Kapitel Neigi

Suma Sa Tiri Grontapu?

1-3. Fruteri fu a dren nanga den fisyun di Danièl ben kisi na ini a fosi yari fu a tiri fu Bèlsasar.

NOW a span profeititori fu Danièl e tyari wi go baka na a fosi yari fu Kownu Bèlsasar fu Babilon. Danièl de wan katiboman na Babilon wan langa pisi ten kaba, ma noiti a degedege ini en soifri retifasi na Yehovah. Now di a getrow profeiti pasa 70 yari, a e kisi „wan dren èn den fisyun fu en ede, na tapu en bedi”. ¡Èn den fisyun dati ben meki a kon frede!​—Danièl 7:1, 15.

² „¡Èn luku!”, Danièl e bari taki. „Den fo winti fu hemel ben meki a bigi se de leki wan krasi se. Èn fo bigi meti ben opo kon fu a se, ibriwan fu den ben difrenti fu den trawan.” ¡Den meti disi ben de aparti srefisrefi! A fosiwan na wan lew di abi frei, èn a di fu tu meti de leki wan beer. ¡Baka dati wan penitigri e kon di abi fo frei nanga fo ede! A di fu fo meti di tranga na wan aparti fasi, abi bigi isri tifi nanga tin tutu. Na mindri den tin tutu fu en, wan ’pikin’ tutu e opo kon di abi „ai leki den ai fu wan libisma” nanga „wan mofo . . . di ben taki bigi sani”.​—Danièl 7:2-8.

³ Baka dati den fisyun fu Danièl e poti wi prakseri na hemel. A Graniwan ini Dei e sidon nanga glori na tapu en kownusturu leki Krutuman na a Krutu na ini hemel. ’Èn dusun tron dusun de di e tan dini en, èn tin dusun tron tin dusun di e tan tanapu leti na en fesi.’ Te A e gi den meti wan takru krutu, dan A e teki a tirimakti puru fu den èn e pori a di fu fo meti. „Wan sma di ben gersi wan manpikin fu libisma” ben kisi a reti fu tiri „den pipel, nationaal grupu nanga tongo” fu têgo.​—Danièl 7:9-14.

4. (a) Na suma Danièl ben go fu kisi bodoi di a ben kan frutrow? (b) Fu san ede a sani di Danièl ben si èn ben yere na a neti dati, prenspari gi wi?

 ⁴ „Fu mi sei,” Danièl e taki, „a yeye fu mi ben kon bruya na ini mi fu a sani disi ede, èn den fisyun fu mi ede srefi ben bigin meki mi kon frede.” So bun, na wan engel a e suku „bodoi di [a] ben kan frutrow ini a tori fu ala den sani disi”. Na engel e fruteri en fu tru „san den tori wani taki” (Danièl 7:15-28). A sani di Danièl ben si èn ben yere a neti dati de tumusi prenspari gi wi, bika a e taki fu sani di ben o feni presi na grontapu na ini a ten di ben o kon te doro a ten fu wi, te „wan sma di ben gersi wan manpikin fu libisma” e kisi tirimakti na tapu ala „den pipel, nationaal grupu nanga tongo”. Nanga a yepi fu a Wortu nanga a yeye fu Gado, wi kan frustan tu san den fisyun disi di abi profeititori na ini, wani taki. *

FO METI E OPO KON FU A SE

5. San a se di winti ben seki, e prenki?

⁵ „Fo bigi meti ben opo kon fu a se”, Danièl ben taki (Danièl 7:3). San a se di winti ben seki, e prenki? Furu yari baka dati, na apostel Yohanes ben si wan werdri meti di ben abi seibi ede, e opo kon fu a „se”. A se dati ben prenki „pipel nanga ipi-ipi sma nanga nâsi nanga tongo” — a bigi pisi fu a libisma famiri di de fara fu Gado. Fu dati ede a se na wan yoisti prenki fu den ipi-ipi sma fu a libisma famiri di no de krosibei fu Gado.​—Openbaring 13:1, 2; 17:15; Yesaya 57:20.

6. San den fo meti e prenki?

⁶ „Èn den fo bigi meti disi,” na engel fu Gado ben taki, „bika den de fo: fo kownu de di sa opo kon fu grontapu” (Danièl 7:17). A de krin taki na engel ben taki dati den fo meti di Danièl ben si, ben de „fo kownu”. So bun, den meti disi wani taki grontapumakti. Ma sortu grontapumakti?

7. (a) San wan tu sma di e fruklari Bijbel e taki fu a fisyun fu den fo meti di Danièl ben kisi na ini wan dren èn fu a dren fu Kownu Nebukadnesar fu wan bun bigi popki? (b) San ibriwan fu den fo pisi fu gowtu, solfru, kopro nanga isri fu a popki e prenki?

 ⁷ Sma di e fruklari Bijbel, furutron e meki a fisyun fu a dren fu Danièl fu den fo meti kruderi nanga a dren fu Nebukadnesar fu wan bun bigi popki. Fu eksempre, The Expositor’s Bible Commentary e taki: „Kapitel 7 [fu Danièl] e kruderi nanga kapitel 2.” The Wycliffe Bible Commentary e taki: „Sma na ala sei e agri taki a kon di fo heiden tirimakti ben kon a wan baka a trawan . . . de a srefi dyaso [na ini Danièl kapitel 7] leki den wan di wi ben luku na ini [Danièl] kapitel 2.” Den fo grontapumakti di den fo metaal na ini a dren fu Nebukadnesar ben prenki, ben de a Gran Kownukondre Babilon (gowtu ede), Medo-Persia (solfru borsu nanga anu), Grikikondre (kopro bere nanga bowtu) nanga a Gran Kownukondre Rome (isri futu) * (Danièl 2:32, 33). Meki wi go luku fa den kownukondre disi e kruderi nanga den fo bigi meti di Danièl ben si.

KRASI LEKI WAN LEW, GAW LEKI WAN AKA

8. (a) San Danièl ben taki fu a fosi meti? (b) Sortu gran kownukondre a fosi meti ben prenki, èn fa a ben handri leki wan lew?

⁸ ¡Danièl ben si meti di ben naki en ati srefisrefi! Di a ben taki fu wán fu den, a ben taki: „A fosiwan ben gersi wan lew, èn a ben abi den frei fu wan aka. Mi ben tan luku te leki den ben hari den frei fu en puru, èn den ben opo en fu grontapu èn den ben meki a tanapu na tapu tu futu neleki wan libisma, èn a ben kisi na ati fu wan libisma” (Danièl 7:⁠4). A meti disi ben prenki a srefi tirimakti leki a wan di na ede fu gowtu fu a bun bigi popki ben prenki, a Grontapumakti Babilon (607 te nanga 539 b.G.T.). Leki wan krasi „lew” di e angri fu kiri, na so Babilon ben swari nâsi na wan ogri-ati fasi, so srefi a pipel fu Gado (Yeremia 4:5-7; 50:17). Neleki nanga den frei fu wan aka, na so a „lew” disi ben hasti  ensrefi go na fesi fu feti èn teki kondre abra.​—Kragisingi 4:19; Habakuk 1:6-8.

9. Sortu kenki a meti di ben gersi wan lew ben ondrofeni, èn sortu krakti den kenki disi ben abi tapu en?

⁹ Baka ten den ben „hari den frei . . . puru” fu na aparti lew di ben abi frei. Krosibei na a kaba fu a tiri fu Kownu Bèlsasar, Babilon no ben de so gaw moro fu teki kondre abra èn a no ben abi a krakti moro leki wan lew fu tiri den nâsi. A no ben de moro gaw leki wan libisma na tapu tu futu. Fu di a ben kisi „na ati fu wan libisma”, meki a ben kon swaki. Fu di Babilon no ben abi „na ati fu a lew”, meki a no ben kan du leki wan kownu moro „na mindri den meti fu wan busi”. (Teki gersi 2 Samuèl 17:10; Mika 5:8.) Wan tra bigi meti ben wini en.

GRIDI LEKI WAN BEER

10. Sortu lin fu tiriman a „beer” ben prenki?

¹⁰ „¡Èn luku!”, Danièl ben taki, „wan tra meti, wan di fu tu, di ben gersi wan beer. Èn den ben meki a opo tanapu na wán sei, èn dri lebriki ben de na ini en mofo na mindri den tifi fu en; èn disi na san den ben taigi en: ’Opo, nyan furu meti’ ” (Danièl 7:5). A kownu di a „beer” ben prenki, ben de a srefi kownu di a solfru borsu nanga anu fu a bun bigi popki ben prenki — a lin fu tiriman fu Medo-Persia (539 te nanga 331 b.G.T.) di ben bigin nanga Darius a Mediasma nanga Sirus a Bigiwan èn di ben kon na wan kaba nanga Darius III.

