A LASTI buku fu Bijbel, di nen Openbaring, e gi ala libisma howpu. Na apostel Yohanes skrifi a buku disi di abi fisyun na ini. Soleki fa den fisyun e sori, dan te fu kaba ala den sani di Yehovah abi na prakseri o kon tru.

Na ini a fosi fisyun, Yesus di kisi wan opobaka, e prèise wan tu gemeente èn a e piri-ai gi den. Na ini a tra fisyun, a kownusturu fu Gado de fu si na ini hemel, èn drape yeye libisani e prèise en.

Na a srefi ten te den sani di Gado abi na prakseri e kon tru, a Pikin Skapu, noso Yesus Krestes, e kisi wan bukulolo nanga seibi lakstampu. Te den fosi fo lakstampu e opo, dan sma di e sidon na tapu asi e kon de fu si. A fosi sma na Yesus di de na tapu wan weti asi, èn a weri wan kownu-ati fu di en na Kownu. Baka dati, sma e kon na tapu asi di abi difrenti kloru. Den sani disi e prenki feti, angriten, nanga siki. Ala den sani disi na profeititori di e kon tru na ini den lasti dei fu a grontapu sistema disi. Te a di fu seibi lakstampu e opo, dan engel e bro seibi trompeti. Disi e prenki a meki di sma e meki den krutuboskopu fu Gado bekènti. Te fu kaba den sani disi e meki taki seibi rampu pasa, di e prenki na atibron fu Gado.

Wan manpikin e gebore, èn dati e prenki Gado Kownukondre di seti na ini hemel. Wan feti e bigin, èn den e trowe Satan nanga den ogri yeye fu en kon na grontapu. Wan tranga sten e taki: „Helu fu grontapu.” Didibri abi bigi atibron fu di a sabi taki en ten syatu.—Openbaring 12:12.

Yohanes e si Yesus na ini hemel leki wan pikin skapu, èn makandra nanga en 144.000 sma de di teki puru na mindri libisma na grontapu. Den sma disi „o tiri leki kownu makandra nanga” Yesus. Na so fasi, Openbaring e tyari kon na krin taki den tra pikin fu na „uma” di kari na ini Genesis 3:15, na 144.000 sma.—Openbaring 14:1; 20:6.

Den tiriman fu grontapu e kon makandra na Armagedon, fu feti „a feti na tapu a bigi dei fu Gado na Almaktiwan”. Den e feti nanga a sma di e sidon na tapu a weti asi. A sma disi na Yesus di e tyari den hemel legre. Ala den tiriman fu a grontapu disi e kisi pori. Den e tai Satan, èn Yesus, makandra nanga den 144.000 e tiri grontapu „dusun yari langa”. Na a kaba fu den dusun yari dati, Satan e kisi pori.—Openbaring 16:14; 20:4.

San a Dusun Yari Tiri fu Krestes nanga den tra tiriman wani taki gi libisma di e gi yesi? Yohanes e skrifi: „[Yehovah] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe” (Openbaring 21:4). Grontapu e tron wan paradijs!

Sobun, a buku Openbaring na a lasti pisi fu a boskopu fu Bijbel. Nanga yepi fu a Mesias Kownukondre, Yehovah en nen e kon santa èn a de krin taki na en abi a reti fu tiri fu ala ten!

—Den tori disi teki puru fu a buku Openbaring.