Kapitel tina-aiti

„Den no de wan pisi fu grontapu”

1. (a) Bifo Yesus dede, dan san a ben begi Gado gi den disipel fu en? (b) Fu san ede a de so prenspari fu „no de wan pisi fu grontapu”?

A NETI bifo sma ben kiri Yesus, dan a ben begi gi den disipel fu en. Fu di Yesus ben sabi taki Satan ben o tyari bun furu tesi kon na den tapu, meki a taigi en Tata: „Mi no e begi yu fu puru den na grontapu, ma mi e begi yu fu kibri den gi na ogriwan. Den no de wan pisi fu grontapu, neleki fa mi no de wan pisi fu grontapu” (Yohanes 17:15, 16). Fu san ede a de so prenspari taki wi e hori wisrefi aparti fu grontapu? Na fu di Satan na a tiriman fu a grontapu disi. Kresten no ben sa wani tron wan pisi fu wan grontapu di de na ondro en makti.​—Lukas 4:5-8; Yohanes 14:30; 1 Yohanes 5:19.

2. Fa Yesus no ben de wan pisi fu grontapu?

² Yesus no ben de wan pisi fu grontapu, ma dati no wani taki dati a no ben lobi tra sma. Tra fasi leki dati, a ben e dresi den sikiwan, a ben e gi dedesma wan opobaka, èn a ben e leri sma fu a Kownukondre fu Gado. A ben gi en libi srefi gi ala libisma. Ma a no ben lobi a takru fasi fu denki èn den takru sani di den sma fu a grontapu fu Satan ben e du. Fu dati ede a ben warskow sma fu luku bun fu takru seks lostu no kon na ini den ati. A ben warskow den tu fu no meki gudu de a moro prenspari sani na ini den libi, èn fu no feti fu kisi biginen (Mateyus 5:27, 28; 6:19-21; Lukas 20:46, 47). Fu dati ede, Yesus no ben bumui tu nanga a politiek fu a grontapu disi. Aladi Yesus ben de wan Dyu, toku a no ben e teki sei na ini den politiek strei fu den Romesma nanga den Dyu.

 „Mi kownukondre no de wan pisi fu a grontapu disi”

3. (a) Fa den Dyu kerki fesiman ben kragi fu Yesus na fesi Pilatus, èn fu san ede den ben du dati? (b) Fa wi kan si taki Yesus no ben wani tron wan libisma kownu?

³ Prakseri san ben pasa di den Dyu kerki fesiman ben seni sma fu kisi Yesus èn ben tyari en go na Pontius Pilatus, a tiriman fu Rome. A tru tori ben de, taki den fesiman disi ben atibron fu di Yesus ben tyari a hoigrifasi fu den kon na krin. Fu di den ben wani a tiriman fu strafu Yesus, dati meki den ben kragi fu Yesus, taki: „Wi feni taki a man disi e sutu faya gi a pipel fu wi, meki den no pai Caesar belasting moni èn a e taki tu dati en na Krestes, wan kownu” (Lukas 23:2). A de krin taki disi ben de wan lei, fu di wán yari na fesi a pipel ben wani meki Yesus kon tron kownu, ma Yesus no ben wani dati (Yohanes 6:15). Yesus ben sabi taki a ben o tron Kownu na ini hemel (Lukas 19:11, 12). Boiti dati, a no libisma ben o poti en na tapu a kownusturu, ma Yehovah ben o du dati.

4. Fa Yesus ben denki fu a pai di sma ben musu pai belasting moni?

⁴ Soso dri dei bifo den ben kisi Yesus, dan den Fariseiman ben suku fu meki Yesus taki wan sani di ben o gersi leki a no ben wani sma fu pai belasting moni. Ma Yesus ben taki: „Gi mi wan denari, kon mi si. Suma prenki de na tapu èn suma nen skrifi na tapu?” Di den taki „a di fu Caesar”, dan a piki den taki: „We, dan pai Caesar den sani di de fu Caesar, ma pai Gado den sani di de fu Gado.”​—Lukas 20:20-25.

