Kapitel Dri

Den Kisi Tesi—¡Ma Den Tan Getrow na Yehovah!

1, 2. Nanga sortu prenspari sani a tori fu Danièl e bigin?

A TORI na ini a profeiti buku Danièl e bigin na wan ten te prenspari kenki e feni presi na mindri nâsi na grontapu. Didyonsro Asiria ben lasi en mamafoto Ninifei. Egipti di ben de na zuidsei fu a kondre Yuda ben tron wan kondre di no ben abi furu makti moro. Èn Babilon ben e opo esi-esi kon leki a moro prenspari makti ini a strei fu kisi a makti fu grontapu.

² Na ini a yari 625 b.G.T., Farao Neikow ben du a lasti muiti fu tapu Babilon fu bradi en makti go na zuidsei. Nanga dati na prakseri, a ben tyari en legre go na Karkemis, di ben de na a syoro na oposei fu na Eufraatliba. A feti fu Karkemis, soleki fa den ben kari en baka ten, ben de wan sani ini historia di ben meki sani kenki trutru. A legre fu Babilon na ondro a tiri fu Kroonprins Nebukadnesar ben gi den legre fu Farao Neikow kefalek hebi mankeri (Yeremia 46:2). Fu di Nebukadnesar ben kisi moro deki-ati di a ben wini, meki a ben hari go na Siria nanga Palestina èn te yu luku en bun, a ben tyari wan kaba kon na a makti di Egipti ben abi na ini a kontren disi. A ben de soso a dede fu en papa Nabopolasar di ben tapu a feti fu en fu wan pisi ten.

3. San ben de a bakapisi fu a fosi leisi di Nebukadnesar kon feti nanga Yerusalem?

³ A tra yari, dan Nebukadnesar — di den ben poti now leki kownu fu Babilon — ben poti en prakseri agen na a srudatifeti fu en na Siria nanga Palestina. A ben de na ini a pisi ten dati taki a ben kon na Yerusalem fu a fosi leisi. Bijbel e taki: „Na ini den dei fu en, Nebukadnesar, a kownu fu Babilon, ben opo go, èn na so fasi Yoyakim ben tron en knekti, dri yari langa. Ma a ben drai baka èn ben opo ensrefi teige en.”​—2 Kownu 24:1.

 NEBUKADNESAR NA INI YERUSALEM

4. Fa wi musu frustan den wortu „na ini a di fu dri yari fu a kownuwroko fu Yoyakim” na Danièl 1:1?

⁴ Wi abi spesrutu belangstelling gi den wortu „dri yari langa”, bika na den fosi wortu fu Danièl wi e leisi: „Na ini a di fu dri yari fu a kownuwroko fu Yoyakim, a kownu fu Yuda, Nebukadnesar, a kownu fu Babilon, ben kon na Yerusalem èn ben bigin lontu en” (Danièl 1:1). Na ini a di fu dri yari fu a heri kownuwroko fu Yoyakim, di ben tiri fu 628 te go miti 618 b.G.T., Nebukadnesar no ben de „a kownu fu Babilon” ete, ma a ben de a kroonprins. Na ini 620 b.G.T. Nebukadnesar ben dwengi Yoyakim fu pai belasting. Ma baka wan sani fu dri yari, Yoyakim ben opo ensrefi teige en. So bun, a ben de na ini 618 b.G.T., noso na ini a di fu dri yari fu a kownuwroko fu Yoyakim leki wan vasal-kownu fu Babilon, taki Kownu Nebukadnesar ben kon a di fu tu leisi na Yerusalem, fu strafu Yoyakim di ben opo ensrefi teige en.

5. San ben de a bakapisi fu a di fu tu leisi di Nebukadnesar kon feti nanga Yerusalem?

⁵ A bakapisi fu a lontu disi di den ben lontu Yerusalem ben de taki „te fu kaba, Yehovah ben gi Yoyakim, a kownu fu Yuda, nanga wan pisi fu den wrokosani fu na oso fu a tru Gado na ini en anu” (Danièl 1:2). Yoyakim dede kande fu di den ben kiri en, noso a dede na ini wan opruru di ben de na ini a bigin fu a lontu di Nebukadnesar ben lontu Yerusalem (Yeremia 22:18, 19). Na ini 618 b.G.T. Yoyakin, a manpikin fu en di ben abi 18 yari, ben teki a presi fu en leki kownu. Ma a tiri fu Yoyakin ben tan dri mun nanga tin dei nomo èn a ben gi ensrefi abra na ini 617 b.G.T.​—Teki gersi 2 Kownu 24:10-15.

