki a ben libi den sani disi na baka? Leisi Filipisma 3:8 èn taki fu den aksi disi:
-
Fu san ede Paulus ben si den sani di a ben du fosi a tron wan Kresten, leki „wan ipi doti”?
-
San a kisi di a tron wan Kresten?
-
Fu san ede a moro bun fu dini Yehovah leki fu du wan tra sani nanga yu libi?
Di Paulus tron wan Kresten a kisi moro leki san a libi na baka
SON SMA E TAKI: „Mi sabi taki disi na waarheid, ma mi no klari ete fu dopu.”
-
Fu san ede yu denki taki a bun fu gi yusrefi abra na Yehovah èn fu dopu?
SAN YU LERI?
Wi e gi wisrefi abra na Yehovah èn wi e dopu fu di wi lobi en.
Fa yu ben o piki den aksi disi?
-
Fu san ede wi musu lobi Yehovah nanga wi heri ati èn fu san ede wi musu dini en?
-
Fa Yehovah e blesi den dopu Kotoigi fu en?
-
Yu wani gi yusrefi abra na Yehovah?
TRA SANI DI YU KAN LUKU
Na ini a felem disi yu o si fu san ede wan singiman nanga wan sportman bosroiti fu gi densrefi abra na Yehovah.
Yongusma e aksi—San mi o du nanga mi libi?—Den bosroiti di mi teki (6:54)
Na ini na artikel disi yu o si tra reide fu san ede a bun fu gi yusrefi abra na Yehovah.
„Fu san ede yu musu gi yusrefi abra na Yehovah?” (A Waktitoren, 15 yanuari 2010)
Na ini a video-clip disi yu o si fa den sma di gi densrefi abra na Yehovah de koloku.
Na ini na artikel di nen „Na omeni yari kaba mi aksi misrefi: ’Fu san ede wi de na grontapu?’” yu kan leisi fu san ede wan uma go sidon denki san musu de a moro prenspari sani na ini en libi.