11. San a ben wani taki dati na agersi beer opo tanapu na wán sei èn taki a abi dri lebriki na ini en mofo?

 ¹¹ Den ben meki na agersi beer „opo tanapu na wán sei”, kande so taki a ben kan de klariklari fu bigin feti èn fu poti nâsi na en ondro èn na so fasi tan abi makti na grontapu. Noso na opo disi di den ben meki a opo tanapu ben kan abi leki marki fu sori taki a lin fu tiriman fu Persia ben sa kisi moro makti leki a wan-enkri kownu fu Media, Darius. Den dri lebriki na mindri den tifi fu a beer ben kan sori go na den dri sei pe a ben pusu go fu teki kondre abra. A „beer” di agersi Medo-Persia, ben go na noordsei fu teki Babilon abra na ini 539 b.G.T. Baka dati a ben go na westsei pasa na ini Pikin Asia èn go na ini Trasia. Te fu kaba a „beer” ben go na zuidsei fu teki Egipti abra. Fu di sontron a nomru dri e prenki a krakti di poti na tapu wan sani, meki den dri lebriki kande e poti krakti tu na tapu a gridi di na agersi beer gridi fu teki kondre abra.

12. San ben de a bakapisi di na agersi beer ben gi yesi na a komando: „Opo, nyan furu meti”?

¹² A „beer” ben bigin feti nanga nâsi leki wan bakapisi fu den wortu: „Opo, nyan furu meti.” Fu di Medo-Persia ben swari Babilon akruderi a wani fu Gado, dan den ben de na ini wan posisi fu du wan warti wroko gi a pipel fu Yehovah. ¡Èn den ben du dati! (Luku „Wan kownu di e frudrage sani”, na tapu bladzijde 149.) Nanga yepi fu Sirus a Bigiwan, Darius I (Darius a Bigiwan) nanga Artakserkses I, Medo-Persia ben  fri den Dyu katiboman fu Babilon èn ben yepi den fu bow a tempel fu Yehovah baka èn fu meki den skotu fu Yerusalem kon bun baka. Baka ten, Medo-Persia ben kon tiri 127 distrikt, èn a masra fu koningin Ester, Ahasferos (Serkses I), ben de „kownu fu India te go miti Etiopia” (Ester 1:1). Ma wan tra meti ben de na pasi e opo kon.

¡GAW LEKI WAN PENITIGRI DI ABI FREI!

13. (a) San a di fu dri meti ben prenki? (b) San wi kan taki fu a gawfasi fu a di fu dri meti nanga a kontren di a ben abi na ondro en makti?

¹³ A di fu dri meti ben „gersi wan penitigri, ma na tapu en baka a ben abi fo frei fu wan kriaturu di e frei. Èn a meti ben abi fo ede, èn a ben kisi tirimakti trutru” (Danièl 7:6). Neleki a sani di gersi en — a kopro bere nanga bowtu fu a popki na ini a dren fu Nebukadnesar — na so a penitigri disi di abi fo frei nanga fo ede ben prenki a lin fu tiriman fu Masedonia noso Grikikondre di ben bigin nanga Aleksander a Bigiwan. Neleki a lususkin èn a gawfasi fu wan penitigri, Aleksander ben pasa na ini Pikin Asia go na zuidsei na ini Egipti èn ben go na a westsei grens fu India. (Teki gersi Habakuk 1:⁠8.) A kontren fu en ben bigi moro di fu a „beer”, bika a ben abi Masedonia, Grikikondre nanga a Gran Kownukondre Persia na ini.​—Luku „Wan Yongu Kownu E Teki Grontapu Abra”, na tapu bladzijde 153.

14. Fa a „penitigri” ben kon abi fo ede?

¹⁴ A „penitigri” ben kon kisi fo ede baka di Aleksander dede na ini 323 b.G.T. Te fu kaba fo fu den legre-edeman fu  en ben kon na ini en presi na ini difrenti pisi fu a kontren fu en. Seleikos ben teki Mesopotamia nanga Siria. Ptolemeus ben abi makti tapu Egipti nanga Palestina. Lisimakus ben tiri Pikin Asia nanga Trasia èn Kasander ben kisi Masedonia nanga Grikikondre. (Luku „Wan Kefalek Bigi Kownukondre E Prati”, na tapu bladzijde 162.) Baka dati wan tra kefar ben opo kon.

WAN METI DI BEN GI FU FREDE E SORI TAKI A DE TRA FASI

15. (a) Taki fu a di fu fo meti. (b) San a di fu fo meti ben prenki, èn fa a ben masi èn ben swari ala sani di ben de na tapu en pasi?

¹⁵ Danièl ben taki fu a di fu fo meti leki wan meti „di ben gi fu frede èn di ben ogri èn tranga na wan aparti fasi”. A ben taki moro fara: „Èn a ben abi isri tifi, bigiwan. A ben swari èn ben masi sani, èn san ben tan abra a ben masi na ondro en futu. Èn a ben difrenti fu ala den tra meti di ben de fosi en, èn a ben abi tin tutu” (Danièl 7:7). A meti disi di ben gi fu frede ben bigin leki a makti di Rome ben abi tapu a kontren fu politiek èn tapu a kontren fu srudati afersi. Safrisafri a ben teki den fo Griki pisi fu a Gran Kownukondre Grikikondre abra, èn na ini a yari 30 b.G.T. Rome ben opo kon leki a tra grontapumakti na ini a profeititori fu Bijbel. Ala sani di ben de na tapu en pasi a ben poti na en ondro nanga yepi fu en legre èn te fu kaba a Gran Kownukondre Rome ben kon moro bigi taki a ben abi wan kontren di ben bigin na den èilanti fu Ingrisikondre te go pasa a moro bigi pisi fu Europa, te na a kontren lontu a Mindrikondre Se èn pasa Babilon te na a Golf fu Persia.

16. Sortu bodoi na engel ben gi fu a di fu fo meti?

¹⁶ Fu di Danièl ben wani de seiker san a meti disi di „ben gi fu frede trutru” wani taki, meki a ben arki nanga ala en prakseri di na engel ben fruklari: „Ini a tori fu den tin tutu [fu en], fu a kownukondre dati tin kownu de di sa opo kon; èn baka den ete wan trawan sa opo kon, èn ensrefi sa de tra  fasi leki den fosiwan, èn a sa lagi dri kownu” (Danièl 7:19, 20, 24). San ben de den „tin tutu” noso „tin kownu” disi?

17. San den „tin tutu” fu a di fu fo meti e prenki?

¹⁷ Di Rome ben kon moro gudu èn ben kon pori moro nanga moro fu a lusu fasi fu libi fu den sma di ben e tiri en, dan a ben go na baka leki wan srudatimakti. Baka wan pisi ten, a go di a krakti fu a legre fu Rome ben go na baka, ben kon de krin fu si. Te fu kaba a tranga gran kownukondre ben prati na ini furu kownukondre. Fu di furutron Bijbel e gebroiki a nomru tin fu sori go na wan sani di no e mankeri noti, dan den „tin tutu” fu a di fu fo meti e prenki ala den kownukondre di ben opo kon leki wan bakapisi fu a prati di Rome ben kon prati.​—Teki gersi Deuteronomium 4:13; Lukas 15:8; 19:13, 16, 17.

18. Fa Rome ben tan abi makti na tapu Europa furu yarihondro langa, baka di den ben puru a lasti kèiser fu en?

¹⁸ Ma a Grontapumakti Rome no ben kon na wan kaba nanga a puru di den ben puru a lasti kèiser fu Rome na ini 476 G.T. Furu yarihondro langa, Rome di ben de na ondro a paus, ben tan abi makti tapu Europa tapu a kontren fu politiek èn tapu a kontren fu relisi. Rome ben du disi nanga yepi fu a yuru-gron sistema, wan sistema pe furu sma di ben e libi na Europa, ben de na ondro wan granmasra na presi fu wan kownu. Èn ala den kownu ben e erken a makti fu a paus. So bun, a Santa Gran Kownukondre Rome, nanga Rome, di ben de na ondro a paus, leki a moro prenspari presi, ben tiri grontapu afersi na ini a heri langa pisi ten dati na ini a historia di den kari den dungru Mindri-Yarihondro.