6. San Nebukadnesar ben du nanga den santa wrokosani fu a tempel na ini Yerusalem?

⁶ Nebukadnesar ben teki den santa wrokosani fu a tempel na ini Yerusalem leki sani di a ben wini na ini a feti, èn „ben tyari den go na a kondre Sinear, na a oso fu en gado; èn den santa wrokosani a ben tyari go na a gudu-oso fu en gado”, Marduk, noso Merodak na ini Hebrewtongo (Danièl 1:2; Yeremia  50:2). Den ben feni wan ston fu Babilon nanga sani di kerfu na tapu èn di abi Nebukadnesar na tapu leki a e taki fu a tempel fu Marduk taki: „Mi ben kibri solfru nanga gowtu nanga diri ston na ini . . . èn ben poti drape a gudu-oso fu mi kownukondre.” Wi sa leisi fu den santa wrokosani disi baka na ini den dei fu Kownu Bèlsasar.​—Danièl 5:1-4.

A SPESRUTU GRUPU NA MINDRI DEN YONGU SMA FU YERUSALEM

7, 8. San wi kan frustan fu Danièl 1:3, 4 nanga 6, fu a kweki di Danièl nanga den dri kompe fu en ben kisi?

⁷ Den ben tyari moro sani go na Babilon leki den gudu fu a tempel fu Yehovah wawan. A tori e taki: „Ne a kownu ben taigi a moro prenspari dinari fu kownu oso, Aspenas, fu meki wan tu fu den manpikin fu Israèl èn fu a kownu geslakti èn fu prenspari sma kon, pikin di no ben abi no wan mankeri srefisrefi, ma di ben moi èn di ben abi inzicht ini ala koni èn di ben abi sabi, èn di ben abi a koni fu man si krin san ben de bekènti kaba, [èn] di so srefi ben man tanapu na ini a paleisi fu a kownu.”​—Danièl 1:3, 4.

⁸ Suma den ben teki? A tori e fruteri wi: „Èn wan tu fu den manpikin fu Yuda, Danièl, Hananya, Misaèl nanga Asarya ben de na den mindri” (Danièl 1:6). A sani disi e meki wi kon frustan pikinso moro fu a kweki di Danièl nanga den kompe fu en ben kisi, wan sani di wi no sa sabi fu dati. Fu eksempre, wi e si taki den ben de „manpikin fu Yuda”, a kownu lo. Efu den ben de fu a kownu famirilin noso no ben de fu a kownu famirilin, toku a de reidelek fu prakseri taki, awansi fa a no fa, den ben de fu famiri di ben prenspari èn di ben abi pikinso makti. Boiti taki den ben gosontu na frustan sei èn na skin sei, den ben abi inzicht, koni, sabi nanga a koni fu man si sani krin — ala den fasi disi den ben abi ala di den ben de na wan libimarki taki den ben yongu nofo fu kari den „pikin-nengre”, kande den ben de na ini a bigin fu den tini-yari. Danièl nanga den kompe fu en ben musu de aparti — a spesrutu grupu — na mindri den yongu sma na ini Yerusalem.

9. Fu san ede a de wan seiker sani taki Danièl nanga den dri kompe fu en ben abi papa nanga mama di ben e frede Gado?

 ⁹ A tori no e fruteri wi suma ben de den papa nanga mama fu den yongu sma disi. Toku a gersi taki a de wan seiker sani taki den ben de sma di ben gi densrefi na ini a dini fu Gado èn di ben teki den frantiwortu leki papa nanga mama seryusu. Te wi e hori na prakseri fa bun gwenti nanga wet nanga a yeyefasi ben go furu na baka na Yerusalem na a ten dati, spesrutu na mindri den ’manpikin fu a kownu geslakti èn fu prenspari sma’, dan a de krin taki den tumusi bun eigifasi di Danièl nanga den dri kompe fu en ben abi, no ben kon fu densrefi. Sondro tweifri, a ben musu hati den papa nanga mama fu si taki den ben teki den manpikin fu den tyari gowe na wan farawe kondre. ¡Efu den ben kan sabi nomo fa sani ben o waka, dan den ben sa prodo srefisrefi! ¡A de wan prenspari sani taki papa nanga mama e kweki den pikin fu den „na ini a trangaleri èn a seryusu frumane fu Yehovah”!​—Efeisesma 6:4.

WAN FETI FU WINI A FRUSTAN

10. San den ben leri den yongu Hebrewsma, èn san den ben abi na prakseri nanga disi?

¹⁰ Wantewante wan feti ben bigin fu wini a yongu frustan fu den katiboman disi. Fu de seiker taki den Hebrew tini disi ben sa kenki, so taki den ben sa kan fiti na ini a sistema fu Babilon, meki Nebukadnesar ben gi a komando taki den dinari fu en „leri den a skrifi nanga a tongo fu den Kaldewsma” (Danièl 1:4). Disi no ben de wan gewoon skoroleri. The International Standard Bible Encyclopedia e tyari kon na krin taki a „ben abi a stuka fu a Sumeriatongo na ini, na Akadiatongo, na Arameisitongo . . . , nanga tra tongo, so srefi den furu buku di skrifi na ini den tongo disi”. „Den furu buku” ben abi historia, wiskunde, astronomia èn go so moro fara, na ini. Ma „sani di ben skrifi èn di ben abi fu du nanga relisi tori, soleki marki fu san o pasa nanga astrologie . . . , ben e plèi wan prenspari ròl”.