5. (a) San Yesus ben leri den disipel fu en di sma ben kon fu kisi en? (b) Fa Yesus ben tyari kon na krin san a ben du? (c) San ben de a bakapisi fu a krutu dati?

⁵ Yesus no ben e leri sma kwetikweti fu opo densrefi teige den grontapu tirimakti. Di den srudati nanga tra man ben kon fu kisi Yesus, dan Petrus ben hari wan feti-owru, a naki  wan fu den man, koti en yesi puru. Ma Yesus ben taki: „Poti yu feti-owru na en presi baka, bika a sma di e teki a feti-owru, na a feti-owru o kiri en” (Mateyus 26:51, 52). A dei baka dati, Yesus fruteri Pilatus fu san ede a ben du den sani dati. A ben e taki: „Mi kownukondre no de wan pisi fu a grontapu disi. Efu mi kownukondre ben de wan pisi fu a grontapu disi, dan den dinari fu mi ben o feti, so taki den Dyu no ben o kisi mi” (Yohanes 18:36). Pilatus ben kon si taki dati Yesus ’no ben du den ogri di den ben taki dati a du’. Ma fu di opruruman ben tan dwengi Pilatus, dati meki a gi den pasi fu spikri Yesus na wan postu.​—Lukas 23:13-15; Yohanes 19:12-16.

Den disipel e teki na eksempre fu Yesus

6. Fa den fosi Kresten ben sori taki den ben lobi sma, aladi den ben wai pasi gi den takru fasi fu denki fu grontapu?

⁶ Sobun, den disipel fu Yesus ben frustan san a ben wani taki fu no de wan pisi fu grontapu. A ben wani taki dati den ben musu wai pasi gi a takru fasi fu denki nanga den takru sani di den sma fu grontapu ben e du. Disi wani taki tu dati den no ben musu go na den preigron nanga den komedi-oso fu Rome, pe sma ben e luku sani di ben lai nanga ogridu nanga seks tori. Fu di den disipel no ben abi noti fu du nanga den sani disi, meki trawan ben e krutu den taki den no lobi libisma. Ma a no ben de so kwetikweti taki den no ben lobi tra sma. Na presi fu dati, den ben e wroko tranga fu yepi trawan kisi wini fu den sani di Gado seti fu frulusu sma.

7. (a) San den fosi disipel ben ondrofeni fu di den no ben de wan pisi fu grontapu? (b) Fa den ben denki fu den politiek tiriman èn fu a pai di sma ben musu pai belasting moni, èn fu san ede den ben denki so?

⁷ Soleki fa Yesus ben kisi frufolgu, na so den bakaman fu en ben kisi frufolgu tu. Furu tron disi ben pasa, fu di heihei-man na lanti ben yere sani fu den di no tru. Toku, na a  ten fu a yari 56 G.T. na apostel Paulus ben skrifi den Kresten na ini Rome, èn a taigi den taki den ben musu ’saka densrefi na ondro den tiriman fu lanti [politiek tiriman], bika nowan sma kan tiri sondro a primisi fu Gado’. A no de so taki Yehovah e poti den grontapu tirimakti, ma a e gi den pasi fu tiri teleki en Kownukondre wawan sa tiri heri grontapu. Fu dati ede Paulus ben gi Kresten a rai fu lespeki den grontapu tiriman èn fu pai belasting moni.​—Romesma 13:1-7; Titus 3:1, 2.

8. (a) A de so taki Kresten musu saka densrefi na ondro den hei tiriman ala ten? (b) Fa den fosi Kresten ben teki na eksempre fu Yesus?