19. Fa wan historia skrifiman ben teki Rome gersi den gran kownukondre di ben de na en fesi?

¹⁹ Suma kan taki dati a di fu fo meti no ben de „tra fasi leki ala den tra kownukondre”? (Danièl 7:7, 19, 23) Ini a tori disi, historia skrifiman H. G. Wells ben skrifi: „A nyun makti disi fu Rome . . . ben de tapu difrenti kontren tra fasi leki iniwan fu den bigi gran kownukondre di te na a ten dati ben teki wan prenspari posisi na ini a libimakandra fu grontapu. . . .  [A] ben tyari pikinmoro ala den Grikisma fu grontapu kon na wan, èn moro leki iniwan gran kownukondre na en fesi, a pipel fu en no ben abi so furu bakapikin di ben de fu Kam nanga Sèm . . . Te na a momenti dati a ben de wan nyun fasi na ini a historia . . . A Gran Kownukondre Rome ben e gro, wan gro di sma no ben fruwakti èn di ben nyun; den sma fu Rome ben kon kisi fu du, pikinmoro sondro taki den ben sabi dati, nanga wan nyun sani: a tiri fu wan bigi kontren.” Ma toku a di fu fo meti ben abi fu gro moro.

WAN PIKIN TUTU E KISI MAKTI

20. San na engel ben taki fu na opo di a pikin tutu na tapu na ede fu a di fu fo meti ben opo kon?

²⁰ „Mi ben tan poti prakseri na tapu den tutu,” Danièl ben taki, „¡èn luku! wan tra tutu, wan pikinwan, ben opo kon na den mindri, èn dri fu den fosi tutu ben de di den ben hari puru na en fesi” (Danièl 7:8). Fu a tutu disi di ben opo kon, na engel ben taigi Danièl: „Baka den [den tin  kownu] . . . wan trawan sa opo kon, èn ensrefi sa de tra fasi leki den fosiwan, èn a sa lagi dri kownu” (Danièl 7:24). Suma na a kownu disi, o ten a ben opo kon èn sortu dri kownu a ben lagi?

21. Fa Ingrisikondre ben kon tron na agersi pikin tutu fu a di fu fo meti?

²¹ Luku den sani disi di e kon now èn di ben feni presi. Na ini 55 b.G.T., Legre-edeman Yulius Caesar fu Rome ben go nanga tranga na ini Ingrisikondre, ma a no ben man seti wan fasti presi na ini. Na ini 43 G.T., Kèiser Klaudius ben bigin fu teki kontren abra na a zuidsei fu Ingrisikondre di a ben tan hori. Baka dati na ini 122 G.T., Kèiser Hadrianus ben bigin bow wan skotu fu a Tyneliba te na a Solway Firth fu marki a noordsei grens fu a Gran Kownukondre Rome. Na ini a bigin fu a di fu feifi yarihondro, den legre fu Rome ben gowe libi na èilanti. „Na ini a di fu tinasiksi yarihondro”, na so wan historia skrifiman ben fruklari, „Ingrisikondre ben de wan tirimakti di no ben de so tranga. A gudu fu en no ben furu te yu ben teki dati gersi di fu Bakrakondre. A ben abi moro mendri sma leki Fransikondre. A srudatimakti fu en (so srefi a legre fu en na tapu se) no ben de so tranga leki di fu Spanyorokondre.” Soleki fa a sori, dan na a ten dati Ingrisikondre ben de wan kownukondre di no ben de prenspari èn ben de na agersi pikin tutu fu a di fu fo meti. Ma dati ben o kenki.

22. (a) Sortu tra dri tutu fu a di fu fo meti a „pikin” tutu ben wini? (b) Leki san Ingrisikondre ben opo kon baka dati?

²² Na ini 1588, Filipus II fu Spanyorokondre ben seni a Spanyoro Armada fu go feti nanga Ingrisikondre. A grupu fetisipi disi fu 130 fetiboto ben tyari moro leki 24.000 man, èn ben seiri go na a Ingrisi Kanari soso fu go lasi wan feti nanga a legre na se fu Ingrisikondre èn den ben kisi fu du nanga kontrari winti nanga tranga bigi winti fu na Atlantis Se. A sani disi di ben pasa „ben sori sondro degedege taki a makti di den srudati fu Spanyorokondre ben abi  na se ben abra go na Ingrisikondre”, wan historia skrifiman ben taki. Na ini a di fu tinaseibi yarihondro, Bakrakondre ben meki den moro bigi bisnisboto fu grontapu. Ma fu di moro nanga moro kondre ben tron kolonie fu Ingrisikondre, dan Ingrisikondre ben kon bigi moro leki a kownukondre dati. Na ini a di fu tina-aiti yarihondro den Ingrisiman nanga den Fransiman ben feti nanga makandra na Noord-Amerika nanga India èn disi ben meki a Vrede-Kruderi fu Parijs kon na ini 1763. A vrede-kruderi disi, na so skrifiman William B. Willcox ben taki, „ben erken a nyun posisi fu Ingrisikondre leki a moro prenspari tirimakti fu Europa na ini den kondre dorosei fu Europa”. A wini di den Ingrisiman ben wini Napoleon fu Fransikondre krinkrin na ini 1815 G.T. ben sori taki Ingrisikondre ben de a moro bigi tirimakti. Den „dri kownu” di Ingrisikondre ben „lagi” na a fasi dati, ben de Spanyorokondre, Bakrakondre nanga Fransikondre (Danièl 7:24). Leki wan bakapisi fu dati, Ingrisikondre ben opo kon leki a moro prenspari tirimakti na grontapu di abi moro kolonie èn di abi a moro bigi bisnismakti. ¡Iya, a „pikin” tutu ben gro kon tron wan grontapumakti!

23. Na sortu fasi na agersi pikin tutu ben „swari heri grontapu”?

²³ Na engel ben taigi Danièl taki a di fu fo meti noso a di fu fo kownukondre ben sa „swari heri grontapu” (Danièl 7:23). Disi ben sori fu de tru gi a distrikt fu Rome di sma ben sabi  wan ten leki Britania. Te fu kaba a ben kon tron a Gran Kownukondre Ingrisikondre èn ’ben swari heri grontapu’. Wan ten ben de srefi taki a gran kownukondre disi ben abi wan di fu fo pisi fu a gron na grontapu èn wan di fu fo fu den sma na grontapu.

24. San wan historia skrifiman ben taki fu a de di a Gran Kownukondre Ingrisikondre de tra fasi?

²⁴ Soleki fa a Gran Kownukondre Rome ben de tra fasi leki tra grontapumakti di ben de na en fesi, na so a kownu di den ben prenki nanga a „pikin” tutu ben sa de „tra fasi leki den fosiwan” tu (Danièl 7:24). Fu a Gran Kownukondre Ingrisikondre a historia skrifiman H. G. Wells ben taki: „Noiti so wan sani ben de fosi. A fosi èn moro prenspari sani na a heri seti ben de a ’republiek na ondro wan kownu tiri’ fu den Verenigde Kownukondre fu Ingrisikondre . . . No wan tiri èn no wan sma oiti ben frustan na idea fu a Gran Kownukondre Ingrisikondre finifini leki wan grupu. A ben de wan moksisani fu sani di ben feni presi safrisafri èn di ben de tra fasi krinkrin fu iniwan sani di sma ben kari wan gran kownukondre oiti bifo.”

25. (a) San na a agersi pikin tutu akruderi a fasi fa sani ben waka baka ten? (b) Na sortu fasi a „pikin” tutu abi „ai leki den ai fu wan libisma” èn ’wan mofo di taki bigi sani’?

²⁵ Moro sani ben de gi a „pikin” tutu leki a Gran Kownukondre Ingrisikondre. Na ini 1783, Ingrisikondre ben erken a srefidensi fu 13 fu den Amerkan kolonie. Te fu kaba Amerkankondre ben kon tron a patna fu Ingrisikondre èn ben opo kon fu a di fu Tu Grontapufeti leki a moro prenspari nâsi na grontapu. Te nanga now den abi wan tranga banti nanga Ingrisikondre. A tu-pisi Anglo-Amerkan grontapumakti di ben kon leki a bakapisi fu dati, de a ’tutu di abi ai’. ¡Fu tru, a grontapumakti disi e hori sani bun na ai èn a srapu! A e „taki bigi sani”, e bepaal a politiek gi a moro bigi pisi fu grontapu èn e handri leki a takiman fu grontapu noso „falsi profeiti”.​—Danièl 7:8, 11, 20; Openbaring 16:13; 19:20.

 A PIKIN TUTU E KAKAFUTU GI GADO NANGA DEN SANTAWAN FU EN

26. San na engel ben taki na fesi fu den sani di na agersi tutu ben taigi Yehovah nanga den futuboi fu en èn fu den sani di a ben du nanga den?

²⁶ Danièl ben go doro fu taki fu a fisyun fu en, taki: „Mi ben tan luku di a srefi tutu dati ben feti nanga den santawan, èn a ben wini den” (Danièl 7:21). Fu a „tutu” disi noso kownu, na engel fu Gado ben taki na fesi: „A sa taki wortu srefi teige a Moro Heiwan, èn den santawan srefi fu a Moro Heiwan a sa trobi doronomo. Èn a sa pruberi fu kenki ten nanga wet, èn a sa kisi den na ini en anu wan ten nanga ten nanga wan afu ten” (Danièl 7:25). Fa èn o ten a pisi disi fu a profeititori ben kon tru?

