Yesaya 21:1-17
21 Disi na wan krutuboskopu gi a sabana na a se:*
Wan rampu de na pasi e kon. A de leki den bigi winti di e wai na a heri kontren na zuidsei.A e kon fu a sabana, fu wan kondre di sma e frede.
2 Mi si wan fisyun di ben meki mi sari. Na ini a fisyun mi yere:
A bedrigiman e bedrigi smaèn a wan di e pori sani e pori sani.
Opo, Elam! Go feti, Media!
Mi o sorgu taki a no meki nowan sma geme moro.
3 A sani disi meki mi frede srefsrefi.*
Mi kisi hebi krampuneleki wan uma di de fu meki wan pkin.
Mi bruya so te, taki mi no man yere noti.Mi skreki so te, taki mi no man si noti.
4 Mi ati e naki es’esi. Mi skin e beifi, fu di mi e frede te fu dede.
Mi ben lobi mofoneti, ma now mi e beifi te mofoneti doro.
5 Seti a tafra èn seti den sturu.
Un nyan èn dringi!
Un granman, opo. Un salfu* a schild.
6 Yehovah taigi mi:
„Poti wan waktiman èn meki a taigi yu ala san a e si.”
7 Ne a waktiman si fetwagi di asi e hari,fetwagi di buriki e hari,nanga fetwagi di kameili e hari.
A ben e luku nanga ala en prakseri.
8 Dan a bari nanga wan tranga sten neleki wan lew:
„Yehovah, heri dei mi e tnapu na tapu a toren e hori waktièn ala neti mi e tan na mi presi e hori wakti!
9 Luku san e kon!
Wan tu man e kon na tapu wan fetwagi di tu asi e hari!”
Dan a waktiman bari:
„A fadon! Babilon fadon!
Ala den popki di Babilon ben e anbegi fadon broko na gron!”
10 Ai mi pipel, den fon unu leki aleisi.Den masi unu na mi gron pe den e masi aleisi.Mi ferteri unu ala san mi yere fu Yehovah di e tiri den legre, a Gado fu Israel.
11 Disi na wan krutuboskopu gi Duma:*
Wan sma na Seyir e bari gi mi:
„Waktiman, o langa a neti o tan ete?
Waktiman, o langa a neti o tan ete?”
12 A waktiman taki:
„M’manten e kon èn neti e kon tu.
Efu unu wani aksi wan sani, dan un aksi.
Moro lati un kan aksi mi baka!”
13 Disi na wan krutuboskopu gi a sabana:
Un man fu Dedan di e waka fu a wan presi go na a trawan,na neti unu o sribi na a busi fu a sabana.
14 Un tyari watra gi den wan di no abi watra fu dringi,un sma di e tan na Teima.Un tyari brede gi den wan di e lowe gwe.
15 Bika den e lowe gwe, fu di sma wani kiri den.Nanga fet’owru èn nanga bo den wani kiri den. Den e lowe gi wan ogri feti.
16 Yehovah taigi mi: „Na ini wán yari nomo Keidar o lasi ala a glori fu en. (A yari disi na fa wrokoman e teri yari.)
17 . Na soso wan tu fu den fetman fu Keidar di ben sutu nanga bo o tan abra, bika na Yehovah, a Gado fu Israel, taki dati.”
Futuwortu
^ A sori leki disi na a kontren pe Babilonia fu owruten ben de.
^ Hebrewtongo: „meki mi kisi hebi pen na mi dyonku”.
^ Noso: „poti oli gi”.
^ Duma wani taki „de pî”.
