Kapitel 56

San e doti wan sma?

SMA e gens Jesus moro nanga moro. No wawan a de so, taki foeroe disipel foe en e gowe, ma den djoe na Judea e soekoe foe kiri en toe, soleki fa den ben doe toe di a ben de na Jerusalem na a ten foe a Paska foe 31 G.T.

Now na a Paska foe 32 G.T. Kande, foe di Jesus e gi jesi na a seti di Gado poti gi sma foe de na a Paska, meki a e go na a Paska na Jerusalem. Ma a e waka nanga koni, foe di sma e soekoe foe kiri en. Baka dati a e drai go baka na Galilea.

Kande Jesus de na Kaperna-um te Fariseiman nanga leriman foe Wet foe Jerusalem e kon na en. Den e soekoe wan sani foe kragi en, taki a pasa a wet na relisi sei. „Foe san ede den disipel foe joe no e hori densrefi na a gwenti foe den sma foe fositen?”, den wani sabi. „Foe eksempre, den no e wasi den anoe te den e go njan.” Disi a no wan seti di Gado ben poti gi sma, ma tokoe den Fariseiman e si en leki wan bigi sondoe te wan sma no e hori ensrefi na a gwenti disi foe wasi en anoe go te na en baka-anoe.

Na presi foe Jesus e piki den na tapoe a kragi foe den, a e sori den taki densrefi e pasa a Wet foe Gado foe espresi na wan ogri fasi. „Foe san ede so srefi oenoe e pasa a gebod foe Gado, foe den gwenti foe oenoe ede?”, a wani sabi. „Foe eksempre, Gado ben taki: ’Lespeki joe papa nanga joe mama’, èn: ’A sma di e skempi papa noso mama moesoe dede.’ Ma oenoe e taki: ’A sma di e taigi en papa noso mama: „Ala san mi abi di mi ben kan jepi joe nanga dati, na wan presenti di gi abra na Gado”, no abi foe gi en papa grani kwetikweti.’”

Den Fariseiman e leri sma troetroe taki moni, goedoe noso iniwan sani di gi abra na Gado leki wan presenti, de foe a tempel, èn no kan gebroiki gi no wan tra sani. Ma te joe loekoe en boen, dan a presenti di gi abra, e tan de a goedoe foe a sma di ben gi dati abra. Na a fasi disi, wan manpikin di e taki nomo taki en moni noso en goedoe na „korban” — wan presenti di gi abra na Gado noso na a tempel — e hari ensrefi poeroe foe en frantiwortoe foe jepi en grani papa nanga mama, di kande e pina troetroe.

Jesus abi leti foe atibron nanga den Fariseiman, foe di den e kenki a Wet foe Gado na wan ogri fasi. A e taki: „Oenoe meki a wortoe foe Gado kon de sondro krakti, foe oen gwenti ede. Oen hoigriman, fa den sani di Jesaja ben taki foe oenoe na profeiti fasi, fiti, di a ben taki: ’A pipel disi e gi mi grani nanga den mofoboeba, ma na ati foe den de fara foe mi. Na foe soso den e tan anbegi mi, foe di den e leri komando foe libisma leki fondamenti leri.’”

Kande na ipi sma ben go tanapoe moro na baka foe gi den Fariseiman na okasi foe poti aksi gi Jesus. Now di den Fariseiman no man piki na tapoe a piri-ai di Jesus piri-ai gi den na wan krakti fasi, a e kari na ipi sma kon na en. „Arki mi”, a e taki, „èn froestan san a wani taki. No wan sani foe dorosei di e go na ini wan sma, kan doti en; ma den sani di e komoto na inisei foe wan sma, na dati e doti wan sma.”

Baka ten, te den e go na ini wan oso, den disipel foe en e aksi en: „Joe sabi taki den Fariseiman ben naki foetoe di den ben jere den wortoe foe joe?”

„Ibri bon di mi Tata no ben prani, a sa hari poeroe”, Jesus e piki. „Meki den doe. Den na breni tjariman. Efoe now, wan breniman e tjari wan breniman, dan den ala toe sa fadon go na ini wan olo.”

A gersi leki Jesus e froewondroe te Petrus e aksi gi den disipel foe tjari a tori kon na krin di abi foe doe nanga san e doti wan sma. „So srefi oenoe no e froestan ete?”, Jesus e piki. „Oenoe no e froestan taki ala san e go na ini a mofo, e pasa go na ini a bere, èn e kon na ini a gotro? Ma san e kon foe a mofo, e kon foe na ati, èn den sani dati e doti wan sma. Foe eksempre, ogri prakseri, kiri, soetadoe, hoeroedoe, foefoeroe, falsi kotoigi nanga te wan sma afrontoe Gado, e kon foe na ati. Disi na den sani di e doti wan sma; ma foe go njan sondro foe wasi anoe, no e doti wan sma.”

Djaso Jesus no e gi sma deki-ati foe no krin densrefi, san na wan aladei sani di sma moesoe doe. A no e taki dati wan sma no abi foe wasi en anoe bifo a e sreka njanjan noso te a e go njan. Jesus e kroetoe moro foeroe a hoigrifasi foe den relisi fesiman, di e proeberi foe hari densrefi poeroe na den regtfardiki wet foe Gado na wan bidrigi fasi, foe di na wan tranga-ede fasi den wani hori densrefi na gwenti di no de foe feni na ini bijbel. Ija, na den ogri di wan sma e doe, na dati e doti en, èn Jesus e sori taki den doe disi e bigin na ini na ati foe wan sma. Johanes 7:1; Deuteronomium 16:16; Mateus 15:1-20; Markus 7:1-23; Exodus 20:12; 21:17; Jesaja 29:13.

▪ Nanga sortoe gens Jesus e kisi foe doe now?

▪ Nanga sortoe kragi den Fariseiman e kon, ma fa den Fariseiman e pasa a Wet foe Gado foe espresi, soleki fa Jesus taki?

▪ San na den sani di e doti wan sma, soleki fa Jesus e tjari kon na krin?