27. (a) Suma na „den santawan” di a „pikin” tutu ben frufolgu? (b) Fa na agersi tutu ben pruberi „fu kenki ten nanga wet”?

²⁷ „Den santawan” di a „pikin” tutu — na Anglo-Amerkan Grontapumakti — ben frufolgu, na den bakaman fu Yesus na grontapu di kisi salfu nanga santa yeye (Romesma 1:7; 1 Petrus 2:9). Furu yari bifo a Fosi Grontapufeti, a fikapisi fu den salfuwan disi ben warskow na publiki taki a kaba fu „den fasti ten fu den nâsi” ben sa kon na ini 1914 (Lukas 21:24). Di feti ben broko na ini a yari dati, dan a ben de krin fu si taki a „pikin” tutu no ben arki a warskow disi, bika a ben go doro fu trobi den salfu „santawan”. Na Anglo-Amerkan Grontapumakti ben kakafutu srefi gi den muiti di den santawan ben e meki fu du san Yehovah e aksi (noso En „wet”), taki den kotoigi fu en musu preiki a bun nyunsu fu a Kownukondre na heri grontapu (Mateus 24:14). Na so fasi a „pikin” tutu ben pruberi fu „kenki ten nanga wet”.

28. O langa a „ten nanga ten nanga wan afu ten” de?

²⁸ Na engel fu Yehovah ben sori go na wan profeiti pisi ten fu „wan ten nanga ten nanga wan afu ten”. O langa dati de? Sma di e fruklari Bijbel, moro furu e agri taki den wortu disi wani taki dri nanga wan afu ten — te yu teri wán ten, tu ten nanga wan afu ten. Fu di den „seibi ten” fu a lawman-siki fu Nebukadnesar ben de a srefi leki seibi yari, dan den dri nanga  wan afu ten na dri nanga wan afu yari * (Danièl 4:16, 25). An American Translation e taki: „Den sa gi den abra na en fu wán yari, tu yari nanga wan afu yari.” A vertaling fu James Moffatt e taki: „Fu dri yari nanga wan afu yari.” A srefi pisi ten kari na ini Openbaring 11:2-7, di e taki dati den kotoigi fu Gado ben sa preiki, ala di den weri saka, 42 mun noso 1260 dei langa èn baka dati den ben o kiri den. O ten a pisi ten disi ben bigin èn o ten a ben kon na wan kaba?

29. O ten èn fa den profeiti dri nanga wan afu yari ben bigin?

²⁹ A Fosi Grontapufeti ben wani taki wan ten fu tesi gi den salfu Kresten. Na a kaba fu 1914 den ben e fruwakti frufolgu. Fu taki en leti, a yaritekst di den ben teki gi a yari 1915 ben de na aksi di Yesus ben poti gi den disipel fu en: „¿Unu man dringi fu a beker fu mi?” A ben abi en gron tapu Mateus 20:22, King James Version. Fu dati ede sensi december 1914, a pikin grupu dati fu kotoigi ben preiki ini „saka”.

30. Fa na Anglo-Amerkan Grontapumakti ben trobi salfu Kresten na a ten fu a Fosi Grontapufeti?

³⁰ Di a feti ben kon moro faya, dan den salfu Kresten ben kisi moro nanga moro gens. Son wan fu den, den ben poti na ini dungru-oso. Ogri-ati tirimakti ben gi sma, soleki Frank Platt na ini Ingrisikondre nanga Robert Clegg na ini Kanada, hebi skin-ati. Twarfu februari 1918 a pisi kontren na ini Kanada di ben de na ondro Ingrisikondre ben tapu a prati fu a di fu seibi pisi fu Studies in the Scriptures, di ben nen The Finished Mystery èn di no so langa pasa ben kon na doro, èn so srefi den traktaat di ben nen The Bible Students Monthly. A mun na baka, na Amerkan Ministeria fu Yustisi ben fruklari taki a prati di den ben prati a di fu seibi pisi no de akruderi wet. San ben de a bakapisi? ¡We, den ben ondrosuku den oso, den ben teki lektuur èn den ben sroto den anbegiman fu Yehovah!

31. O ten èn fa a „ten nanga ten nanga wan afu ten” ben kon na wan kaba?

³¹ A trobi di den ben trobi den salfuwan fu Gado ben doro  en heimarki 21 yuni 1918 di a presidenti, J. F. Rutherford, nanga prenspari memre fu a Watch Tower Bible and Tract Society ben kisi langa strafu na ini dungru-oso tapu a gron fu falsi kragi. Fu di a „pikin” tutu ben pruberi „fu kenki ten nanga wet”, dan nanga bun bakapisi a ben tapu a preikiwroko di ben orga (Openbaring 11:7). So bun, a pisi ten fu „wan ten nanga ten nanga wan afu ten” di den ben taki na fesi fu dati, ben kon na wan kaba na ini yuni 1918.

32. Fu san ede yu ben sa taki dati a „pikin” tutu no ben wai „den santawan” puru?

³² Ma a trobi di a „pikin” tutu ben trobi „den santawan” no ben wai den puru. Soleki fa a buku Openbaring ben taki na fesi, dan baka wan syatu pisi ten di den salfu Kresten no ben wroko, den ben kon na libi baka èn ben bigin du a preikiwroko baka (Openbaring 11:11-13). A presidenti fu a Watch Tower Bible and Tract Society nanga den kompe fu en ben komoto na ini dungru-oso tapu 26 maart 1919 èn baka ten den ben krin den nen fu den falsi kragi di ben gebroiki teige den. Wantewante baka dati, a salfu fikapisi ben bigin orga densrefi baka fu go doro nanga a wroko. Ma san ben o pasa nanga a „pikin” tutu?

A GRANIWAN INI DEI E HORI KRUTU

33. (a) Suma na a Graniwan ini Dei? (b) San ben de den „buku . . . di den ben opo” na ini a Krutu na hemel?

³³ Baka di Danièl ben taki fu den fo meti, dan a e puru en ai fu a di fu fo meti poti go na wan sani di e feni presi na ini hemel. A e si taki a Graniwan ini Dei sidon leki Krutuman na tapu en kownusturu di e brenki srefisrefi. A Graniwan ini Dei na no wan sma moro leki Yehovah Gado (Psalm 90:2). Te a Krutu na hemel e teki presi, dan Danièl e si taki ’den e opo buku’ (Danièl 7:9, 10). Fu di Yehovah ben de kaba na ini a ten di pasa èn di no skotu, meki a sabi a heri historia fu libisma neleki a ben skrifi na ini wan buku. A luku ala den fo agersi meti èn a kan krutu den akruderi a sabi di ensrefi abi fu den.

34, 35. San o pasa nanga a „pikin” tutu nanga den tra tirimakti di den e agersi nanga meti?

 ³⁴ Danièl e go doro: „Na a ten dati, mi ben tan luku fu a babari ede fu den bigi wortu di a tutu ben e taki; mi ben tan luku te leki den ben kiri a meti èn en skin ben kisi pori èn den ben gi en abra na a tranga faya. Ma ini a tori fu den tra meti, den ben puru a tirimakti fu den, èn den ben kisi moro ten fu libi fu wan ten nanga wan pisi ten” (Danièl 7:11, 12). Na engel e fruteri Danièl: „A Krutu srefi ben go sidon, èn te fu kaba den ben puru en eigi tirimakti, fu kan wai en puru èn fu kan pori en dorodoro.”​—Danièl 7:26.

³⁵ Akruderi a komando fu a Bigi Krutuman, Yehovah Gado, dan a tutu di ben taki fu Gado sondro lespeki èn ben trobi den „santawan” fu en, sa ondrofeni a srefi sani di a Gran Kownukondre Rome ben ondrofeni, di ben frufolgu den fositen Kresten. A tirimakti fu en no sa tan. Èn a tirimakti fu a „kownu” di den e agersi nanga tutu èn di no de so tranga èn di ben opo kon fu a Gran Kownukondre Rome, no sa tan tu. Ma fa a de nanga den tirimakti di ben kon fu den tirimakti di ben de na fesi èn di den ben agersi nanga meti? Soleki fa ben taki na fesi kaba, dan den ben kisi moro ten fu libi „fu wan ten nanga wan pisi ten”. Den kontren fu den tan abi sma di e libi na ini te na ini a ten fu wi. Irak fu eksempre, teki a kontren fu Babilon fu owruten abra. Persia (Iran) nanga Grikikondre de ete. Kondre fu den grontapumakti disi di de ete, de memre fu den Verenigde Nâsi. Den kownukondre disi sa lasi gowe tu makandra nanga a pori di a lasti grontapumakti o kisi. Ala den tiri fu libisma sa pori dorodoro na „a feti fu a bigi dei fu Gado na Almaktiwan” (Openbaring 16:14, 16). Ma suma sa tiri grontapu dan?