⁸ Ma Kresten musu saka densrefi na ondro den politiek tiriman solanga den no abi fu pasa den wet fu Yehovah. Te den wet fu libisma e aksi wi fu du wan sani di no e kruderi nanga den wet fu Yehovah, dan den sma di e dini Yehovah musu gi yesi na den wet fu En. Luku san a buku On the Road to Civilization​—A World History e taki fu den fosi Kresten: „Den Kresten ben weigri fu du sonwan fu den wroko di den Romesma ben e du. Den Kresten no ben du srudatiwroko, fu di a sani dati no ben e kruderi nanga a bribi fu den. Den no ben abi wan politiek posisi. Den no ben anbegi a kèiser.” Di a hei krutubangi fu den Dyu ben ’taigi den disipel krin’ taki den ben musu tapu nanga a preikiwroko, dan den disipel piki taki: „Fu di Gado na tiriman, meki wi musu gi yesi na en moro leki na libisma.”​—Tori fu den Apostel 5:27-29.

9. (a) Fu san ede den Kresten na ini Yerusalem lowe komoto fu a foto na ini 66 G.T.? (b) Fa a sani disi de wan bun eksempre?

⁹ Te sma ben e strei nanga makandra fu politiek nanga srudati afersi, dan den disipel no ben e teki sei kwetikweti na ini den strei dati. Na ini 66 G.T., den Dyu na ini Yudea ben opo densrefi teige Caesar. Heri esi a legre fu Rome ben lontu a foto Yerusalem. San den Kresten na ini a foto  ben du? Den ben memre a rai fu Yesus taki den ben musu komoto na ini a foto. Di den Romesma hari gowe fu wan pisi ten, dan den Kresten lowe èn den abra a Yordanliba go na Pela, wan pisi kontren di ben lai nanga bergi (Lukas 21:20-24). Fu di den no ben teki sei na ini den strei disi, meki den poti wan eksempre gi den getrow Kresten di ben o kon baka den.

Kresten no e teki sei na ini grontapu afersi na ini a ten disi

10. (a) Sortu wroko Yehovah Kotoigi e tan du, èn fu san ede? (b) Na ini sortu afersi den no e teki sei?

¹⁰ Fa a de na ini den lasti dei disi? Wan grupu sma ben de di no teki sei kwetikweti na ini grontapu afersi neleki den fosi Kresten? Iya, den sma disi na Yehovah Kotoigi. A heri pisi ten disi den tan preiki fu a Kownukondre fu Gado. A Kownukondre disi na a wan-enkri sani di sa gi den sma di lobi regtfardikifasi, têgo vrede, koloku, nanga ala san den abi fanowdu fu abi wan switi libi (Mateyus 24:14). Ma den no teki sei kwetikweti te kondre ben e strei nanga makandra.

11. (a) Fa den sani di kerki tiriman e du e difrenti krinkrin fu den Kotoigi di no e teki sei na ini grontapu afersi? (b) Fa Yehovah Kotoigi e si den sani di tra sma e du na ini a politiek?

¹¹ Heri tra fasi leki dati, den tiriman fu den kerki fu grontapu moksi densrefi na ini politiek afersi. Na ini wan tu kondre, den du sani fu horibaka noso fu gens sma di e suku fu kisi politiek makti. Sonwan fu den kerki tiriman abi politiek makti srefi. Trawan ben dwengi politiekman fu du sani di den kerki tiriman e feni bun. Ma Yehovah Kotoigi no e teki prati na politiek kwetikweti. Den no e bumui tu nanga san tra sma e du na ini a politiek. Dati meki te wan sma wani tron wan memre fu wan politiek partij, te a e suku fu kisi politiek makti, noso te a e go fu poti en sten gi wan partij, dan den no e pruberi fu gens a sma dati.  Yesus ben taki dati den disipel fu en no ben o de wan pisi fu a grontapu. Sobun, Yehovah Kotoigi no e teki prati na politiek kwetikweti.

