Kapitel 95

A e leri sma sani di abi foe doe nanga brokotrow èn nanga a lobi di den moesoe lobi pikin-nengre

JESUS nanga den disipel foe en de na pasi foe go na Jerusalem foe njan a Paska foe 33 G.T. drape. Den e koti Jordan liba abra èn den e teki a pasi di e pasa na ini a distrikt Perea. Wan toe wiki na fesi, Jesus ben de na Perea kaba, ma na a ten dati den ben kari en kon na Judea, foe di en mati Lasarus ben siki. Drape na Perea, Jesus ben taki nanga den Fariseiman foe a broko foe wan trow, èn now den e taki baka foe na afersi.

Na mindri den Fariseiman difrenti denki de foe a broko foe wan trow. Moses ben taki dati wan man ben kan broko a trow nanga wan oema, efoe a man feni „wan sani di no fiti na en”. Son sma e bribi taki disi abi foe doe soso nanga te wan sma no e tjari ensrefi na wan krin fasi. Ma tra sma feni dati „wan sani di no fiti” na so srefi pikinpikin fowtoe. So boen, foe tesi Jesus, meki den Fariseiman e aksi en: „A Wet e gi wan man pasi foe broko a trow nanga en wefi foe ibri sortoe sani ede?” Den abi na overtoigi taki awansi san Jesus o taki toe, a sa kon na ini problema nanga den Fariseiman di abi wan tra denki.

Jesus e handri na afersi na wan kefalek koni fasi, foe di a no e gebroiki a wan noso tra libisma denki, ma a e poti prakseri na tapoe a fasi fa a trowlibi ben de biginbigin. „Oenoe no ben leisi”, na so a e aksi, „taki a sma di ben meki den na ini a bigin, ben meki den leki man nanga oema èn ben taki: ’Dati meki wan man sa gowe libi en papa nanga en mama èn sa tai hori na en wefi, èn den toe sa de wán skin’? So boen, den no de toe skin moro, ma wán skin. Foe dati ede, san Gado tjari kon na wán, no meki no wan sma prati dati foe makandra.”

A prakseri di Gado ben abi biginbigin, na so Jesus e sori, de taki trowpatna moesoe tan na makandra, den no moesoe broko a trow. Efoe dati de so, na so den Fariseiman e taki, „dan foe san ede Moses ben taki foe gi en wan papira taki a kan gowe èn foe broko a trow nanga en?”

„Moses ben gi oenoe pasi foe broko a trow nanga oen wefi, foe di a ben hori a tranga-atifasi foe oenoe na prakseri,” Jesus e piki, „ma disi no ben de so sensi a bigin.” Ija, di Gado ben gi a soifri markitiki gi a trowlibi na ini a djari foe Eden, a no ben seti sani foe broko wan trow.

Jesus e taigi den Fariseiman moro fara: „Mi e taigi oenoe taki a sma di broko a trow nanga en wefi, boiti foe hoeroedoe [Grikitongo: por·neiʹa] ede, èn e trow wan trawan, e doe soetadoe.” Na so fasi a e sori taki por·neiʹa, san wani taki, tegoe seks hoeroedoe, na a wan-enkri reide di Gado feni boen foe broko wan trow.

Foe di den disipel e froestan taki a trowlibi moesoe de wan banti foe alaten, nanga soso a reide disi foe broko a trow, meki den e taki: „Efoe a situwâsi de so gi wan man nanga en wefi, dan moro betre wan sma no trow.” A no de foe taki, dati wan sma di e wegi-go-wegi-kon foe trow, moesoe prakseri boen foe a tan di a trowbanti moesoe tan foe alaten!

Now Jesus e taki foe sma di e tan den wawan sondro foe trow. A e tjari kon na krin, taki son boi gebore leki eunuch èn den no man foe trow, foe di a manpresi foe den no gro nofo. Trawan, na libisma meki den tron eunuch, foe di na wan ogri-atifasi den ben poeroe a manpresi foe den. Èn te foe kaba, joe abi son sma di e dwengi a lostoe foe trow èn foe abi seks-demakandra, so taki den kan gi densrefi moro na afersi di abi foe doe nanga a Kownoekondre foe hemel. „A sma di kan meki presi gi dati [foe tan en wawan sondro foe trow], meki a meki presi gi dati”, na so Jesus e tapoe.

Now den sma e bigin tjari den jongoe pikin foe den kon na Jesus. Ma den disipel e piri-ai gi den pikin èn e proeberi foe seni den gowe. A no de foe taki, dati den e doe disi foe di den no wani poti tra hebi na Jesus tapoe, di no de fanowdoe. Ma Jesus e taki: „Meki den jongoe pikin kon na mi; no proeberi foe tapoe den, bika a kownoekondre foe Gado na foe den wan di de leki den. Foe troe, mi e taigi oenoe: A sma di no e teki a kownoekondre foe Gado leki wan jongoe pikin, no sa go na ini en kwetikweti.”

Foe troe, Jesus e leri sma wan moi sani djaso! Foe kan go na ini Gado Kownoekondre, wi moesoe abi a srefi sakafasi leki jongoe pikin nanga a gridi di den gridi foe leri sani. Ma na eksempre foe Jesus e sori wi toe o prenspari a de, spesroetoe gi papa nanga mama, taki den moesoe gi ten na den pikin foe den. Now Jesus e sori omeni a lobi pikin-nengre, foe di a e brasa den èn e blesi den. Mateus 19:1-15; Deuteronomium 24:1; Lukas 16:18; Markus 10:1-16; Lukas 18:15-17.

▪ Sortoe tra denki den Fariseiman abi na ini a tori foe a broko di wan sma e broko wan trow, èn fa den e tesi Jesus?

▪ Fa Jesus e handri nanga a moeiti di den Fariseiman e doe foe tesi en, èn san a e gi leki a wan-enkri reide foe broko wan trow?

▪ Foe san ede den disipel foe Jesus e taki dati moro betre wan sma no trow, èn sortoe rai Jesus e gi?

▪ San Jesus e leri wi nanga a fasi fa a e handri nanga jongoe pikin?