11. Sortu sani ben du fu sorgu taki den Hebrew yongu sma ben sa moksi densrefi nanga a libi fu a kownu oso fu Babilon?

 ¹¹ Fu meki taki den Hebrew yongu sma disi ben sa teki den gwenti nanga kulturu fu a libi fu a kownu oso fu Babilon krinkrin abra, dan „a kownu ben poti wan aladei porsi gi den fu den switisani fu a kownu èn fu a win di a ben dringi, iya, fu gi den nyanyan dri yari langa, so taki na a kaba fu a ten dati den ben sa kan tanapu na fesi a kownu” (Danièl 1:5). Moro fara „na edeman fu den dinari fu kownu oso ben gi den [tra] nen. Na so a gi Danièl a nen Bèltsasar; èn na Hananya, Sadrak; èn na Misaèl, Meisak; èn na Asarya, Abedneikow” (Danièl 1:7). Na ini Bijbel ten a ben de wan gwenti taki den gi wan sma wan nyun nen fu marki wan prenspari sani na ini en libi. Fu eksempre, Yehovah ben kenki den nen fu Abram nanga Sarai kon tron Abraham nanga Sara (Genesis 17:5, 15, 16). Te wan sma kenki a nen fu wan tra sma, dan disi na wan buweisi di de krin fu si taki a sma di kenki a nen, abi makti. Di Yosef ben tron na edeman fu nyanyan-tori na Egipti, dan Farao ben gi en a nen Safnat Pa-a-nea.​—Genesis 41:44, 45; teki gersi 2 Kownu 23:34; 24:17.

12, 13. Fu san ede wi kan taki dati a kenki di den ben kenki den nen fu den yongu Hebrewsma ben de wan fasi fu pruberi fu broko a bribi fu den?

¹² Na ini a kefal fu Danièl nanga den dri Hebrew mati fu en, dan a kenki di den kenki a nen fu den ben de prenspari. Den nen di den papa nanga mama fu den ben gi den, ben kruderi nanga na anbegi fu Yehovah. „Danièl” wani taki „Yehovah Na Mi Krutuman”. „Hananya” wani taki „Yehovah Sori Bun-ati”. „Misaèl” wani taki kande „Suma De Leki Gado?” „Asarya” wani taki „Yehovah Gi Mi Yepi”. Sondro tweifri a ben de a tranga howpu fu den papa nanga mama fu den taki den manpikin fu den ben sa gro na ondro a tiri fu Yehovah Gado fu tron getrow nanga loyaal futuboi fu en.

¹³ Ma den nyun nen di den fo Hebrewsma ben kisi ben abi furu fu du nanga den nen fu falsi gado èn ben sori na so wan fasi taki den sortu gado dati ben poti a tru Gado na den ondro. ¡Disi ben de wan bedrigi fasi fu pruberi fu bruya a bribi fu den yongu sma disi!

14. San den nyun nen di Danièl nanga den dri kompe fu en ben kisi, wani taki?

 ¹⁴ A nen fu Danièl ben kenki kon tron Bèltsasar, san wani taki „Kibri a Libi fu a Kownu”. Soleki fa a sori, dan disi ben de wan syatu fasi fu begi Bèl noso Marduk, a moro prenspari gado fu Babilon. Efu Nebukadnesar ben abi wan sani fu du nanga a teki fu a nen disi gi Danièl noso efu a no ben abi wan sani fu du nanga dati, a ben prodo fu erken dati a ben de „akruderi a nen fu [en] gado” (Danièl 4:8). Hananya ben kisi a nen Sadrak, di son sabiman e denki taki a de wan tai-nen di wani taki „Komando fu Aku”. Na wan moi sani fu sabi taki Aku ben de a nen fu wan Sumeria gado. Misaèl ben kisi a nen Meisak (kande, Mi·sya·aku), soleki fa a sori, wan koni fasi fu kenki „Suma De Leki Gado?” kon tron „Suma De San Aku De?” A Babilon nen fu Asarya ben de Abedneikow, san wani taki kande „Futuboi fu Neiko”. Èn „Neiko” na wan tra fasi fu kari „Neibow”, a nen fu a gado di wan lo tiriman fu Babilon ben kisi tu.