¡WAN TIRIMAKTI DI E TAN DE LETI NA WI FESI!

36, 37. (a) Suma na „wan sma di ben gersi wan manpikin fu libisma”, èn o ten èn nanga sortu sani na prakseri a ben kon na ini a Krutu na hemel? (b) San ben seti na ini 1914 G.T.?

³⁶ „Mi ben tan luku na ini den fisyun fu neti, èn ¡luku!”, Danièl ben bari taki. „Nanga den wolku fu hemel wan sma  di ben gersi wan manpikin fu libisma, ben kon; èn a ben kisi pasi fu go na fesi a Graniwan ini Dei, èn den ben tyari en kon krosibei, iya, leti na fesi a Sma dati” (Danièl 7:13). Di Yesus Krestes ben de na grontapu, dan a ben kari ensrefi „a Manpikin fu libisma” fu sori a banti di a ben abi nanga libisma (Mateus 16:13; 25:31). Yesus ben taigi a Sanhedrin noso a Dyu hei krutubangi: „Unu sa si a Manpikin fu libisma e sidon na a reti-anu fu krakti èn a e kon na tapu den wolku fu hemel” (Mateus 26:64). So bun, na ini a fisyun fu Danièl, a sma di e kon èn di sma no man si nanga den ai èn di e kisi pasi fu go na fesi Yehovah Gado, ben de Yesus Krestes di ben kisi wan opobaka èn di ben kisi glori. O ten disi ben pasa?

³⁷ Gado meki wan frubontu fu wan Kownukondre nanga Yesus Krestes, neleki fa a ben du dati nanga Kownu David (2 Samuèl 7:11-16; Lukas 22:28-30). Di „den fasti ten fu den nâsi” ben kon na wan kaba na ini 1914 G.T., dan nanga reti Yesus Krestes, leki na erfgenaam fu a kownusturu fu David, ben kan kisi Kownukondre tiri. A profeititori fu Danièl e taki: „Na en den ben gi tirimakti nanga wartifasi nanga wan kownukondre, so taki den pipel, nationaal grupu nanga tongo den alamala ben sa dini en. En tirimakti na wan tirimakti di e tan go doro te ten di no skotu èn a no sa pasa gowe, èn en kownukondre na wan di no sa kisi pori” (Danièl 7:14). So bun, a Kownukondre na ondro a Mesias ben seti na hemel na ini 1914. Ma a tirimakti gi na trawan tu.

38, 39. Suma sa kisi tirimakti fu tiri grontapu fu têgo?

³⁸ „Den santawan fu a Moro Heiwan sa kisi a kownukondre”, na engel ben taki (Danièl 7:18, 22, 27). Yesus Krestes na a moro prenspari santawan (Tori fu den Apostel 3:14; 4:27, 30). Den tra „santawan” di abi wan prati na ini a tirimakti na den 144.000 getrow Kresten di kisi salfu nanga santa yeye èn di de erfgenaam fu a Kownukondre nanga Krestes (Romesma 1:7; 8:17; 2 Tesalonikasma 1:5; 1 Petrus 2:9). Den kisi wan opobaka na dede leki yeye di no man dede moro, fu tiri nanga Krestes na tapu a hemel bergi Sion (Openbaring 2:10;  14:1; 20:6). So bun, Krestes Yesus nanga den salfu Kresten di kisi wan opobaka sa tiri a grontapu fu libisma.

³⁹ Fu a tirimakti fu a Manpikin fu libisma nanga den tra „santawan” di kisi wan opobaka, na engel fu Gado ben taki: „A kownukondre nanga a tirimakti nanga a grani fu den kownukondre na ondro a heri hemel ben gi na a pipel di de den santawan fu a Moro Heiwan. A kownukondre fu den na wan kownukondre di e tan te ten di no skotu, èn ala den tirimakti sa dini den èn gi den yesi” (Danièl 7:27). ¡A libisma famiri di gi yesi, trutru sa kisi blesi na ondro a Kownukondre dati!

40. Fa wi kan kisi wini te wi e poti prakseri na a dren nanga den fisyun fu Danièl?

⁴⁰ Danièl no ben sabi ala den tumusi moi kontru fu den fisyun di Gado ben gi en. A ben taki: „Te nanga dyaso a kaba fu a tori de. Ma mi, Danièl, fu mi sei, mi eigi prakseri ben tan meki mi kon frede trutru, so taki mi fesi ben kenki kloru srefisrefi; ma a tori srefi mi ben kibri na ini mi eigi ati” (Danièl 7:28). Ma wi e libi na ini a ten pe wi kan frustan a kontru fu san Danièl ben si. A poti di wi e poti prakseri na a profeititori disi sa tranga a bribi fu wi èn sa tranga na overtoigi di wi abi taki a Mesias Kownu fu Yehovah sa tiri grontapu.

[Futuwortu]

SAN YU BEN KON FRUSTAN?

• San ibriwan fu den ’fo bigi meti di ben opo kon fu a se’ e prenki?

• San na a „pikin” tutu?

• Fa na agersi pikin tutu ben trobi „den santawan” na a ten fu a Fosi Grontapufeti?

• San o pasa nanga na agersi pikin tutu nanga tra tirimakti di den e agersi nanga meti?

• Fa yu ben kisi wini fu a poti di yu poti prakseri na a dren nanga den fisyun fu Danièl fu den „fo bigi meti”?

[Aksi fu a tori disi]

 [Faki/Prenki na tapu bladzijde 149-152]

WAN KOWNU DI E FRUDRAGE SANI

WAN Griki skrifiman fu a di fu feifi yarihondro b.G.T. ben memre en leki wan bun kownu di ben frudrage sani. Na ini Bijbel den e kari en a „salfuwan” fu Gado èn „wan aka” di e kon „pe son e opo” (Yesaya 45:1; 46:11). A kownu di den e taki fu en na a fasi dati na Sirus a Bigiwan fu Persia.

Sirus ben bigin kisi barinen wan sani fu 560/559 b.G.T., di a ben kon na tapu a kownusturu fu Ansan, wan foto noso distrikt na ini Persia fu owruten, baka en papa Kambises I. Na a ten dati Ansan ben de na ondro vasal-tiri fu kownu Astiages fu Media. Sirus ben opo ensrefi teige a tirimakti fu den Mediasma èn ben wini esi-esi bika a legre fu Astiages ben gowe libi en èn ben teki a sei fu Sirus. Baka dati den Mediasma ben de loyaal na Sirus. Dan den Mediasma nanga den Persiasma ben feti leki wán man na ondro a tiri fu en. Na so a tiri fu den Mediasma nanga den Persiasma ben du kon, di baka wan pisi ten ben bradi a kontren fu den fu na Egeus Se te go miti na Indusliba.​—Luku a karta.

Nanga den legre fu den Mediasma nanga den Persiasma makandra, Sirus ben bigin fosi fu poti wan kontren na ondro en  makti pe problema de — a westsei pisi fu Media pe Kownu Krusus fu Lidia ben e bradi en kontren go na ini a kontren fu den Mediasma. Sirus ben wini Krusus èn ben teki en mamafoto Sardis abra fu di a ben go doro na a owstusei grens fu a Gran Kownukondre Lidia na ini Pikin Asia. Baka dati, Sirus ben poti den foto fu Ionia na en ondro èn ben meki heri Pikin Asia tron wan pisi fu a kontren di de na ondro a makti fu a Gran Kownukondre Medo-Persia. Na a fasi dati a ben kon tron a moro bigi feanti fu Babilon nanga a kownu fu en, Nabonidus.

Baka dati, Sirus ben sreka ensrefi fu feti nanga a makti Babilon. Èn sensi a ten dati a ben abi fu du nanga a kontru fu Bijbel profeititori. Pikinmoro tu yarihondro na fesi, nanga yepi fu a profeiti Yesaya, Yehovah ben kari Sirus leki a tiriman di ben sa meki Babilon fadon èn di ben sa fri den Dyu fu katibo. Fu di na fesi kaba Gado ben gi Sirus a wroko disi, meki den Buku fu Bijbel e taki fu Sirus leki a „salfuwan” fu Yehovah.​—Yesaya 44:26-28.

Di Sirus ben go fu feti nanga Babilon na ini 539 b.G.T., dan a ben kisi fu du nanga wan kefalek bigi wroko. A foto, di ben abi bigi skotu lontu en èn wan dipi èn bradi kanari di ben de na Eufraatliba, ben gersi taki sma no ben man wini en. Pe na Eufraat ben lon pasa na ini Babilon, wan skotu ben de, di ben hei leki wan bergi, nanga bigi kopro portu, di ben e waka sei a heri syoro fu a liba. Fa Sirus ben o man teki Babilon abra?

