Kapitel 18

Moro mendri sma e go na Johanes, ala di moro e go na Jesus

BAKA a Paska ini a lente foe 30 G.T., Jesus nanga den disipel foe en e gowe libi Jerusalem. Ma den no e go baka na den tanpe foe den na Galilea, ma den e hari go na ini a kondre foe Judea pe den e dopoe sma. Johanes a Dopoeman ben doe a srefi wroko wan sani foe wán jari kaba, èn te now ete disipel e kon foe de nanga en.

Te joe loekoe a tori boen, dan Jesus srefi no e dopoe sma, ma den disipel foe en e doe dati na ondro en tiri. A dopoe di den e dopoe sma wani taki a srefi leki a di foe Johanes. A de wan simbôl taki wan djoe abi berow foe den sondoe di a doe teige a Wetfroebontoe foe Gado. Ma baka, na opobaka foe Jesus, a e leri den disipel foe en foe wan dopoe di wani taki wan tra sani. A kresten dopoe na ini a ten disi na wan simbôl taki wan sma e gi ensrefi abra foe dini Jehovah Gado.

Ma na a bigin disi foe Jesus en diniwroko, en nanga Johanes, ala di den e wroko aparti, e gi leri na sma èn e dopoe sma di abi berow. Ma den disipel foe Johanes e djaroesoe èn den e kragi na en foe Jesus: „Rabi, . . . loekoe, a sma dati e dopoe sma èn ala sma e go na en.”

Na presi foe Johanes e djaroesoe, a e prisiri foe di Jesus abi boen bakapisi, èn a wani, taki den disipel foe en e prisiri toe. A e memre den: „Oensrefi e kotoigi foe mi taki mi ben taki: ’Mi a no a Krestes, ma den seni mi na en fesi.” Dan a e gebroiki wan heri moi agersitori: „A sma di abi a trowmisi, na en na a trowmasra. Ma a mati foe a trowmasra, abi bigi prisiri foe a sten foe a trowmasra ede, te a e tanapoe nanga en èn e jere en. Foe dati ede a prisiri disi foe mi de dorodoro.”

Johanes, leki a mati foe a Trowmasra, ben prisiri so wan siksi moen pasa kaba di a ben meki den disipel foe en kon sabi Jesus. Wan toe foe den ben tron memre foe Krestes en hemel trowmisi-groepoe na ini a ten di ben de na den fesi ete. Den na den kresten di ben salfoe nanga a santa jeje. Johanes wani, taki den disipel di a abi now, moesoe go waka na Jesus baka toe, foe di a abi na prakseri foe sreka a pasi gi a diniwroko foe Krestes di abi boen bakapisi. Soleki fa Johanes a Dopoeman e tjari kon na krin: „Moro sma moesoe tan go na a sma dati, èn moro mendri sma moesoe tan kon na mi.”

Johanes, a njoen disipel foe Jesus, di fosi ben de wan disipel foe Johanes a Dopoeman toe, e skrifi foe pe Jesus komoto èn a prenspari ròl di A abi foe froeloesoe a libisma famiri. A e taki: „A sma di komoto na hemel, hei moro ala tra sma. . . . A Tata lobi a Manpikin èn a poti ala sani na ini en anoe. A sma di e sori bribi na ini a Manpikin, abi têgo libi; a sma di no e gi jesi na a Manpikin, no sa si a libi, ma a bigi atibron foe Gado e tan na en tapoe.”

No langa baka di Johanes a Dopoeman froeteri fa en eigi wroko o kon moro mendri, kownoe Herodes e sroto en. Herodes teki Herodias, a wefi foe en brada Filipus, gi ensrefi èn te Johanes e tjari kon na krin na poebliki taki a kownoe doe wan sani di no fiti, dan Herodes e meki den poti en na ini doengroe-oso. Te Jesus e kisi foe jere taki den sroto Johanes, dan en nanga den disipel foe en e gowe libi Judea foe go na Galilea. Johanes 3:22–4:3; Tori foe den Apostel 19:4; Mateus 28:19; 2 Korentesma 11:2; Markus 1:14; 6:17-20.

▪ San a dopoe di doe na ondro a tiri foe Jesus, wani taki bifo na opobaka foe en? Èn san a wani taki baka na opobaka foe en?

▪ Fa Johanes e sori taki den disipel foe en no e kragi nanga reti?

▪ Foe san ede den e poti Johanes na ini doengroe-oso?