DEN ABI A FASTI BOSROITI FU TAN GETROW NA YEHOVAH

15, 16. Nanga sortu kefar Danièl nanga den kompe fu en ben kisi fu du now, èn fa den ben handri na tapu disi?

¹⁵ Den Babilon nen, a skoroprograma fu gi den leri baka, èn den spesrutu sani di den ben musu nyan — ala den sani disi no ben de wan sani nomo di ben du fu pruberi fu meki Danièl nanga den dri yongu Hebrewsma teki a Babilon fasi fu libi, ma so srefi fu meki den frigiti den eigi Gado, Yehovah, nanga a relisi leri nanga kweki fu den. San den yongu sma disi ben o du di den ben kisi fu du nanga ala a druk nanga tesi disi?

¹⁶ A tori di skrifi nanga yepi fu santa yeye e taki: „Ma Danièl ben teki a bosroiti na ini en ati taki a no ben sa doti ensrefi nanga den switisani fu a kownu èn nanga a win di a ben dringi” (Danièl 1:8a). Ala di a nen fu Danièl wawan ben kari, toku a de krin fu si na ini a sani di ben kon baka dati,  taki den dri kompe fu en ben horibaka gi a bosroiti fu en. Den wortu „ben teki a bosroiti na ini en ati”, e sori taki a leri di Danièl papa nanga mama nanga tra sma ben gi, di a ben de na ini en kondre, ben doro en ati. Sondro tweifri a srefi sortu leri disi ben tiri den tra dri Hebrewsma na ini a bosroiti di den ben teki. Disi e sori heri bun o warti a de fu gi wi pikin leri, srefi te a gersi leki den yongu tumusi fu frustan dati.​—Odo 22:6; 2 Timoteus 3:14, 15.

17. Fu san ede Danièl nanga den kompe fu en ben weigri soso den aladei nyanyan-sani fu a kownu èn no den tra sani di ben seti?

¹⁷ Fu san ede den yongu Hebrewsma disi ben weigri fu teki den switisani nanga a win nomo, ma no den tra sani di ben seti? A fasi fa Danièl ben denki e sori disi krinkrin: „A no ben sa doti ensrefi.” Fu leri „a skrifi nanga a tongo fu den Kaldewsma” èn a kisi fu wan Babilon nen, awansi wan sma no ben sa kan lobi dati, no abi fu doti wan sma. Luku na eksempre fu Moses, pikinmoro 1000 yari na fesi. Ala di a ben „kisi leri na ini ala koni fu den Egiptisma”, toku a ben tan loyaal na Yehovah. A kweki di a ben kisi fu en eigi papa nanga mama ben gi en wan steifi fondamenti. Fu dati ede „nanga bribi Moses, di a ben kon bigi, ben weigri fu den kari en a manpikin fu na umapikin fu Farao èn a ben frukisi fu den handri en takru nanga a pipel fu Gado, na presi fu abi a prisiri fu sondu di ben de fu wan pisi ten nomo”.​—Tori fu den Apostel 7:22; Hebrewsma 11:24, 25.

18. Na sortu fasi den nyanyan-sani fu a kownu ben sa doti den yongu Hebrewsma?

¹⁸ Na sortu fasi den nyanyan-sani di a kownu fu Babilon ben seti ben o doti den yonkuman? Na a fosi presi, den switisani kan abi nyanyan na ini di a Wet fu Moses no ben e gi pasi fu gebroiki. Fu eksempre, den Babilonsma ben e nyan meti di no ben krin, wan sani di den Israèlsma no ben mag du na ondro a Wet (Lefitikus 11:1-31; 20:24-26; Deuteronomium 14:3-20). Na a di fu tu presi, den Babilonsma no ben abi a gwenti fu meki a brudu fu den meti di den ben srakti lon, fosi den nyan a meti fu den. Fu nyan meti sondro  taki a brudu lon, ben sa de langalanga a pasa fu a wet fu Yehovah ini a tori fu brudu (Genesis 9:1, 3, 4; Lefitikus 17:10-12; Deuteronomium 12:23-25). Na a di fu dri presi, anbegiman fu falsi gado ben abi a gwenti fu òfer a nyanyan fu den na kruktugado bifo den nyan en makandra. ¡Futuboi fu Yehovah no ben sa abi wan prati na ini den sortu tori disi! (Teki gersi 1 Korentesma 10:20-22.) Te fu kaba, a nyan fu nyanyan nanga furu fatu èn a dringi fu sopi ibri dei no ben sa de gosontu gi no wan sma, èn moro mendri srefi gi yongu sma.