Moro leki wan hondro yari na fesi, Yehovah ben taki na fesi taki „wan pori de na tapu den watra fu en” èn ben taki dati „den musu kon drei” (Yeremia 50:38). Soleki fa a profeititori ben taki, dan Sirus ben meki a watra fu na Eufraatliba lon go na  wan tra presi wan tu kilometer na a noordsei fu Babilon. Baka dati a legre fu en ben waka na ini a tokotoko gron fu a liba èn ben kren a seikanti di e go na a skotu èn ben go sondro problema na ini a foto bika den kopro portu ben libi opo. ¡Leki „wan aka” di e dyompo grabu en stimofo esi-esi, na so a tiriman disi fu „pe son e opo” — fu owstusei — ben teki Babilon abra na ini wán neti!

Gi den Dyu na ini Babilon, a wini di Sirus ben wini ben wani taki dati a fri fu katibo di den ben fruwakti so langa kaba ben kon èn taki a 70 yari pori fu a kondre fu den ben kon na wan kaba. ¡Den ben musu prisiri di Sirus ben meki bekènti taki a ben gi den primisi fu drai go baka na Yerusalem èn fu bow a tempel baka! Sirus ben gi den so srefi den warti wrokosani fu a tempel baka di Nebukadnesar ben tyari go na Babilon, a ben gi primisi na ini a nen fu kownu fu tyari udu kon fu Libanon èn ben gi primisi fu gebroiki moni fu a kownu oso fu pai den kostu fu a bow-wroko.​—Esra 1:1-11; 6:3-5.

Moro furu Sirus ben e sori bun-ati èn ben frudrage sani ini a fasi fa a ben handri nanga den sma di a ben wini. Wán reide fu a fasi disi fa a ben tyari ensrefi ben kan de a relisi fu en. Kande Sirus ben e hori ensrefi na den leri fu a profeiti Zoroaster fu Persia èn ben e anbegi Ahura Mazda — wan gado di sma ben bribi taki a de a kriaman fu ala sani san bun. Farhang Mehr e skrifi na ini en  buku The Zoroastrian Tradition: „Zoroaster ben sori taki Gado de volmaakti tapu a kontren fu bun gwenti nanga wet. A ben taigi sma taki Ahura Mazda no e teki refensi, ma a de regtfardiki èn fu dati ede sma no musu frede en, ma musu lobi en.” A bribi di Sirus ben bribi na ini wan gado di ben abi bun gwenti nanga wet èn di ben regtfardiki, kande ben abi krakti tapu den markitiki fu Sirus tapu a kontren fu bun gwenti nanga wet èn ben meki taki a sori bun-ati èn eerlijkfasi.

Ma a kownu no ben man frudrage a weer na ini Babilon. A no ben man nanga den kefalek faya zomer. So bun, ala di Babilon ben tan de wan kownu foto fu a gran kownukondre èn so srefi a prenspari presi fu relisi nanga kulturu, toku furutron a ben e gebroiki Babilon soso leki en mamafoto na winterten. Fu taki en leti, baka di Sirus ben wini Babilon, dan syatu baka dati a ben drai go baka na en mamafoto na zomerten, Ekbatana, di ben de so wan 1900 meter moro hei leki a se na a futu fu na Alwandbergi. Drape yu ben abi kowru winter ten, ma yu ben abi moi zomer ten so srefi, di a ben lobi moro. Sirus ben bow wan moi paleisi tu na ini en owru mamafoto, Pasargadei (krosibei fu Persepolis), 650 kilometer na zuid-owstusei fu Ekbatana. A paleisi drape ben de wan presi pe a ben kan go rostu.

Dati meki sma e memre Sirus leki wan deki-ati winiman èn wan kownu di ben frudrage sani. A 30 yari tiri fu en ben kon na wan kaba nanga a dede fu en na ini 530 b.G.T., di a ben de na ini wan srudatifeti. En manpikin Kambises II ben kon baka en na tapu a kownusturu fu Persia.

SAN YU BEN KON FRUSTAN?

• Fa Sirus a Persiasma ben sori fu de a „salfuwan” fu Yehovah?

• Sortu warti wroko Sirus ben du gi a pipel fu Yehovah?

• Fa Sirus ben handri nanga den sma di a ben wini?

[Karta]

(Efu yu wani si pe den sani disi skrifi, luku a buku)

GRAN KOWNUKONDRE MEDO-PERSIA

MASEDONIA

Memfis

EGIPTI

ETIOPIA

Yerusalem

Babilon

Ekbatana

Susa

Persepolis

INDIA

[Prenki]

A grebi fu Sirus na Pasargadei

[Prenki]

Bas-reliëf na Pasargadei di e prenki Sirus

 [Faki/Prenki na tapu bladzijde 153-161]

WAN YONGU KOWNU E TEKI GRONTAPU ABRA

SO WAN 2300 yari pasa kaba, wan srudati legre-edeman nanga weti wiwiri di ben pasa 20 yari, ben tanapu na a syoro fu a Mindrikondre Se. Den ai fu en ben e luku doronomo go na wan èilanti-foto pikinmoro wán kilometer moro fara. Di den ben tapu en fu go na a foto, dan a legre-edeman di ben kisi atibron, ben abi a fasti bosroiti fu teki a foto abra. Fa a ben o bigin a feti? A meki wan dan go na a èilanti èn a sreka den legre fu en fu go feti nanga a foto. Den ben bigin meki a dan kaba.

Ma wan boskopu fu a bigi kownu fu a Gran Kownukondre Persia ben tapu a yongu legre-edeman. Fu di a tiriman fu Persia ben de fayafaya fu meki vrede, meki a ben pristeri en wan tumusi aparti sani: 10.000 talenti gowtu (wan sani di abi a waarde fu moro leki tu milyard Amerkan dala na ini a ten disi), fu trow nanga wan fu den umapikin fu a kownu, èn a makti na tapu a heri westsei pisi fu a Gran Kownukondre Persia. Ala den sani disi a ben pristeri leki pai fu kisi a famiri fu a kownu baka, di a legre-edeman ben teki leki strafuman.

A komandanti di ben tanapu na fesi a bosroiti fu teki noso fu weigri a sani di den ben pristeri en, ben de Aleksander III fu Masedonia. ¿A musu teki a sani di ben pristeri? „A ben de wan prenspari momenti gi a grontapu fu owruten”, na so historia skrifiman Ulrich Wilcken e taki. „Iya, den bakapisi fu a bosroiti di a ben teki, ben go doro pasa den Mindri-Yarihondro te go miti a ten fu wi, na den Owstusei-kondre èn na den Westsei-kondre.” Fosi wi go luku a piki fu Aleksander, meki wi go luku sortu sani di ben feni presi ben meki a tumusi prenspari momenti disi kon de.

 DEN E MEKI WAN MAN KON TRON WAN WINIMAN

Aleksander ben gebore na Pela, Masedonia, na ini 356 b.G.T. En papa ben de Kownu Filipus II èn en mama ben de Olimpias. Olimpias ben leri Aleksander taki den kownu fu Masedonia ben kon fu Herkules, wan manpikin fu a Griki gado Zeus. Olimpias ben e bribi taki na afo fu Aleksander ben de Akiles, wan man nanga barinen na ini a puwema fu Homerus, na Iliad. So bun, fu di en mama nanga en papa ben kweki en nanga a prakseri fu wini èn fu kisi kownu glori, meki a yongu Aleksander no ben abi furu belangstelling fu feti na baka tra sani. Di den ben aksi en efu a ben sa lon wan streilon na den Olimpia Prei, dan Aleksander ben taki dati a ben sa du dati efu a ben musu lon nanga kownu. A marki fu en ben de, fu du moro bigi sani leki den sani di en papa ben du èn fu kisi glori nanga yepi fu den sani di a ben sa du.

 Di Aleksander ben abi 13 yari, dan a ben kisi leri fu a Griki filosofiaman Aristoteles, di ben yepi en fu kisi belangstelling gi filosofia, datratori nanga sabidensi. Te o fara den filosofia leri fu Aristoteles ben abi krakti tapu a denki fu Aleksander na wan sani di e tyari wan haritaki kon. „A gersi taki a no e tyari kesekese kon te mi e taki dati den no ben agri nanga furu sani”, na so Bertrand Russell, wan filosofiaman fu a di fu 20 yarihondro ben taki. „A fasi fa Aristoteles ben e si sani na politiek sei ben abi en gron tapu a Griki seti fu foto di e tiri kontren na den lontu, di ben de fu kon na wan kaba. Na idea fu wan pikin foto di e tiri kontren na en lontu, no ben sa hari wan prins di ben lobi makti srefisrefi èn di ben wani seti wan bigi gran kownukondre di ben sa tiri komoto na wán presi. Aleksander ben musu e tweifri tu na a gronprakseri fu Aristoteles taki den musu handri den sma di no de Grikisma leki srafu, bika a ben abi wan gran kownukondre na prakseri pe wan matifasi di e kon tranga moro nanga moro, de na mindri den winiman nanga den sma di den wini.

