Kapitel 67

Den no man kisi Jesus foe go sroto en

ALA DI a Wiwirikampoe-fesa de ete, den relisi fesiman e seni skowtoe go foe kisi Jesus foe go sroto en. A no e doe moeiti foe go kibri. Na presi foe dati, Jesus e tan gi leri na poebliki, èn a e taki: „Ete wan sjatoe ten mi e tan na oen mindri èn dan mi e go na en di ben seni mi kon. Oenoe sa soekoe mi, ma oenoe no sa feni mi, èn pe mi de, oenoe no man kon.”

Den djoe no e froestan disi, èn foe dati ede den e aksi makandra: „Pe a man disi abi na prakseri foe go, so taki wi no sa feni en? A no abi na prakseri foe go na den djoe di panja na mindri den Grikisma èn gi leri na den Grikisma, a no so? San den wortoe disi wani taki, di a ben taki: ’Oenoe sa soekoe mi, ma oenoe no sa feni mi, èn pe mi de, oenoe no kan kon’?” A no de foe taki, dati Jesus e taki foe a dede foe en di de krosibei èn foe en opobaka foe libi na hemel, pe en feanti no kan go na en baka.

A di foe seibi dei, di de so srefi a lasti dei foe a fesa, e doro. Ibri mamanten foe a fesa, wan priester kanti watra kon, di a ben teki foe a watra-olo foe Siloam, so taki a watra ben lon go na a foetoe foe na altari. Kande Jesus e memre den sma na a aladei gwenti disi, te a e bari taki: „Efoe watra e kiri wan sma, meki a kon na mi èn dringi. A sma di e poti bribi na ini mi, soleki fa Boekoe taki: ’Te foe a moro inisei presi foe en, liba foe libi-watra sa lon.’”

Te joe loekoe en boen, dan Jesus e taki dja foe den toemoesi aparti bakapisi di sma kan froewakti te a santa jeje ben sa kanti kon. A tra jari na tapoe a Pinksterfesa, a santa jeje kanti kon. Te den 120 disipel e bigin foe doe diniwroko gi den sma, dan na drape libi foe libi-watra e lon. Ma te na a dei dati, no wan jeje no de, san wani taki dati no wan disipel foe Krestes salfoe nanga santa jeje èn ben kisi a kari foe go libi na hemel.

Son sma e bigin taki sani na tapoe a leri di Jesus e gi. Den e taki: „Foe troe, disi na A Profeiti.” A de krin, taki den e sori go na a pramisi profeiti di ben sa de moro bigi leki Moses. Trawan e taki: „Disi na a Krestes.” Ma foe di trawan no e agri, meki den e taki: „Te joe loekoe en boen, a Krestes no e kon foe Galilea, a no so? Boekoe no taki dati a Krestes e kon foe a famiri foe David, èn foe Betlehem, a dorpoe pe David ben gwenti foe de?”

So boen, wan prati e kon na mindri na ipi sma. Sonwan wani foe den kisi Jesus go sroto en, ma no wan sma e doe moeiti foe kisi en. Te den skowtoe e drai kon baka sondro Jesus, dan den granpriester nanga den Fariseiman e aksi den: „Foe san ede oenoe no ben tjari en kon nanga oenoe?”

„Noiti wan tra sma taki na a fasi disi”, den skowtoe e piki.

Den relisi fesiman ati e bron srefisrefi èn den e lagi densrefi foe spotoe. Den e taki sani tra fasi leki fa den de, èn den e skempi. Nanga tegoe den e taki: „A de so, taki den kori oenoe toe? No wan foe den tiriman noso den Fariseiman poti bribi na ini en, a no so? Ma na ipi sma disi di no sabi a Wet na froefroektoe sma.”

Now Nikodeimus, wan Fariseiman èn wan tiriman foe den djoe, (dati wani taki, wan memre foe a Sanhedrin), e prefoeroe foe taki foe a boen foe Jesus ede. Joe sa memre ete kande, taki pasa toe nanga afoe jari, Nikodeimus ben kon na Jesus na netiten èn a ben sori bribi na ini en. Now Nikodeimus e taki: „A wet foe wi no e kroetoe wan sma sondro foe jere en fosi èn foe jere san a e doe, a no so?”

Disi e meki taki den Fariseiman ati e kon bron moro, bika wan foe den eigi sma e opo taki gi Jesus. „A no so, taki joe na foe Galilea toe?”, den e taki na wan spotoefasi. „Ondrosoekoe èn si taki no wan enkri profeiti sa opo kon na Galilea.”

Ala di den Boekoe foe bijbel no e taki langalanga taki wan profeiti ben sa kon foe Galilea, tokoe den e sori taki a Krestes ben sa kon foe drape, foe di den e taki dati sma ben sa si „wan bigi leti” na ini a kontren disi. Boiti dati, Jesus ben gebore na Betlehem èn a ben de wan bakapikin foe David. Ala di den Fariseiman sabi disi kande, tokoe soleki fa a sori, den de frantiwortoe gi a panja di den fowtoe prakseri di den sma abi foe Jesus, e panja. Johanes 7:32-52; Jesaja 9:1, 2; Mateus 4:13-17.

▪ San e pasa ibri mamanten foe a fesa, èn fa Jesus e poti prakseri na tapoe disi kande?

▪ Foe san ede den skowtoe no e kisi Jesus foe go sroto en, èn fa den relisi fesiman e handri na tapoe disi?

▪ Soema na Nikodeimus, fa en e denki foe Jesus, èn fa den kompe Fariseiman foe en e handri nanga en?

▪ Sortoe boeweisi de, taki a Krestes ben sa kon foe Galilea?