San a dopu fu yu wani taki
Kapitel twarfu
San a dopu fu yu wani taki
1. Fu san ede a dopu na ini watra musu de wan prenspari sani gi ibriwan fu wi?
NA INI a yari 29 G.T., Yesus ben teki dopu. Yohanes a Dopuman ben dukrun Yesus en heri skin na ini a watra fu a Yordanliba. Yehovah srefi ben e luku èn a ben taki dati a ben feni disi bun (Mateyus 3:16, 17). Na so fasi Yesus ben gi wan eksempre di ala den disipel fu en ben o teki abra. Dri nanga afu yari baka dati Yesus taigi den disipel fu en san den ben musu du: „Mi kisi ala makti na ini hemel èn na grontapu. Fu dati ede, go na ala kondre èn meki sma tron disipel, èn dopu den na ini a nen fu a Tata, fu a Manpikin èn fu a santa yeye” (Mateyus 28:18, 19). Yu dopu soleki fa Yesus ben taki drape? Efu dati no de so, dan yu e seti sani fu du dati?
2. Sortu aksi musu kisi piki ini a tori fu dopu?
2 Awinsi yu dopu kaba noso yu e seti sani fu teki dopu, toku a de prenspari gi ibriwan sma di wani dini Yehovah èn di wani libi na ini en regtfardiki nyun grontapu, fu frustan bun san a dopu wani taki. Wi musu kon sabi den piki tapu den aksi disi: A Kresten dopu na ini a ten disi wani taki a srefi leki san a dopu fu Yesus ben wani taki? San a wani taki fu teki dopu „na ini a nen fu a Tata, fu a Manpikin èn fu a santa yeye”? Sortu frantwortu wi abi te wi e teki dopu na ini watra leki Kresten?
A dopu fu Yohanes
3. Suma wawan Yohanes ben e dopu?
3 Sowan siksi mun bifo Yesus teki dopu, dan Yohanes a Dopuman go preiki na ini a gran sabana fu Yudea, èn a taki: „Un musu abi berow, bika a kownukondre fu hemel de krosibei kaba” (Mateyus 3:1, 2). Sma ben yere san Yohanes ben taki èn den gi yesi na en. Den taki fu den sondu fu den, den sori berow, èn baka dati den kon na Yohanes fu a ben kan dopu den na ini a Yordanliba. A dopu dati ben de soso gi den Dyu.—Lukas 1:13-16; Tori fu den Apostel 13:23, 24.
4. Fu san ede a ben de tumusi prenspari gi den Dyu fu a fosi yarihondro fu sori berow?
4 A ben de tumusi prenspari gi den Dyu dati fu sori berow. Na tapu a Sinaibergi na ini a yari 1513 b.G.T., den fositen tata fu den ben meki wan frubontu, noso wan seryusu kruderi, na mindri a pipel fu den nanga Yehovah Gado. Ma fu di den ben e du seryusu sondu, dati meki den no ben tyari den frantwortu di den ben abi na ini a frubontu dati. Leki bakapisi fu dati den ben kisi krutu. Di Yesus ben kon na grontapu, dan sani no ben e waka bun nanga den kwetikweti. Maleaki ben taki na fesi fu „Yehovah en bigi dei di e gi frede”, èn a dei dati ben de krosibei. Na ini 70 G.T. a „dei” dati doro di den legre fu Rome ben pori Yerusalem nanga en tempel èn den ben kiri moro leki wán milyun Dyu. Bifo a foto dati ben kisi pori, dan Gado ben seni Yohanes a Dopuman di ben de fayafaya gi a tru anbegi, so taki a ben kan „sreka gi Yehovah wan pipel di de klariklari”. Den ben musu abi berow fu den sondu di den ben du teige a Wetfrubontu fu Moses èn den ben musu de klariklari tu fu teki Yesus, a Manpikin fu Gado, di Yehovah ben o seni go na den.—Maleaki 4:4-6; Lukas 1:17; Tori fu den Apostel 19:4.