Ma furu tweifri no de taki Aristoteles ben wiki a belangstelling fu Aleksander fu leisi èn fu leri. Aleksander ben tan de wan fayafaya leisiman en heri libi langa èn ben lobi den sani di Homerus ben skrifi. Sma e taki dati a ben leri na Iliad — ala 15.693 lin fu puwema — na ede.

A leri di a ben kisi fu Aristoteles ben kon na wan kaba wantronso na ini 340 b.G.T. di a prins, di ben abi 16 yari, ben go baka na Pela fu tiri Masedonia, di en papa no ben de. Èn heri esi a kroonprins ben sori san a man du leki srudati. Filipus ben prisiri di wantewante Aleksander ben tapu na opruru di a lo Meidi fu Trasia ben meki èn di a ben teki a moro prenspari foto fu den abra na ini feti èn ben gi a presi a nen fu en, Aleksandropolis.

A WINI E GO DORO

A kiri di den ben kiri Filipus na ini 336 b.G.T. ben meki taki Aleksander, di ben abi 20 yari, ben kisi a kownusturu fu Masedonia. Di Aleksander ben go na ini Asia na a Hellespont (now den  Dardanellen) na ini a bigin fu mei 334 b.G.T., dan a ben bigin nanga wan feti fu wini kondre nanga wan pikin ma bun legre fu 30.000 srudati di ben waka nanga futu, èn nanga 5000 asi-tyariman. Ensyinoru, landmeter, architect, sabidensiman nanga historia skrifiman ben go nanga a legre fu en.

Na a Granikusliba na a noord-west uku fu Pikin Asia (now Torkukondre), Aleksander ben wini en fosi feti di a ben feti nanga den Persiasma. A winter dati a ben teki a westsei pisi fu Pikin Asia abra. A herfst na baka, a di fu tu prenspari feti ben feti nanga den Persiasma na Isus, na a zuid-owstu uku fu Pikin Asia. Nanga wan legre fu so wan afu milyun man, a bigi kownu fu Persia, Darius III, ben kon drape fu miti Aleksander. Fu di Darius ben e frutrow tumusi furu tapu ensrefi, meki a ben tyari so srefi en mama, en wefi nanga tra memre fu en famiri nanga en, so taki den ben kan de kotoigi fu san ben musu de wan tumusi moi wini. Ma den Persiasma no ben sreka densrefi gi na onfruwakti fasi nanga kraktifasi fu a fasi fa den Masedoniasma ben bigin a feti. Den srudati fu Aleksander ben wini a Persia legre krinkrin èn Darius ben lowe gowe ala di a ben libi en famiri na ini na anu fu Aleksander.

Na presi fu hari go baka den Persiasma di ben lowe gowe, Aleksander ben go na zuidsei, sei a syoro fu a Mindrikondre Se èn ben  teki den lanpresi abra di den makti grupu fetisipi fu Persia ben e gebroiki. Ma na èilanti-foto Tirus ben kakafutu gi a kon di den ben kon nanga tranga na ini a foto. Fu di Aleksander ben abi a fasti bosroiti fu teki na èilanti-foto abra, meki a ben bigin lontu a foto èn dati ben tan seibi mun langa. Na ini a ten di a ben lontu a foto, dan Darius ben kon nanga na idea fu meki vrede di wi ben taki fu en na a bigin. Den sani di Darius ben pristeri ben de so moi, taki soleki fa sma ben fruteri, Parmenio, a raiman di Aleksander ben frutrow, ben taki: ’Efu mi ben de Aleksander, mi ben o teki en.’ Ma a yongu legre-edeman ben piki baka: ’Dati mi ben o du tu, efu mi ben de Parmenio.’ Aleksander ben weigri fu taki-go-taki-kon fu a tori èn ben go doro nanga a lontu di a ben lontu a foto èn ben pori a heimemre basi dati fu a se na ini yuli 332 b.G.T.

Aleksander no ben du noti nanga Yerusalem, di ben gi ensrefi abra na en, èn ben pusu go na zuidsei pe a ben teki Gaza abra. Fu di Egipti ben weri fu a Persia tiri, meki den ben gi en wan switikon na ini Egipti leki wan frulusuman. Na Memfis a ben tyari ofrandi gi a mankaw Apis, èn na so wan fasi ben plisi den priester fu Egipti. A ben seti a foto Aleksandria tu, di baka ten ben strei nanga Ateine leki wan moro prenspari presi pe sma kan kisi leri èn te nanga now a foto dati e tyari en nen.

Baka dati, Aleksander ben drai go baka na a noord-owstusei, èn ben pasa go na ini Palestina èn ben go doro na a Tigrisliba. Na ini a yari 331 b.G.T., a ben kisi fu du nanga a di fu dri bigi feti nanga den Persiasma na Gaugamela, no so fara fu den brokopresi fu Ninifei di pori. ¡Dyaso den 47.000 man fu Aleksander ben wini a legre fu Persia fu no moro mendri leki 250.000 man di ben orga ensrefi baka! Darius ben lowe èn en eigi sma ben kiri en baka ten.

Den wini ben gi Aleksander deki-ati  èn a ben drai go na zuidsei èn ben teki a winter mamafoto Babilon fu den Persiasma abra. A ben teki so srefi den mamafoto na Susa nanga Persepolis abra, ben teki den kefalek furu gudu fu den Persiasma èn ben bron a bigi paleisi fu Serkses. Te fu kaba, a mamafoto na Ekbatana ben fadon na ini en anu. Baka dati, a man disi di ben teki kondre esi-esi abra, ben poti a tra kontren fu Persia na en ondro, èn a ben e go na a owstusei te na a Indusliba, di de na ini Pakistan fu a ten disi.

Di a ben abra na Indus, na ini a kontren di de na a grens fu a distrikt Taksila fu Persia, dan Aleksander ben miti wan bigi feanti, a kownu fu India, Porus. Aleksander ben feti a di fu fo èn lasti bigi feti nanga en na ini yuni 326 b.G.T. A legre fu Porus ben abi 35.000 srudati nanga 200 asaw di ben meki den asi fu den Masedoniasma kon frede. A feti ben faya èn furu sma ben dede, ma den legre fu Aleksander ben wini. Porus ben gi ensrefi abra èn ben kon tron wan patna.

Moro leki aiti yari ben pasa sensi a legre fu Masedonia ben abra go na ini Asia, èn den srudati ben kon weri èn ben e angri fu go na oso. A lasi di den ben kon lasi-ati fu a faya feti nanga Porus ben meki taki den ben wani drai go baka na oso. Ala di biginbigin Aleksander no ben wani du dati, toku a ben du san den ben wani. Grikikondre ben kon tron a grontapumakti trutru. A Grikitongo nanga Griki kulturu ben panya go na ini a heri kontren nanga yepi fu den Griki kolonie di ben seti na ini den kondre di den ben teki abra.

A MAN DI DE BAKA A SKELT

A tranga sani di ben e hori a legre fu Masedonia na wan na ini den yari di den ben e teki kondre abra, ben de a fasi fa Aleksander ben de. Baka den feti, dan Aleksander ben gwenti fu go luku den sma di ben kisi mankeri, ben e ondrosuku den soro fu den, ben e prèise den srudati fu den deki-ati sani di den ben du èn ben e gi den grani nanga yepi fu wan presenti fu moni akruderi den sani di den ben du. Ini a tori fu den wan di ben dede na ini  feti, Aleksander ben e seti wan tumusi moi beri gi den. Den papa nanga mama nanga den pikin fu den man di ben lasi libi, no ben abi fu pai no wan belasting èn no ben abi fu du no wan fasi fu wroko. Fu poti den prakseri na tra sani baka den feti, dan Aleksander ben e hori prei nanga wega. Wán leisi a ben seti sani srefi so taki den man di ben trow no so langa ete, ben kisi verlof fu go na oso, so taki den ben man pasa a winter nanga den wefi fu den, na ini Masedonia. Den sortu sani disi di a ben du ben meki taki den man fu en ben lobi en èn ben meki taki den ben abi furu lespeki gi en.

Plutark, a Griki skrifiman di e skrifi fu a libi fu sma, e skrifi fu a trow di Aleksander ben trow nanga Prinses Roksana fu Baktria: „A ben de trutru wan lobi tori, ma toku a gersi na a srefi ten taki a sani disi ben yepi en fu doro a marki fu en. Bika a ben e prisiri a pipel di a ben wini, fu si taki a ben teki wan uma na den mindri èn den ben kon lobi en moro, fu si taki en di man dwengi ensrefi moro leki iniwan tra sma, ben abi pasensi ini a wan-enkri faya lobi di ben teki en abra, te leki a ben kan kisi na uma na wan fasi di de akruderi wet èn na wan krin fasi.”