12. San ben de a bakapisi fu di den kerki fu a grontapu disi no e hori densrefi aparti fu grontapu afersi?

¹² Soleki fa Yesus ben taki na fesi, dan kondre feti nanga makandra doronomo. Srefi grupu fu sma di e libi na ini a srefi kondre ben feti nanga makandra (Mateyus 24:3, 6, 7). Furu tron den kerki tiriman e horibaka gi a wan kondre noso grupu di e feti teige wan trawan, èn den e gi den bakaman fu den deki-ati fu du a srefi. San na a bakapisi fu disi? Sma fu a srefi bribi e kiri makandra na ini orloku soso fu di den de fu wan difrenti kondre noso lo. Disi no de a wani fu Gado kwetikweti.​—1 Yohanes 3:10-12; 4:8, 20.

13. Sortu buweisi de di e sori taki Yehovah Kotoigi no e teki sei na ini grontapu afersi?

¹³ Ma Yehovah Kotoigi no teki sei na ini nowan strei. The Watchtower fu 1 november 1939 ben taki: „Ibri sma di de na a sei fu Masra, no sa teki sei na ini den feti fu den kondre èn den no sa teki prati na den.” Yehovah Kotoigi na ini ala kondre e tan abi a srefi denki disi, awinsi san e pasa. Den no e meki politiek nanga orloku pori a bradafasi di den abi na heri grontapu. Den „naki den feti-owru fu den kon tron plugu èn den lansri fu den kon tron grasi-nefi”. Fu di den no e teki sei na ini grontapu afersi, meki den no e leri fu feti moro.​—Yesaya 2:3, 4; 2 Korentesma 10:3, 4.

14. San Yehovah Kotoigi ondrofeni fu di den e hori densrefi aparti fu a grontapu?

¹⁴ San na a bakapisi fu di den no e teki sei na ini grontapu afersi? Yesus ben taki: „Fu di unu no de wan pisi fu grontapu, . . . dati meki grontapu e teige unu” (Yohanes 15:19). Furu fu den Kotoigi fu Yehovah ben musu go na strafu-oso fu di den de futuboi fu Gado. Wan tu fu den kisi fonfon èn  sma kiri sonwan fu den srefi, soleki fa den ben du dati nanga den fosi yarihondro Kresten. Den sani disi e pasa fu di Satan, „a gado fu a grontapu disi”, de teige den futuboi fu Yehovah, di no de wan pisi fu a grontapu disi.​—2 Korentesma 4:4; Openbaring 12:12.

15. (a) San o pasa heri esi nanga ala kondre fu a grontapu disi? (b) Fu san ede a de so wan seryusu sani taki wi e hori wisrefi aparti fu grontapu?

¹⁵ Den futuboi fu Yehovah e prisiri taki den no de wan pisi fu grontapu, bika ala den kondre fu a grontapu disi sa kon na wan kaba heri esi na ini Armagedon (Danièl 2:44; Openbaring 16:14, 16; 19:11-21). Disi no sa pasa nanga wi, fu di wi e hori wisrefi aparti fu grontapu. Na heri grontapu, wi alamala e horibaka na wan getrow fasi gi a hemel Kownukondre fu Gado. A tru taki sma e spotu wi èn den e frufolgu wi fu di wi no de wan pisi fu grontapu. Ma heri esi, den sani dati no sa de moro fu di na ogri grontapu disi di de na ondro a makti fu Satan now, sa kisi pori fu têgo. Na a tra sei, den sma di e dini Yehovah sa libi fu têgo na ini en regtfardiki nyun grontapu na ondro a Kownukondre fu Gado.​—2 Petrus 3:10-13; 1 Yohanes 2:15-17.

Takimakandra fu luku baka san wi leri

• Fa Yesus ben sori san a wani taki fu „no de wan pisi fu grontapu”?

• Fa den fosi Kresten ben e si (a) a fasi fa den sma fu grontapu e denki, (b) grontapu tiriman, èn (c) a pai di sma musu pai belasting moni?

• Na sortu fasi Yehovah Kotoigi sori na ini a ten disi, taki leki Kresten den no e teki sei na ini grontapu afersi?

[Aksi fu a tori disi]

 [Prenki na tapu bladzijde 165]

Yesus ben tyari kon na krin taki en nanga den bakaman fu en ’no ben de wan pisi fu grontapu’