5. (a) Fu san ede Yohanes ben aksi ensrefi efu Yesus ben musu teki dopu? (b) San a dopu fu Yesus ben wani taki?
5 Wan fu den sma di ben kon na Yohanes fu teki dopu ben de Yesus srefi. Ma fu san ede a ben du dati? Yohanes ben sabi taki Yesus no ben abi sondu. Fu dati ede Yohanes taki: „Na yu musu dopu mi, ma now yu e kon na mi?” Ma a dopu fu Yesus ben wani taki wan tra sani. Fu dati ede Yesus piki en taki: „Meki wi du en so disi leisi, bika na a fasi disi wi e du ala sani di regtfardiki” (Mateyus 3:13-15). Fu di Yesus no ben abi sondu, dati meki a dopu fu en no wani taki dati a ben abi berow fu sondu. A no ben abi fu gi ensrefi abra na Gado tu, fu di a ben de wan memre fu a Dyu pipel di ben gi ensrefi abra kaba na Yehovah. Na presi fu dati, a teki di a teki dopu di a ben abi 30 yari, ben de wan aparti sani. A dopu fu en ben wani taki dati a ben e gi ensrefi na en hemel Tata fu du ala san A ben wani.
6. Fa Yesus sori taki a wani fu Gado ben de wan seryusu sani gi en?
6 Gado ben wani taki Krestes Yesus ben musu du wan wroko di abi fu du nanga a Kownukondre (Lukas 8:1). Boiti dati, Gado ben wani tu taki a gi en volmaakti libisma libi leki wan lusu-paiman èn leki a fondamenti gi wan nyun frubontu (Mateyus 20:28; 26:26-28; Hebrewsma 10:5-10). Yesus ben tan hori na prakseri san a dopu fu en ben wani taki. A no ben meki tra sani hari en prakseri. Te na a kaba fu en libi na grontapu, a tan du a wani fu Gado na wan getrow fasi, èn a ben meki a preiki fu a Kownukondre fu Gado de a moro prenspari wroko na ini en libi.—Yohanes 4:34.
San a dopu di Kresten disipel e dopu na ini watra wani taki
7. Fa den Kresten ben musu dopu sma sensi a Pinksterfesa fu 33 G.T.?
7 Yohanes ben e dopu den fosi disipel fu Yesus na ini watra èn baka dati a ben seni den go na Yesus fu tron memre fu a Kownukondre fu hemel (Yohanes 3:25-30). Na ondro a tiri fu Yesus, den disipel disi ben e dopu sma tu. A dopu disi ben wani taki a srefi leki a dopu fu Yohanes (Yohanes 4:1, 2). Ma sensi a Pinksterfesa fu 33 G.T. den bigin dopu sma „na ini a nen fu a Tata, fu a Manpikin èn fu a santa yeye”, soleki fa den ben kisi a komando fu du dati (Mateyus 28:19). Yu sa kisi wini te yu e luku san dati wani taki.
8. San a wani taki fu dopu „na ini a nen fu a Tata”?
8 San a wani taki fu dopu „na ini a nen fu a Tata”? Disi wani taki dati wi musu frustan krin san a nen fu en wani taki èn san na a posisi fu en. Wi musu bribi tu taki en abi ala makti. Boiti dati, wi musu du san a abi na prakseri èn wi musu gi yesi na den wet fu en. Meki wi luku moro fini san disi wani taki. (1) Psalm 83:18 e taki fu a nen fu en: „Yu, di nen na Yehovah, yu wawan na a Moro Heiwan na heri grontapu.” (2) A buku 2 Kownu 19:15 e sori san na a posisi fu en: „O Yehovah, . . . yu wawan na a tru Gado.” (3) Openbaring 4:11 e fruteri wi disi fu a makti fu en: „Na yu, Yehovah Gado, warti fu kisi glori nanga grani nanga makti, bika na yu meki ala sani; fu di yu wani, meki den ben de na libi èn fu yu wani ede yu ben meki den.” (4) Wi musu bribi tu taki Yehovah na a Sma di gi wi libi èn di sa frulusu wi fu sondu nanga dede: „Na Yehovah e frulusu sma” (Psalm 3:8; 36:9). (5) Wi musu agri taki Yehovah na a Moro Hei Sma di abi a reti fu poti wet gi wi: „Yehovah na wi Krutuman, Yehovah na a Sma di e gi wi Wet, Yehovah na wi Kownu” (Yesaya 33:22). Fu di Yehovah de ala den sani disi, meki wi e kisi a rai: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.”—Mateyus 22:37.
