LUKU fa ala sani moi dya na grontapu! Luku a grasi, den moi bon, den bromki nanga ala den meti. Yu kan sori pe den asaw nanga den lew de?

Fa a moi dyari disi ben du kon? We, meki wi go luku fa Gado ben sreka grontapu heri bun gi wi.

Na a fosi presi, Gado ben meki grun grasi fu tapu a gron. A ben meki ala sortu pikinpikin prani nanga busibusi nanga bigi bon sosrefi. Den sani disi di e gro no e meki grontapu moi nomo, ma furu fu den e gi wi nyanyan tu di switi srefisrefi.

Bakaten Gado ben meki fisi nanga fowru. A ben meki dagu, pusipusi nanga asi — bigi meti nanga pikin meti. Sortu meti e libi na ini yu birti? Wi no musu breiti taki Gado ben meki ala den sani disi gi wi?

Te fu kaba, Gado ben meki wan pisi fu grontapu tron wan spesrutu presi. A ben kari en a dyari fu Eden. A dyari disi ben bun dorodoro. Ala sani drape ben moi srefisrefi. Gado ben wani, taki heri grontapu ben sa tron leki a moi dyari disi.

Ma luku a prenki fu a dyari disi ete wan tron. Gado ben si taki wan sani ben mankeri ete. Yu sabi san na dati? Meki wi go luku.