Aleksander ben e lespeki a trowlibi fu trawan tu. Ala di a wefi fu Kownu Darius ben de en strafuman, toku a ben sorgu taki den ben handri en nanga lespeki. Na wan srefi sortu fasi, baka di a ben kon sabi taki tu Masedonia srudati ben handri den wefi fu wan tu freimdesma na wan fowtu fasi, dan a ben gi komando taki den ben musu kiri den efu den ben kon feni taki den ben fowtu.

Neleki en mama Olimpias, Aleksander ben lobi relisi tori srefisrefi. A ben e tyari ofrandi bifo èn baka den feti èn ben e go suku rai na den lukuman fu en fu sabi san son marki di sori san o pasa, wani taki. A ben go suku rai tu na a santapresi fu Amon na Libia. Èn na Babilon a ben du den komando fu den Kaldewsma fu tyari ofrandi, spesrutu gi a gado Bèl (Marduk) fu Babilon.

Ala di Aleksander ben de bescheiden ini nyanyan tori, toku te fu kaba a ben bigin dringi pasa marki. A ben e taki finifini fu ibri  beker win èn ben e meki bigi fu den sani di a ben du. Wan fu den takru sani di Aleksander ben du ben de a kiri di a ben kiri en mati Klitus na ini wan atibron di a ben drungu. Ma Aleksander ben krutu ensrefi so kefalek taki a ben didon dri dei langa na bedi èn no ben nyan èn no ben dringi. Te fu kaba den mati fu en ben man overtoigi en fu nyan.

Baka wan pisi ten na angri fu Aleksander fu kisi glori ben tyari tra takru eigifasi kon na krin. A ben bigin bribi falsi kragi wantewante èn ben bigin gi a moro hebi strafu. Fu eksempre, di sma ben meki a bribi taki Filotas ben de na ini a komplot di ben seti fu kiri en, dan Aleksander ben meki den kiri en nanga en papa, Parmenio, a raiman di a ben frutrow fosi.

A LASI DI ALEKSANDER LASI

Syatu baka di Aleksander ben drai go baka na Babilon, a ben kisi malaria korsu èn a no ben kon betre fu dati noiti moro. Aleksander ben gi ensrefi abra na a moro bigi feanti, dede, 13 yuni 323 b.G.T., baka di a ben libi 32 yari nanga 8 mun nomo.

A ben de neleki fa wan tu koniman fu India ben taki: „O Kownu Aleksander, ibri sma abi soso a pisi doti leki a pisi pe wi e tanapu; èn yu di de wan libisma neleki tra libisma, boiti taki yu lai krakti èn de sondro sari-ati, e waka lontu na a heri grontapu disi fara fu yu oso, e meki en muilek gi yusrefi èn e pina trawan. Ma no so langa moro, dan yu sa dede èn yu sa abi soso a pisi doti di de fanowdu fu beri yu.”

SAN YU BEN KON FRUSTAN?

• Sortu kweki Aleksander a Bigiwan ben kisi?

• Nanga sortu feti Aleksander ben bigin syatu baka di a ben kisi a kownusturu fu Masedonia?

• Taki fu wan tu fu den feti di Aleksander ben wini.

• San wi kan taki fu a fasi fa Aleksander ben de?

[Karta]

(Efu yu wani si pe den sani disi skrifi, luku a buku)

DEN KONDRE DI ALEKSANDER BEN TEKI ABRA

MASEDONIA

EGIPTI

Babilon

Indusliba

[Prenki]

Aleksander

[Prenki]

Aristoteles nanga en studenti Aleksander

 [Prenki di e tapu a heri bladzijde]

[Prenki]

Medari di sma taki e prenki Aleksander a Bigiwan

 [Faki/Prenki na tapu bladzijde 162, 163]

WAN KEFALEK BIGI KOWNUKONDRE E PRATI

FU a kownukondre fu Aleksander a Bigiwan Bijbel ben taki na fesi taki a ben o broko èn ben o prati na ini difrenti pisi, „ma no gi den bakapikin fu en” (Danièl 11:3, 4). Dati meki na ini moro mendri leki 14 yari baka di Aleksander dede wantronso na ini 323 b.G.T., den ben kiri en manpikin Aleksander IV, di a ben kisi nanga en trow-uma, èn en manpikin Herakles, di a ben kisi nanga en dorosei-uma.

Pikinmoro na a yari 301 b.G.T., fo fu den legre-edeman fu Aleksander ben teki a makti gi densrefi na ini a bigi gran kownukondre di a komandanti fu den ben seti. Legre-edeman Kasander ben teki a makti abra na Masedonia nanga Grikikondre. Legre-edeman Lisimakus ben kisi Pikin Asia nanga Trasia. Seleikos I Nikator ben kisi Mesopotamia nanga Siria. Èn Ptolemeus Lagi noso Ptolemeus I ben tiri Egipti nanga Palestina. So bun, fu a wán bigi kownukondre fu Aleksander, fo Griki kownukondre ben opo.

Fu den fo Griki kownukondre, a tiri fu Kasander ben sori taki a de a wan di tan moro syatu. Wan tu yari baka di Kasander ben kon na makti, a famirilin fu en fu man-nengre ben lasi gowe, èn na ini 285 b.G.T. Lisimakus ben teki a pisi fu a Gran Kownukondre Grikikondre di ben de fu Europa. Fo yari baka dati, den ben kiri Lisimakus na ini wan feti nanga a legre fu Seleikos I Nikator, èn dati ben gi Seleikos makti tapu a moro bigi pisi fu den kontren fu Asia. Seleikos ben tron a fosiwan na ini a lin fu kownu fu Seleikos na ini Siria. A ben bow Antiokia na ini Siria èn ben meki dati tron a nyun mamafoto fu en. Den ben kiri Seleikos na ini 281 b.G.T., ma a lin fu kownu di a ben seti ben tan na makti te leki 64 b.G.T., di Legre-edeman Pompeus fu Rome ben meki Siria tron wan distrikt fu Rome.

Fu den fo pisi fu a gran kownukondre fu Aleksander, a kownukondre fu Ptolemeus ben  tan moro langa leki ala den trawan. Ptolemeus I ben teki a titel fu kownu na ini 305 b.G.T. èn ben kon tron a fosiwan fu den kownu fu Masedonia, noso Farao fu Egipti. A ben meki Aleksandria tron a mamafoto, èn ben bigin wantewante nanga wan plan fu bow a foto. Wan fu den moro bigi bow-wroko fu en ben de a barinen Bibliotheek fu Aleksandria. Ptolemeus ben tyari wan barinen sabiman fu Ateine, Demetrius Falerus, kon fu Grikikondre so taki a ben kan luku a bigi bow-wroko disi. Soleki fa sma taki, dan pikinmoro na a fosi yarihondro G.T., a bibliotheek ben abi wan milyun bukulolo. A lin fu kownu fu Ptolemeus ben go doro fu tiri na ini Egipti te leki a ben fadon na ini anu fu Rome na ini 30 b.G.T. Baka dati, Rome ben teki a presi fu Grikikondre leki a moro prenspari grontapumakti.

SAN YU BEN KON FRUSTAN?

• Fa a bigi gran kownukondre fu Aleksander ben prati?

• Te leki o ten den kownu ini a lin fu Seleikos ben go doro fu tiri na ini Siria?

• O ten a kownukondre fu Egipti na ini a famirilin fu Ptolemeus ben kon na wan kaba?

[Karta]

(Efu yu wani si pe den sani disi skrifi, luku a buku)

A PRATI DI A GRAN KOWNUKONDRE FU ALEKSANDER PRATI

Kasander

Lisimakus

Ptolemeus I

Seleikos I

[Prenki]

Ptolemeus I

Seleikos I

 [Schema/​Prenki na tapu bladzijde 139 di e tyari sani kon na krin]

(Efu yu wani si pe den sani disi skrifi, luku a buku)

DEN GRONTAPUMAKTI FU A PROFEITITORI FU DANIÈL

A bun bigi popki (Danièl 2:31-45)

Fo meti di opo kon fu a se (Danièl 7:3-8, 17, 25)

BABILON fu 607 b.G.T.

MEDO-PERSIA fu 539 b.G.T.

GRIKIKONDRE fu 331 b.G.T.

ROME fu 30 b.G.T.

ANGLO-AMERKAN GRONTAPUMAKTI fu 1763 G.T.

WAN GRONTAPU DI PRATI NA POLITIEK SEI na ini a ten fu a kaba

 [Prenki di e tapu heri bladzijde 128]

 [Prenki di e tapu heri bladzijde 147]