9. San a wani taki fu dopu „na ini a nen . . . fu a Manpikin”?
9 San a wani taki fu dopu „na ini a nen . . . fu a Manpikin? Disi wani taki dati wi musu frustan krin san a nen fu Yesus Krestes wani taki. Wi musu frustan tu san na a posisi fu en èn sortu makti a kisi. En nen, Yesus, wani taki „Yehovah na frulusu”. A posisi fu Yesus na taki a de a wan-enkri Manpikin fu Gado, a fosi sma di Gado meki (Mateyus 16:16; Kolosesma 1:15, 16). Yohanes 3:16 e fruteri wi a sani disi fu a Manpikin: „Gado ben lobi grontapu [den sma di kan kisi frulusu] so te, taki a gi wi en wan-enkri Manpikin, so taki ala sma di sori taki den e bribi na ini en, no ben sa dede, ma taki den kan kisi têgo libi.” Fu di Yesus ben tan getrow te na dede, dati meki Gado ben gi en wan opobaka èn a ben gi en moro makti. Soleki fa na apostel Paulus ben taki, dan Gado „gi [Yesus] a moro hei makti” na hemel nanga grontapu. Baka Yehovah, dan Yesus na a moro makti sma. Na fu dati ede ala sma „musu boigi den kindi na ini a nen fu Yesus, èn ibri tongo sa taki krin dati Yesus Krestes na Masra, so taki Gado a Tata kan kisi glori” (Filipisma 2:9-11). Disi wani taki dati wi musu gi yesi na den komando fu Yesus, di e kon fu Yehovah srefi.—Yohanes 15:10.
10. San a wani taki fu dopu „na ini a nen . . . fu a santa yeye”?
10 San a wani taki fu dopu „na ini a nen . . . fu a santa yeye”? Disi wani taki dati wi musu frustan o prenspari a santa yeye de èn fa a e wroko. Ma san na a santa yeye? A de a wroko krakti fu Yehovah, di A e gebroiki fu du san a abi na prakseri. Yesus ben taigi den disipel fu en: „Mi o aksi a Tata èn a o gi unu wan tra yepiman fu de nanga unu ala ten, a yeye fu waarheid” (Yohanes 14:16, 17). San den disipel ben o man du te den ben abi a yeye disi? Yesus ben taigi den moro fara: „Unu sa kisi krakti te a santa yeye kon na un tapu, èn unu sa de kotoigi fu mi na ini Yerusalem èn na ini heri Yudea nanga Samaria, sosrefi te na a moro farawe presi fu grontapu” (Tori fu den Apostel 1:8). Yehovah ben gebroiki a santa yeye tu fu meki sma skrifi Bijbel: „Noiti profeititori ben kon fu libisma srefi, ma a santa yeye ben meki den taki san Gado wani” (2 Petrus 1:21). Sobun, te wi e studeri Bijbel, dan wi e sori taki wi e frustan o prenspari a santa yeye de èn fa a e wroko. Wan tra fasi fa wi e sori disi, na te wi e aksi Yehovah fu yepi wi fu sori „den froktu fu a yeye”, èn dati na „lobi, prisiri, vrede, langa-pasensi, bun-ati, bunfasi, bribi, safri-ati, dwengi yusrefi”.—Galasiasma 5:22, 23.
11. (a) San a dopu wani taki trutru na ini a ten fu wi? (b) Fa a dopu de neleki te wan sma e dede èn e kon na libi baka?
