Kapitel 5

Pe èn o ten Jesus ben gebore?

CAESAR Augustus, a keiser foe a Tirimakti foe Rome, meki wan wet taki ala sma moesoe go na a foto pe den ben gebore, foe poti den nen skrifi na ini lantiboekoe. So boen, Josef e go na a foto Betlehem, a presi pe a ben gebore.

Wan lo sma de na Betlehem foe poti den nen skrifi na ini lantiboekoe, èn a wan-enkri presi di Josef nanga Maria kan feni foe tan, na wan pen. Djaso, pe boeriki nanga tra meti e tan, Maria e kisi Jesus. Maria e domroe en na ini pisipisi doekoe èn a e poti en na ini wan njanjan baki, pe den e poti a njanjan foe den meti.

A no de foe taki, dati a ben de na ondro a tiri foe Gado, dati Caesar Augustus ben meki a wet foe en taki sma moesoe poti den nen skrifi na ini lantiboekoe. Disi ben meki taki Jesus ben man gebore na Betlehem, a foto di den Boekoe foe bijbel langaten na fesi kaba ben taki, dati a ben sa de a presi pe a pramisi tiriman ben sa gebore.

Disi na troetroe wan prenspari neti! Na dorosei na ini den wei, wan krin faja e skèin lontoe wan groepoe skapoeman. Na a glori foe Jehovah! Èn na engel foe Jehovah e taigi den: „No frede, bika, loekoe! mi e meki boen njoensoe bekènti foe wan bigi prisiri di a heri pipel sa abi, bika tide na ini a foto foe David, wan Froeloesoeman, di de Krestes, a Masra, ben gebore gi oenoe. Èn disi na wan marki gi oenoe: oenoe sa feni wan beibi di domroe na ini pisipisi doekoe èn di e didon na ini wan njanjan baki foe den meti.” Wantronso foeroe engel moro ete e sori densrefi èn den e singi: „Glori na ini den moro hei presi na Gado, èn na grontapoe vrede na mindri sma foe boen wani.”

Te den engel e gowe, dan den skapoeman e taigi makandra: „Meki wi go wantewante langalanga na Betlehem foe si den sani disi di feni presi èn di Jehovah meki bekènti na wi.” Esi-esi den e go drape èn den e feni Jesus soifri na a presi pe na engel ben taigi den. Te den skapoeman e froeteri san na engel ben taigi den, dan ala sma di e jere dati e froewondroe. Maria e hori ala den sani disi di den sma e taki, na prakseri èn a e kibri den boen na ini en ati.

Na ini a ten disi, foeroe sma e bribi taki Jesus ben gebore tapoe 25 december. Ma december na wan kowroe alenten na Betlehem. Skapoeman no ben sa de na dorosei na ini den wei te neti nanga den skapoe foe den, na ini a ten dati foe a jari. So srefi, a caesar foe Rome no ben sa dwengi wan pipel di ben wani opo densrefi kaba teige en, foe teki a waka dati foe go poti den nen skrifi na ini lantiboekoe, na ini a moro kowroe pisi ten foe winter. Soleki fa a sori, dan Jesus ben gebore froekoefroekoe na ini herfst. Lukas 2:1-20; Mika 5:2.

▪ Foe san ede Josef nanga Maria e teki waka go na Betlehem?

▪ Sortoe froewondroe sani e pasa a neti di Maria e kisi Jesus?

▪ Fa wi sabi taki Jesus no ben gebore tapoe 25 december?