19. Fa den Hebrew yongu sma ben sa kan regtfardiki a tori, ma san ben yepi den fu kon na a yoisti bosroiti?

¹⁹ Fu sabi san fu du, na wán sani, ma na wan heri tra sani fu abi a deki-ati fu du en te wi de na ondro druk noso tesi. Danièl nanga den dri mati fu en ben sa kan denki taki, fu di den de farawe fu den papa nanga mama nanga den mati fu den, dan den sma disi no ben sa sabi san den ben e du. Den ben sa kan regtfardiki a sani disi tu fu di den ben kan taki dati a ben de a komando fu a kownu èn taki den no ben abi tra fasi fu du. Boiti dati, tra yongu sma sondro tweifri ben teki den seti disi wantewante èn ben si en leki wan grani na presi leki wan problema fu teki prati. Ma so wan fowtu fasi fu denki ben kan meki wan sma fadon makriki na ini wan sondu di du na kibri fasi, èn disi de wan trapu gi furu yongu sma. Den Hebrew yongu sma ben sabi taki „den ai fu Yehovah de na ibri presi” èn taki „a tru Gado srefi sa krutu ibri sortu wroko di abi fu du nanga ibri sani di kibri, fu si efu a bun noso ogri” (Odo 15:3; Preikiman 12:14). Meki wi alamala leri wan sani fu a waka nanga libi fu den getrow yongu sma disi.

A DEKI-ATI NANGA A HORIDORO FU DEN BEN KISI PAI

20, 21. Sortu sani Danièl ben du, èn san ben de a bakapisi?

²⁰ Baka di Danièl ben teki a bosroiti na ini en ati fu kakafutu gi krakti di ben kan pori en, dan a ben go doro fu handri akruderi a bosroiti fu en. „Èn a ben tan aksi na edeman fu den dinari fu kownu oso taki a no ben sa abi fu doti ensrefi”  (Danièl 1:8b). „Ben tan aksi” — dati na wortu di warti fu taki fu den. Furutron a de so, taki muiti di du doronomo de fanowdu efu wi e howpu fu kakafutu gi tesi noso fu wini son swakifasi.​—Galasiasma 6:9.

²¹ Na ini a kefal fu Danièl, a horidoro fu en ben kisi pai. „Fu dati ede a tru Gado ben gi Danièl lobi bun-ati nanga sari-ati na fesi na edeman fu den dinari fu kownu oso” (Danièl 1:9). A no fu di Danièl nanga den kompe fu en ben luku bun na skin fasi èn ben koni, meki sani waka bun gi den te fu kaba. Na presi fu dati, a ben de fu di Yehovah ben blesi den. Sondro tweifri Danièl ben memre na odo na ini Hebrewtongo: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti” (Odo 3:5, 6). Fu tru, a waka di a ben waka baka a rai dati ben meki a kisi pai.

22. Sortu bun reide a dinari fu kownu oso ben gi fu fruklari a weigri di a ben weigri?

²² Na a bigin, na edeman fu den dinari fu kownu oso no ben wani èn ben taki: „Mi e frede mi masra, a kownu, di taki san unu musu nyan èn dringi. Fu san ede a ben sa musu si dan taki un fesi sari te a teki unu gersi den pikin di owru a srefi leki unu, èn fu san ede unu musu meki mi ede abi fowtu na a kownu?” (Danièl 1:10) Den reide disi di a ben gi fu san ede a no ben man èn fu san ede a ben frede ben yoisti. Kownu Nebukadnesar no ben de wan sma di yu ben kan trangayesi èn a dinari ben sabi taki en „ede” ben sa de na ini kefar efu a ben sa du wan sani di ben de tra fasi leki den komando fu a kownu. San Danièl ben sa du?

23. Fa Danièl ben sori taki a ben abi inzicht nanga koni nanga a fasi fa a ben handri?

²³ Na dyaso inzicht nanga koni ben kon na ini a tori. A yonkuman Danièl ben memre kande na odo: „Wan safri piki e drai atibron puru, ma wan wortu di e gi sari e meki atibron kon” (Odo 15:1). Na presi fu a ben hori nomo na wan tranga-ede fasi taki a ben musu kisi san a ben aksi èn kande ben  tyalensi tra sma fu meki a kon de wan sma di dede fu en bribi ede, Danièl no ben go doro nanga a tori. Na a reti ten, a ben go na „a waktiman” di kande ben wani gi pikinso moro fri, fu di en no ben abi fu gi frantiwortu langalanga na a kownu.​—Danièl 1:11.

DANIÈL E AKSI FU DEN PRUBERI TIN DEI LUKU FA DEN O DE

24. Sortu sani Danièl ben aksi, so taki den ben kan pruberi luku fa den ben o de?

²⁴ Danièl ben aksi a waktiman fu pruberi tin dei luku fa den o de, fu di a ben taki: „Grantangi, pruberi tin dei luku fa den futuboi fu yu o de, èn meki den gi wi gruntu di wi kan nyan èn watra di wi kan dringi; èn meki wi nanga den pikin di e nyan den switisani fu a kownu kon na yu fesi, èn du nanga den futuboi fu yu akruderi a sani di yu e si.”​—Danièl 1:12, 13.