11 Den fosi sma di ben teki dopu soleki fa Yesus ben taki, ben de den Dyu nanga den sma di ben teki a Dyu bribi. A dopu disi ben bigin na ini 33 G.T. Wan syatu pisi ten baka dati, den Samariasma ben kisi a tumusi moi grani tu fu tron Kresten disipel. Baka dati, na ini 36 G.T. sma fu tra kondre di no besnèi ben kisi na okasi disi tu. Bifo den Samariasma nanga den sma fu tra kondre ben teki dopu, dan ibriwan fu den ben musu gi ensrefi abra na Yehovah fu dini en leki disipel fu en Manpikin. Na ini a ten disi, a Kresten dopu na ini watra wani taki a srefi sani ete. A dukrun di yu e dukrun yu heri skin na ondro watra, na wan bun fasi fu sori taki yu gi yusrefi abra na Gado, fu di a dopu de neleki sma e beri yu. Te yu e saka yu heri skin go na ini a watra, dan yu ben sa kan taki dati yu e dede, fu di yu no e libi moro soleki fa yu ben gwenti libi fosi. Na opo di yu e opo kon fu a watra e sori taki yu kon na libi fu du a wani fu Gado. Ala sma di e tron tru Kresten e teki a „wán dopu” disi. Te den e teki dopu, dan den e tron Kresten Kotoigi fu Yehovah, dinari fu Gado.—Efeisesma 4:5; 2 Korentesma 6:3, 4.
12. Nanga san wi kan agersi a Kresten dopu na ini watra, èn fu san ede wi kan taki dati?
12 A de tumusi prenspari gi wan sma fu teki a dopu disi, fu di dati kan meki a sma kisi frulusu fu Gado. Fu eksempre, Petrus ben taki fu Noa di ben meki wan ark èn na ark dati ben yepi Noa nanga en osofamiri fu pasa a Frudu. Petrus ben skrifi fu a tori disi: „A sani di wi kan agersi nanga disi, namku a dopu (disi no e puru a doti fu a skin, ma disi na a bun konsensi di wi e aksi Gado), e frulusu unu tu nanga yepi fu na opobaka fu Yesus Krestes” (1 Petrus 3:21). Na ark ben de wan krinkrin buweisi taki Noa ben du a wroko fu Gado na wan getrow fasi. Di a ben kaba bow na ark, dan „a grontapu fu a ten dati ben kisi pori di watra ben sungu en” (2 Petrus 3:6). Ma na ark ben tyari Noa nanga en osofamiri, „aiti sili, na tapu a watra sondro taki wan ogri miti den”.—1 Petrus 3:20.
13. Fu san wan Kresten e kisi frulusu te a e teki dopu na ini watra?
13 Na ini a ten disi, te sma e gi densrefi abra na Yehovah fu di den poti bribi na ini Krestes di ben kisi wan opobaka, dan den e teki dopu fu sori taki den gi densrefi abra. Baka dati, den e du san Gado e fruwakti fu den na ini a ten disi èn den e kisi frulusu tu fu na ogri grontapu fu now (Galasiasma 1:3, 4). Den no sa kisi pori moro makandra nanga na ogri grontapu fu now. Gado e kibri den fu a pori disi, èn a e yepi den fu abi wan krin konsensi. Na apostel Yohanes e gi den futuboi fu Gado a dyaranti disi: „Grontapu e pasa gowe nanga den lostu fu en, ma a sma di e du a wani fu Gado, e tan fu têgo.”—1 Yohanes 2:17.
Wi musu tyari den frantwortu fu wi
14. Te wan sma e teki dopu, dan fu san ede dati wawan no de wan dyaranti taki a sma sa kisi frulusu?
14 A ben o de wan fowtu sani fu taki dati a dopu wawan nofo kaba fu meki wan sma kisi frulusu. Wan sma sa man kisi frulusu soso te a gi ensrefi abra na Yehovah trutru na ini a nen fu Yesus Krestes, èn te a e du a wani fu Gado na wan getrow fasi te na dede. „A sma di horidoro te na a kaba, sa feni frulusu.”—Mateyus 24:13.
