Yeremia 42:1-22
42 Dan ala den legre-edeman, Yohanan di ben de a manpkin fu Kareya, Yesanya di ben de a manpkin fu Hosaya, nanga ala den tra sma, mofinasma nanga heihei sma, kon
2 èn den taigi Profeiti Yeremia: „Grantangi, du wi wan bun. Begi Yehovah yu Gado gi ala den sma disi di tan abra, bika na wi w’wan de ete. Wi no furu moro, soleki fa yusrefi e si.
3 Meki Yehovah yu Gado taigi wi sortu pasi wi musu waka èn san wi musu du.”
4 Dan Profeiti Yeremia taigi den: „Mi yere san unu taki. Mi o begi Yehovah un Gado soleki fa unu aksi, dan mi o taigi unu ala san Yehovah piki mi. Mi no o kibri nowan sani gi unu.”
5 Ne den taigi Yeremia: „Meki Yehovah de leki wan kotoigi di wi kan fertrow èn meki a strafu wi efu wi no du ala sani finfini soleki fa Yehovah yu Gado seni yu fu taigi wi.
6 A no abi trobi san wi Gado Yehovah e taki. Awinsi na bun noso ogri, wi o du san a taki. Dan sani o waka bun gi wi, fu di wi e arki Yehovah wi Gado.”
7 Baka tin dei Yehovah taki nanga Yeremia.
8 Dan a kari Yohanan di ben de a manpkin fu Kareya, ala den legre-edeman di ben de nanga en nanga ala den tra sma, mofinasma nanga heihei sma.
9 A taigi den: „Unu ben seni mi fu aksi Yehovah, a Gado fu Israel, meki a du unu wan bun. A taki:
10 ’Efu unu tan na ini a kondre disi, mi no o broko unu, ma mi o bow unu. Mi no o rutu unu puru, ma mi o prani unu. Mi o sari unu, fu di mi meki ogri miti unu.
11 Unu e frede a kownu fu Babilon, ma un no musu frede en.’
Yehovah taki: ’No frede en, bika mi de nanga unu. Mi o kibri unu èn mi o puru unu na en anu.
12 Mi o sari unu èn mi o meki a sori sar’ati gi unu. A o meki unu drai go baka na un eigi kondre.
13 Ma efu unu trangayesi Yehovah un Gado èn unu taki: „Nôno! Wi no o tan na ini a kondre disi.
14 Wi o go na Egepte. Drape wi no o si nowan feti, wi no o yere a b’bari fu wan tutu èn angri no o kiri wi. Na drape wi o tan”,
15 dan unu di tan abra fu Yuda, musu arki bun san Yehovah taki. Yehovah di e tiri den legre, a Gado fu Israel, taki: „Efu unu poti na un ede fu go na Egepte èn unu go tan drape,*
16 dan ala den sani di unu ben frede, o miti unu drape na ini Egepte. Iya, feanti o feti nanga unu èn angri o kiri unu na ini Egepte. Na drape unu o dede.
17 Fet’owru, angri nanga siki* o kiri ala sma di poti na den ede fu go tan na Egepte. Nowan fu den o man lowe èn nowan fu den o tan na libi, fu di mi o meki rampu miti den.”’
18 Yehovah di e tiri den legre, a Gado fu Israel, taki: ’Neleki fa mi ben puru atibron na tapu den sma di ben e tan na Yerusalem, na so mi o puru atibron na un tapu efu unu go na Egepte. Sma o fluku unu, den o kosi unu, den o spotu unu èn den o skreki te den o si san mi du nanga unu. Noiti moro unu o si a presi disi.’
19 Un sma di tan abra fu Yuda, Yehovah taigi unu fu no go na Egepte. Unu musu ferstan bun taki na warskow mi e warskow unu tide.
20 Efu unu meki a fowtu disi, unu o lasi un libi. Bika unu seni mi go na Yehovah un Gado èn unu taigi mi: ’Begi Yehovah wi Gado gi wi èn taigi wi ala san Yehovah wi Gado taki, dan wi o du dati.’
21 Tide mi taigi unu san Gado taki, ma tòg unu no o arki Yehovah un Gado èn unu no o du den sani di a seni mi fu taigi unu.
22 Fu dati ede, un musu sabi taki fet’owru, angri nanga siki o kiri unu na a presi pe unu wani go tan.”