25. San ben de kande den „gruntu” di Danièl nanga den dri mati fu en ben kisi?

²⁵ ¿Den fesi ben sa „sari” te den ben teki den gersi den trawan efu den ben sa libi tin dei langa fu ’gruntu nanga watra’? Den vertaal „gruntu” fu wan Hebrew wortu di moro furu wani taki „siri”. Wan tu bijbelvertaling e vertaal en nanga „pesi” èn sma e taki dati na „den siri fu difrenti pesi-sortu (soleki pesi, bonki, noso linze) di sma ben kan nyan”. Son sabiman e denki taki den tra tekst na ini a kapitel e sori taki a ben de nyanyan di ben abi moro leki siri wawan di sma ben kan nyan. Wan buku e taki: „San Danièl nanga den kompe fu en ben e aksi ben de soifri gruntu nyanyan di a gewoon pipel ben e nyan na presi fu a nyanyan fu a kownu tafra di ben lai nanga ala sortu switi nyanyan nanga meti.” So bun, gruntu ben kan de gosontu nyanyan di den ben bori nanga bonki, komkomro, knofroku, prèi, linze, watramun nanga ayun nanga brede di meki fu difrenti siri-nyanyan. A no de fu taki dati no wan sma ben sa si disi leki nyanyan di ben o meki sma dede safrisafri. Soleki fa a sori, dan a waktiman ben frustan a tori. „Te fu kaba, a ben arki den fu a tori disi èn a  ben pruberi tin dei luku fa den ben o de” (Danièl 1:14). San ben de a bakapisi?

26. San ben de a bakapisi fu den tin dei di den ben pruberi luku fa den ben o de, èn fu san ede sani ben waka na a fasi dati?

²⁶ „Na a kaba fu tin dei a ben gersi leki a fesi fu den ben moro betre èn moro fatu leki ala den pikin di ben e nyan den switisani fu a kownu” (Danièl 1:15). A sani disi no musu teki leki wan buweisi taki wan nyanyan fu soso gruntu bun moro a wan di lai nanga ala sortu switisani nanga meti. Tin dei na wan syatu ten gi awansi sortu nyanyan fu abi bakapisi di de fu si, ma a no syatu tumusi gi Yehovah fu doro a marki di a ben abi na prakseri. „A blesi fu Yehovah — dati na san e meki sma kon gudu, èn a no e poti pen na tapu”, a Wortu fu En e taki (Odo 10:22). Den fo yongu Hebrewsma ben poti den bribi nanga frutrow na ini Yehovah èn a no ben libi den. Hondrohondro yari na baka, Yesus Krestes ben tan na libi sondro nyanyan 40 dei langa. Nanga a sani disi na prakseri, a ben gebroiki den wortu di de fu feni na Deuteronomium 8:3, pe wi e leisi: „Wan sma no e libi fu brede wawan, ma fu ibri wortu fu Yehovah en mofo.” Na ondrofeni fu Danièl nanga den kompe fu en de wan bun eksempre fu a sani disi.

INZICHT NANGA KONI NA PRESI FU SWITISANI NANGA WIN

27, 28. Na sortu fasi a nyan di Danièl nanga den dri mati fu en no ben nyan ala sani ben sreka den gi moro bigi sani di ben de na den fesi?

²⁷ Den tin dei ben de wan ten fu pruberi luku nomo fa den ben o de, ma den bakapisi ben overtoigi sma srefisrefi. „Fu dati ede a waktiman ben tan puru den switisani fu den nanga a win di den ben musu dringi èn ben tan gi den gruntu” (Danièl 1:16). A no muilek fu prakseri san den tra yongu sma na ini a leriprograma ben e denki fu Danièl nanga den kompe fu en. Fu weigri fu teki prati na wan fesa-nyanyan fu wan kownu èn nyan gruntu ibri dei na ini a presi fu dati, ben musu gersi wan tumusi don sani gi den tra yongu sma. Ma bigi tesi nanga problema ben o pasa heri esi èn disi ben o  aksi fu den yongu Hebrewsma fu du ala sani fu de na ai èn fu no nyan pasa marki. Ma moro furu a ben de a bribi nanga a frutrow fu den na ini Yehovah di ben sa yepi den pasa a tesi fu den na tapu a bribi fu den.​—Teki gersi Yosua 1:7.

