Yosua 7:1-26
7 Now a ben de so taki den Israelsma du wan sani di Gado no feni bun. Den trangayesi Gado, fu di den no du san a ben taigi den fu du nanga den sani di ben musu kisi pori. Wan fu den teki wan tu sani di ben musu kisi pori. A sma dati ben de Akan, a manpikin fu Karmi èn a granpikin fu Sabdi. Sabdi ben de wan bakapikin fu Sera, wan man fu a lo fu Yuda. A sani di Akan du, ben meki taki Yehovah ati bron srefisrefi nanga den Israelsma.
2 Bakaten Yosua seni man komoto fu Yerikow go na a foto Ai di de krosibei fu Bet-Afen na owstusei fu Betel. A taigi den: „Kren go na a foto èn go luku a kondre na wan kibri fasi.” Na so den man kren go na a foto Ai fu go luku na wan kibri fasi fa a kondre tan.
3 Baka dati den man disi drai go baka na Yosua èn den taigi en: „Yu no abi fu seni a heri legre go. Seni sowan tu dusun, noso dri dusun man nomo fu go feti nanga den sma fu Ai. No meki a heri legre kon weri. A foto no abi furu sma, sobun, seni wan tu srudati nomo go drape.”
4 Sobun, sowan dri dusun man kren go na a foto, ma den no ben man feti nanga den man fu Ai. Dati meki den lon gi den man fu Ai.
5 Den man fu Ai kiri sowan dritenti na siksi man fu Israel. Den bigin feti nanga den man fu Israel na a portu fu a foto èn den hari go na den baka te na Skebarim. Den tan kiri den man fu Israel, srefi di den ben e saka komoto na a bergi. Fu dati ede den srudati ben kon frede srefisrefi èn den ben lasi-ati.
6 Ne Yosua nanga den owru man fu Israel priti den krosi na den skin, fu di den ben e sari. Den saka kindi boigi nanga den fesi go na gron na fesi a santa kisi fu Yehovah. Den tan drape teleki neti tapu èn den tan poti doti na tapu den ede.
7 Baka dati Yosua taki: „Ke, Moro Hei Masra Yehovah. Fu san ede yu tyari a pipel disi kon te na abrasei fu Yordan-liba, soso fu meki den Amorietsma figi wi puru krinkrin? Betre wi ben tan na abrasei fu Yordan-liba!
8 Ke Yehovah, mi e begi yu pardon. Ma san mi kan taki, now di Israel lon gi den feanti fu den?
9 Den Kanansma nanga ala den tra sma di e libi na ini a kondre o yere a tori disi. Now den o lontu wi èn den o figi wi nen puru na grontapu. Dan san yu o du fu puru a syen di kon na tapu yu bigi nen?”
10 Dati meki Yehovah taigi Yosua: „Yu drape! Opo! Fu san ede yu saka kindi boigi nanga yu fesi go na gron?
11 Israel sondu. Den no hori a frubontu di mi ben meki nanga den. Den teki wan tu sani sosrefi di ben musu kisi pori. Den fufuru den sani disi èn den kibri a tori. Ne den poti den sani dati na mindri den eigi gudu.
12 Dati meki den Israelsma no o man feti nanga den feanti fu den. Den o lon gi den feanti fu den, fu di den tron wan sani di musu kisi pori. Mi no o de nanga unu, solanga unu no puru a sani na un mindri di musu kisi pori.
13 Opo! Sreka a pipel, so taki den kan de santa na fesi Gado. Yu musu taigi den: ’Tamara un musu sreka unsrefi, so taki unu kan de santa na fesi Gado, bika disi na san Yehovah, a Gado fu Israel taki: „Israel, wan sani de na un mindri di musu kisi pori. Un no o man feti nanga den feanti fu unu, solanga unu no puru a sani na un mindri di musu kisi pori.
14 Tamara mamanten den lo musu kon na fesi Gado wan-fru-wan. Dan Yehovah o taki sortuwan fu den lo musu kon na fesi. Baka dati Yehovah o taki sortuwan fu den famiri na ini a lo dati musu kon na fesi. Dan Yehovah o taki sortuwan fu den osofamiri fu a famiri dati musu kon na fesi. Te fu kaba a o taki sortuwan fu den man-nengre fu na osofamiri dati musu kon na fesi.
15 Na so fasi Gado o sori suma na a sma di abi den sani di musu kisi pori. Un musu bron a sma dati, makandra nanga ala den sani di a abi, fu di a no hori a frubontu fu Yehovah èn fu di a du wan tumusi syen sani na ini Israel.”’”
16 Ne Yosua opo fruku mamanten. Dan a meki den lo fu Israel kon na fesi wan-fru-wan. Ne Gado teki a lo fu Yuda.
17 Baka dati a meki den famiri na ini a lo fu Yuda kon na fesi. Dan Gado teki a famiri fu den Serasma. Ne a meki ala den man-nengre na ini a famiri fu den Serasma kon na fesi wan-fru-wan. Fu den man dati, a teki Sabdi.
18 Te fu kaba a meki ala den man-nengre na ini na osofamiri fu Sabdi kon na fesi wan-fru-wan. Ne Gado teki Akan di ben de a manpikin fu Karmi èn a granpikin fu Sabdi, a bakapikin fu Sera, wan man fu a lo fu Yuda.
19 Dan Yosua taigi Akan: „Mi boi, mi e begi yu. Gi Yehovah, a Gado fu Israel grani èn fruteri en san yu du. Taigi mi grantangi, san yu du? No kibri a tori gi mi.”
20 Ne Akan piki Yosua: „We, . . . a tru taki mi sondu teige Yehovah, a Gado fu Israel. Disi na san mi du:
21 Di wi ben e teki den gudu fu den feanti, mi si wan krosi fu Sineyar di ben moi srefisrefi. A krosi ben de fu wan heihei man. Mi feni tu kilo nanga tu hondro aititenti gran solfru tu nanga wán pisi gowtu fu feifi hondro seibitenti gran. Di mi si den sani disi, mi ben wani den. Ne mi teki den. Mi beri den na ini a gron na mindrisei fu mi tenti èn a solfru de na ondro a krosi.”
22 Wantewante Yosua seni man go teki den sani. Ne den lon go na a tenti fu Akan. Di den doro drape, den si taki den sani ben kibri na ondro a tenti fu en trutru èn taki a solfru ben de na ondro a krosi.
23 Sobun, den puru den sani disi na mindrisei fu a tenti. Ne den tyari den go na a presi pe Yosua nanga ala den Israelsma ben e tanapu. Dan den poti den sani na gron na fesi Yehovah.
24 Now Yosua nanga heri Israel teki Akan, a bakapikin fu Sera. Den teki a solfru, a moi krosi, a pisi gowtu, den manpikin nanga den umapikin fu en, den mankaw, den buriki, den skapu, nanga den krabita fu en. Den teki en tenti tu nanga ala sani di ben de fu en. Ne den tyari den go na Akor-lagipresi.
25 Dan Yosua taki: „Fu san ede yu meki ogri miti wi? We, tide Yehovah o meki ogri miti yu.” Ne heri Israel teki ston trowe na den tapu, so taki den dede. Baka dati Israel bron den nanga faya. Na so den ston den alamala kiri.
26 Ne den tapu Akan skin nanga wan bigi ipi ston. Te na a dei fu tide na ipi ston disi de drape ete. Na so a bigi atibron fu Yehovah saka. Fu dati ede den kari a presi Akor-lagipresi. Te na a dei fu tide a presi abi a nen disi ete.
