MI MAMA! San e pasa dya? A boi di didon na gron kisi bigi mankeri? Luku, wan fu den man di e komoto na a oso kon, na Paulus! Yu kan si Timoteyus drape tu? A boi ben fadon komoto na a fensre?

Iya, na dati pasa didyonsrode. Paulus ben e taki nanga den disipel dya na Troas. A ben sabi taki a no ben o si den moro fu wan langa pisi ten, fu di a tamara fu en a ben musu gowe nanga boto. Dati meki a e tan taki doro te mindrineti.

We, a boi disi, di nen Etikus, ben sidon na a fensre èn a ben fadon na sribi. A ben lasi en balansi, èn ben fadon komoto na a fensre fu a di fu dri sodro go na gron! Now yu kan frustan fu san ede den sma e broko den ede so. Den e opo en èn a de leki fa den ben denki: A dede!

Te Paulus si taki a boi dede, a e go didon na en tapu nanga en anu lontu en. Dan a e taki: ’Un no broko un ede. A e go bun nanga en!’ Iya fu tru, wan wondru e pasa! Paulus ben meki a boi kon baka na libi! Ala sma de nanga bigi prisiri.

Den alamala e go na sodro baka èn e nyan makandra. Paulus e tan taki doro teleki dei broko. Ma yu kan de seiker taki Etikus no e fadon na sribi moro! Baka dati, dan Paulus nanga Timoteyus nanga den wan di e waka nanga den e go na boto. Yu sabi pe den e go?

Paulus o kon klari dyonsro nanga en di fu dri preikiwaka èn a de na pasi e go na oso. Tapu a waka disi Paulus ben tan dri yari langa soso na a foto Efeise wawan. Sobun, a waka disi ben moro langa leki a di fu tu waka fu Paulus.

Baka di den komoto na Troas, a boto e tan fu wan pisi ten na Mileite. Fu di Efeise de wan tu kilometer fu drape nomo, meki Paulus e seni kari den owruman fu a gemeente fu kon na Mileite, so taki a kan taki fu a lasti tron nanga den. Te a ten doro fu a boto gowe, dan den alamala e sari srefisrefi taki Paulus musu gowe.

Te fu kaba, a boto e go baka na Sesarea. Aladi Paulus e tan dya na a oso fu a disipel Filipus, dan a profeiti Agabus e kon warskow Paulus. A e taki dati Paulus sa de wan strafuman te a kon na Yerusalem. Disi e pasa trutru so. Baka di Paulus tan tu yari na dungru-oso na Sesarea, dan den e seni en go na Rome fu a Kèiser fu Rome yere en. Meki wi go luku san e pasa tapu a waka fu go na Rome.