²⁸ Buweisi taki Yehovah ben de nanga den yongu sma disi de fu si na ini san e kon now: „Èn na den pikin disi, den fo, a tru Gado ben gi sabi nanga inzicht na ini ala fasi fu skrifi sani nanga koni; èn Danièl srefi ben abi frustan fu ala sortu fisyun nanga ala sortu dren” (Danièl 1:17). Fu man kakafutu gi den muilek ten di ben o kon, dan den ben abi moro leki krakti na skin fasi nanga bun gosontu fanowdu. „Te koni e kon na ini yu ati èn sabi srefi e tron wan prisiri sani gi yu eigi sili, dan a krakti fu man denki srefi sa hori wakti gi yu, a koni fu si sani krin srefi sa kibri yu, fu frulusu yu fu a takru pasi” (Odo 2:10-12). Dati na soifri san Yehovah ben gi den fo getrow yongu sma fu sreka den fu san ben de na den fesi.

29. Fu san ede Danièl ben man „abi frustan fu ala sortu fisyun nanga ala sortu dren”?

²⁹ Buku skrifi taki Danièl „ben abi frustan fu ala sortu fisyun nanga ala sortu dren”. Disi no wani taki dati a ben tron wan lukuman. San moi fu si na taki ala di sma e si Danièl leki wan fu den bigi Hebrew profeiti, toku noiti santa yeye ben meki en taki den sortu wortu disi soleki „disi na san a Soeverein Masra Yehovah taki” noso „disi na san Yehovah fu den legre taki” (Yesaya 28:16; Yeremia 6:9). Toku, soso na ondro a tiri fu Gado santa yeye, Danièl ben man frustan èn fruklari fisyun nanga dren di ben tyari a prakseri fu Yehovah kon na krin.

TE FU KABA, A TUMUSI PRENSPARI TEN DORO FU PRUBERI LUKU FA DEN O DE

30, 31. Fa a bosroiti di Danièl nanga den kompe fu en ben teki ben sori taki a ben abi wini gi den?

³⁰ Den dri yari fu kisi leri baka èn fu kisi sreka ben kon na wan kaba. Now a tumusi prenspari ten fu pruberi luku fa den o de ben kon — wan takimakandra fu densrefi nanga a kownu.  „Èn baka den dei di a kownu ben taki fu tyari den kon na inisei, dan na edeman fu den dinari fu kownu oso ben tyari den kon na fesi Nebukadnesar tu” (Danièl 1:18). A ten ben doro gi den fo yongu sma fu gi frantiwortu fu densrefi. ¿A tan di den ben tan hori densrefi na den wet fu Yehovah ben sa sori taki a abi moro wini gi den leki fu teki den fasi fu Babilon abra?

³¹ „A kownu ben bigin taki nanga den, èn no wan fu den ben de leki Danièl, Hananya, Misaèl nanga Asarya; èn den ben tan tanapu na fesi a kownu” (Danièl 1:19). ¡A sani disi ben regtfardiki krinkrin a fasi fa den ben handri den dri yari di ben pasa! A no ben de wan don sani fu den sei fu tan hori densrefi na a sortu nyanyan di a bribi nanga konsensi fu den ben gi pasi fu nyan. Fu di den ben de getrow ini san ben kan gersi wan pikin sani, meki Danièl nanga den mati fu en ben kisi blesi nanga moro bigi sani. A grani fu „tanapu na fesi a kownu” ben de a marki di ala den yongu sma di ben de na ini a leriprograma ben suku fu doro. Bijbel no e taki efu den fo Hebrew yongu sma ben de den wan-enkriwan di a kownu ben teki. Awansi fa a no fa, a getrow waka nanga libi fu den ben gi den „furu pai”.​—Psalm 19:11.

32. Fu san ede wi kan taki dati Danièl, Hananya, Misaèl nanga Asarya ben abi wan grani di ben moro bigi leki a de di den ben de na ini kownu oso?

³² „¿Yu si wan man di sabi en wroko? Na fesi kownu a sa tanapu”, na so den Buku fu Bijbel e taki (Odo 22:29). So bun, Nebukadnesar ben teki Danièl, Hananya nanga Misaèl, so taki den ben kan tanapu na fesi a kownu, dati wani taki, fu de wan memre fu a grupu raiman nanga tiriman fu kownu. Na ini ala den sani disi wi kan si fa na anu fu Yehovah e seti sani, so taki nanga yepi fu den yonkuman disi — spesrutu nanga yepi fu Danièl — prenspari tori di En ben abi na prakseri ben sa meki bekènti. Ala di a ben de wan grani, taki den ben teki den fu de memre fu a grupu raiman nanga tiriman fu Nebukadnesar, toku a ben de wan moro bigi grani taki na Universeel Kownu, Yehovah, ben gebroiki den na so wan tumusi moi fasi.

33, 34. (a) Fu san ede a kownu ben fruwondru fu den yongu Hebrewsma? (b) San wi kan leri fu na ondrofeni fu den fo Hebrewsma?

