LES 6
Sortu howpu de gi den dedewan?
1. San na a bun nyunsu di abi fu du nanga den dedewan?
Di Yesus doro na Betania, krosibei fu Yerusalem, en mati Lasarus ben dede fo dei kaba. Yesus go na a presi pe den ben beri Lasarus. A go makandra nanga Marta nanga Maria, den sisa fu Lasarus. Fosi yu denki, furu sma ben kon drape tu. Prakseri fa Marta nanga Maria ben breiti di Yesus gi Lasarus wan opobaka!—Leisi Yohanes 11:21-24, 38-44.
Marta ben sabi a bun nyunsu kaba di abi fu du nanga den dedewan. A ben sabi taki Yehovah o wiki den dedewan fu libi baka na grontapu.—Leisi Yob 14:14, 15.
2. San e pasa nanga wan sma te a dede?
Gado ben taigi Adam: „Na fu doti yu meki èn na doti yu o tron baka.”—GENESIS 3:19.
Libisma meki fu a doti fu a gron (Genesis 2:7; 3:19). Wi a no yeye di e libi na ini wan libisma skin. Fu di wi na libisma, meki te wi dede, noti fu wi skin e tan na libi. Te wi dede, dan wi edetonton e tapu fu wroko tu èn den prakseri fu wi e lasi gowe. Dati meki, di Lasarus kisi wan opobaka, a no taki noti fu san ben pasa nanga en di a ben dede, fu di den dedewan no sabi notinoti.—Leisi Psalm 146:4; Preikiman 9:5, 6, 10.
A tru taki Gado e pina sma na ini faya, baka te den dede? Fu di Bijbel e sori taki den dedewan no sabi notinoti, meki a de krin taki a leri fu helfaya na wan falsi leri di e gi Gado porinen. A prakseri wawan taki sma e bron na ini faya, na wan tegu sani kaba gi en.—Leisi Yeremia 7:31.
Luku a felem San e pasa nanga den dedewan?
3. Den dedewan kan taki nanga wi?
Den dedewan no man taki noso yere (Psalm 115:17). Ma son engel ogri èn son leisi den e taki nanga sma èn den e du neleki den na dede sma (2 Petrus 2:4). Yehovah no wani taki wi pruberi fu taki nanga den dedewan.—Leisi Deuteronomium 18:10, 11.
4. Suma o kisi wan opobaka?
Milyunmilyun sma di de na ini a grebi, o kisi wan opobaka. Srefi son sma di no ben sabi Gado èn di du ogri, o kisi wan opobaka.—Leisi Lukas 23:43; Tori fu den apostel 24:15.
Den sma di o kisi wan opobaka o abi na okasi fu kon leri sabi den tru tori fu Gado èn den o gi yesi na Yesus fu di den e poti bribi na ini en (Openbaring 20:11-13). Den sma di e kisi libi baka èn di e du bun sani, o man libi fu têgo na grontapu.—Leisi Yohanes 5:28, 29.
5. San na opobaka e leri wi fu Yehovah?
Gado seni en Manpikin kon fu dede gi wi, so taki howpu kan de gi den dedewan. Sobun, na opobaka e sori wi a lobi nanga a bun-ati fu Yehovah. Te den dedewan kisi libi baka, dan suma yu o wani si?—Leisi Yohanes 3:16; Romesma 6:23.