15. (a) San Gado e fruwakti na ini a ten disi fu den Kresten di dopu? (b) O prenspari a musu de gi wi taki wi de wan disipel fu Krestes?
15 A wani fu Gado ben abi fu du sosrefi nanga a fasi fa Yesus ben musu gebroiki en libi leki libisma. Yesus ben musu dede fu gi en libi leki wan srakti-ofrandi. Fa a de nanga wi? Wi musu gi wi skin na Gado, èn a fasi fa wi e libi musu sori taki wi no e suku wi eigi wini, ma taki wi e du a wani fu Gado (Romesma 12:1, 2). Wi no kan taki kwetikweti dati wi e du a wani fu Gado efu fu espresi, awinsi na wanwan leisi nomo, wi ben o tyari wisrefi leki den sma fu grontapu. Wi no kan taki tu dati wi e du a wani fu Gado efu wi e gebroiki wi libi fu suku wini gi wisrefi, aladi wi e gi pikinso nomo fu wi ten nanga krakti na Gado (1 Petrus 4:1-3; 1 Yohanes 2:15, 16). Di wan Dyu ben aksi Yesus san a ben musu du fu kisi têgo libi, dan Yesus ben taigi en taki a de prenspari trutru taki wan sma e tyari ensrefi na wan krin fasi èn na wan lespeki fasi. Ma baka dati a ben sori en wan sani di ben de moro prenspari leki dati srefi: a ben musu de wan Kresten disipel, wan bakaman fu Yesus. Dati musu de a moro prenspari sani na ini wi libi. Gudu no kan de moro prenspari leki fu de wan disipel fu Krestes.—Mateyus 19:16-21.
16. (a) Sortu frantwortu ala Kresten abi te a abi fu du nanga a Kownukondre? (b) San na wan tu bun fasi fa wi kan du a Kownukondre wroko, soleki fa den prenki na tapu bladzijde 116 nanga 117 e sori? (c) Te wi e teki prati nanga wi heri ati na a preikiwroko, dan san dati e sori?
16 A de prenspari fu taki ete wan leisi, taki Gado ben wani Yesus fu du wan tumusi prenspari wroko di abi fu du nanga a Kownukondre fu Gado. Yesus srefi ben salfu fu tron Kownu. Ma di a ben de na grontapu, dan a ben e preiki fayafaya tu fu a Kownukondre. Wisrefi musu du wan preikiwroko tu, èn furu sani de di e meki taki wi musu du a wroko dati nanga wi heri ati. Te wi e du disi, dan wi e sori taki wi e warderi a tiri fu a moro hei tiriman Yehovah èn wi e sori taki wi lobi tra sma (Mateyus 22:36-40). Wi e sori tu taki wi de na ini wánfasi nanga tra anbegiman na heri grontapu, èn den alamala na Kownukondre preikiman. Na heri grontapu wi alamala e wroko makandra leki wán man fu kisi a têgo libi na grontapu na ondro a tiri fu a Kownukondre dati.
Takimakandra fu luku baka san wi leri
• Sortu sani e difrenti èn sortu sani de a srefi te wi e agersi a dopu fu Yesus nanga a dopu di sma e dopu na ini watra na ini a ten disi?
• San a wani taki fu dopu „na ini a nen fu a Tata, fu a Manpikin èn fu a santa yeye”?
• Sortu frantwortu wi abi te wi teki dopu na ini watra leki Kresten?
[Aksi fu a tori disi]
[Prenki na tapu bladzijde 116, 117]
WAN TU FASI FU MEKI A KOWNUKONDRE BEKÈNTI
Te wi e go oso fu oso
Gi famiriman
Gi sma na wrokope
Gi skoromati
Gi sma na strati
Te wi e go baka na sma di ben arki
Te wi e hori oso-bijbelstudie