 ³³ Nebukadnesar ben kon si esi-esi taki a koni nanga inzicht di Yehovah ben gi den fo Hebrew yongu sma ben moro hei srefisrefi leki di fu ala den raiman nanga koniman makandra fu kownu oso. „Èn ibri sani fu koni nanga frustan di a kownu ben aksi den, a ben si taki den ben de tin tron moro bun leki ala den priester di e du towfruwroko nanga ala den lukuman di ben de na ini a heri kontren fu en kownukondre” (Danièl 1:20). ¿A ben kan de tra fasi? Den „priester di e du towfruwroko” nanga „den lukuman” ben frutrow na tapu den grontapu leri fu Babilon nanga leri di abi fu du nanga kruktubribi, ala di Danièl nanga den mati fu en ben poti den frutrow na tapu a koni fu tapusei. ¡Wi no kan teki a wan gersi a trawan srefisrefi — no wan strei de ini disi!

³⁴ Sani no kenki furu trutru na ini den yarihondro di pasa. Na ini a fosi yarihondro G.T., di Griki filosofia nanga wet fu Rome ben pôpi, dan na apostel Paulus ben skrifi nanga yepi fu Gado en santa yeye: „Bika a koni fu a grontapu disi na don sani gi Gado; bika Buku skrifi: ’A e fanga den koniwan na ini den eigi trikifasi.’ Èn agen: ’Yehovah sabi taki den sani di den koniman e prakseri no warti noti.’ Fu dati ede, no meki no wan sma meki bigi gi trawan” (1 Korentesma 3:19-21). Na ini a ten disi, wi musu hori tranga na san Yehovah leri wi èn no meki moi sani fu grontapu di e hari sma, abi krakti na wi tapu na wan makriki fasi.​—1 Yohanes 2:15-17.

GETROW TE NA A KABA

35. O furu wi kon sabi fu Danièl nanga den dri kompe fu en?

³⁵ A tranga bribi fu Hananya, Misaèl nanga Asarya e kon na krin heri bun na ini Danièl kapitel 3, ini a tori fu a gowtu popki fu Nebukadnesar na a lagipresi fu Dura èn ini a tori fu a tesi fu a bun faya onfu. Tweifri no de taki den Hebrewsma disi di ben abi frede gi Gado, ben tan getrow na Yehovah te na a dede fu den. Wi sabi dati, bika sondro tweifri na apostel Paulus ben sori go na den, di a ben skrifi fu den wan „di nanga yepi fu bribi . . . ben man tapu a krakti fu faya” (Hebrewsma  11:33, 34). Den na tumusi moi eksempre gi futuboi fu Yehovah, gi yonguwan nanga owruwan.

36. Sortu tumusi moi libiwroko Danièl ben abi?

³⁶ Ini a tori fu Danièl, a lasti vers fu kapitel 1 e taki: „Danièl ben tan te leki a fosi yari fu Kownu Sirus.” Historia e tyari kon na krin taki Sirus ben wini Babilon na ini wán neti, na ini 539 b.G.T. Soleki fa a sori, dan fu a bun nen nanga posisi fu en, meki Danièl ben tan dini leki wan memre fu a kownu oso fu Sirus. Fu taki en leti, Danièl 10:1 e fruteri wi taki „na ini a di fu dri yari fu Sirus, a kownu fu Persia”, Yehovah ben tyari wan prenspari afersi kon na krin gi Danièl. Efu a ben de wan tini di den ben tyari en go na Babilon na ini 617 b.G.T., dan a ben sa musu de pikinmoro 100 yari di a ben kisi a lasti fisyun dati. ¡Disi ben de wan langa ten fu wan blesi libiwroko fu getrow diniwroko gi Yehovah!

37. San wi kan leri fu Danièl kapitel 1?

³⁷ A fosi kapitel fu a buku Danièl e fruteri moro leki wan tori fu fo getrow yongu sma di ben kakafutu gi tesi tapu a bribi fu den nanga bun bakapisi. A e sori wi fa Yehovah kan gebroiki suma A wani fu meki en prakseri kon tru. A tori e buweisi taki efu Yehovah gi pasi, dan wan sani di ben kan gersi wan rampu, kan abi wan bun sani leki bakapisi. Èn a e fruteri wi taki getrowfasi na ini pikin sani e tyari wan bigi pai kon.

SAN YU BEN KON FRUSTAN?

• San wi kan taki fu a kweki di Danièl nanga den dri yongu mati fu en ben kisi?

• Fa a moi kweki di den fo Hebrew yongu sma ben kisi, ben kisi tesi na Babilon?

• Fa Yehovah ben gi den fo Hebrewsma pai fu a deki-ati bosroiti di den ben teki?

• San futuboi fu Yehovah na ini a ten disi kan leri fu Danièl nanga den dri kompe fu en?

[Aksi fu a tori disi]

 [Prenki di e tapu heri bladzijde 30]