Kapitel 93

Te den e tjari a Manpikin foe libisma kon na krin

ALA DI Jesus de na noordsei ete (kande na Samaria noso na Galilea), dan den Fariseiman e aksi en foe a kon di a Kownoekondre sa kon. Den e bribi taki a Kownoekondre sa kon nanga foeroe pranpran èn nanga wan lo opo-opo, ma Jesus e taki: „A kownoekondre foe Gado no e kon nanga aparti sani di sa de foe si, èn sma no sa taki toe: ’Loekoe en dja!’ noso: ’Drape!’ Bika loekoe! a kownoekondre foe Gado de na oen mindri.”

Sontron sma ben vertaal Jesus wortoe „na oen mindri”, nanga den wortoe „na oen ini”. So boen, son sma prakseri taki Jesus ben abi na prakseri taki a Kownoekondre foe Gado e tiri na ini na ati foe den foetoeboi foe Gado. Ma a de krin, taki a Kownoekondre foe Gado no de na ini na ati foe den Fariseiman, di no e bribi èn di Jesus e taki nanga den. Tokoe a de na den mindri, foe di Jesus Krestes, di Gado poti leki Kownoe foe en Kownoekondre, de na den mindri.

A kan de, taki baka di den Fariseiman gowe, dati Jesus e taki moro fara nanga den disipel foe en foe a kon di a Kownoekondre sa kon. A abi spesroetoe en denoja na ini Kownoekondre makti na ini a ten di e kon, na prakseri te a e warskow: „Sma sa taigi oenoe: ’Loekoe en drape!’ noso: ’Loekoe en dja!’ No go noso no waka na baka [den falsi mesias disi]. Bika neleki fa faja e koti na hemel, e skèin go foe a wan kontren na ondro a hemel, go na wan tra kontren na ondro a hemel, na so a Manpikin foe libisma sa de.” So boen, Jesus e sori taki neleki fa sma kan si ini wan boen bigi kontren fa faja e koti na hemel, na so a boeweisi foe en denoja ini Kownoekondre makti sa de krin foe si toe gi ala sma di wani foe si disi.

Baka dati Jesus e teki sani di pasa fositen gersi a ten foe en denoja, foe sori sortoe fasi sma sa abi na ini a ten foe en denoja na ini a ten di o kon. A e tjari kon na krin: „Èn neleki fa a ben pasa na ini den dei foe Noa, na so a sa de toe na ini den dei foe a Manpikin foe libisma . . . Èn neleki fa a ben pasa na ini den dei foe Lot: den ben e njan, den ben e dringi, den ben e bai sani, den ben e seri sani, den ben e prani, den ben e bow. Ma na a dei di Lot ben komoto na Sodom, faja nanga swarfoe ben fadon kon foe hemel leki alen èn ben pori den alamala. Na a srefi fasi a sa go na a dei te a Manpikin foe libisma sa tjari kon na krin.”

Jesus no e taki dati den sma na ini den dei foe Noa nanga Lot ben kisi pori, soso foe di den ben doe den sani di sma gwenti foe doe, leki foe e njan, e dringi, e bai sani, e seri sani, e prani èn e bow. So srefi Noa nanga Lot nanga den osofamiri foe den, ben doe den sani disi toe. Ma den tra sma ben doe den sortoe aladei sani disi sondro foe poti pikinso prakseri srefi na tapoe a wani foe Gado, èn na foe a sani disi ede den alamala ben kisi pori. Foe a srefi sani disi ede, sma sa kisi pori te den e tjari Krestes kon na krin na ini a ten foe a bigi banawtoe di e kon na tapoe a seti foe sani disi.

Jesus e poti krakti na tapoe o prenspari a de foe handri esi-esi na tapoe a boeweisi foe en denoja ini Kownoekondre makti na ini a ten di e kon. A e taki moro fara: „Na a dei dati, no meki a sma di de na tapoe a dak, ma di abi ososani na ini na oso, saka kon na gron foe go teki den, èn no meki a sma di de na a pranigron, drai go baka foe go na den sani di de na en baka. Prakseri a wefi foe Lot.”

Te a boeweisi foe Krestes en denoja e sori ensrefi, dan den sma no moesoe meki a lobi di den lobi den materia goedoe foe den, tapoe den foe handri wantewante. Di a wefi foe Lot ben gowe libi Sodom, dan soleki fa a sori, a ben drai loekoe na baka, foe di a ben angri foe den sani di a ben libi na baka, èn a ben tron wan sowtoe postoe.

Jesus e go doro foe taki foe a situwâsi di ben sa de na a ten foe en denoja na ini a ten di e kon. A e taigi den disipel foe en: „Na a neti dati, toe man sa de na ini wán bedi; a wan den sa tjari gowe, ma a trawan den sa libi na baka. Toe oema sa mara na a srefi miri; a wan den sa tjari gowe, ma a trawan den sa libi na baka.”

A tjari di den e tjari sma gowe, e kroederi nanga a go di Noa nanga en osofamiri ben go na ini na ark èn nanga a tjari di den engel ben tjari Lot nanga en osofamiri gowe foe Sodom. A wani taki froeloesoe. Na a tra sei, a libi di den e libi wan sma na baka, wani taki dati a sma e kisi pori.

Now den disipel e aksi: „Pe, Masra?”

„Pe a skin de, na drape den aka sa kon makandra toe”, Jesus e piki. Den sma di den „tjari gowe” foe kisi froeloesoe, de neleki aka di e si fara, foe di den sma e kon makandra pe „a skin” de. A skin abi foe doe nanga a troe Krestes na a ten foe en denoja ini Kownoekondre makti di wi no kan si nanga wi ai èn nanga a fesa njanjan na jejefasi di Jehovah e gi. Lukas 17:20-37; Genesis 19:26.

▪ Fa a Kownoekondre ben de na mindri den Fariseiman?

▪ Na sortoe fasi a denoja foe Krestes de leki faja di e koti na hemel?

▪ Foe san ede sma sa kisi pori foe den sani ede di den doe na ini a ten foe Krestes denoja?

▪ San a wani taki foe den e tjari wan sma gowe èn foe den e libi wan sma na baka?