Yeremia 34:1-22
34 Kownu Nebukadnesar* fu Babilon ben e feti nanga Yerusalem èn nanga ala den foto lontu Yerusalem. A ben go nanga ala den srudati fu en èn nanga ala den kownukondre nanga pipel di a ben e tiri. Na a ten dati Yehovah taki nanga Yeremia. A taki:
2 „Disi na san Yehovah, a Gado fu Israel, taki: ’Go taigi Kownu Sedekia fu Yuda: „Yehovah taki: ’Mi o meki a kownu fu Babilon teki a foto disi abra èn a o bron en nanga faya.
3 Yu no o man lowe gi en, bika sma o grabu yu èn den o tyari yu go na en. Nanga yu eigi ai yu o si a kownu fu Babilon èn en srefi o taki nanga yu. Yu o abi fu go na Babilon.’
4 Ma arki san Yehovah taki fu yu, Kownu Sedekia fu Yuda: ’Yehovah taki fu yu: „Sma no o kiri yu nanga fet’owru.
5 Yu o libi go doro teleki yu srefi kon dede. Dan sma o bron switismeri gi yu neleki fa den ben du gi den afo fu yu, den kownu di ben de fosi yu. Den o row gi yu èn den o taki: ’Tye mi masra!’ Bika Yehovah taki: ’Na mi taki dati den sani disi o psa.’”’”’”
6 Dan a Profeiti Yeremia go taigi Kownu Sedekia fu Yuda ala den sani disi na ini Yerusalem
7 di den srudati fu a kownu fu Babilon ben e feti nanga Yerusalem èn nanga ala den tra foto fu Yuda di den no ben wini ete. Fu ala den foto na ini Yuda di ben abi tranga skotu, soso Lakis nanga Aseka ben libi ete.
8 Yehovah ben taki nanga Yeremia, baka di Kownu Sedekia meki wan ferbontu nanga ala den sma di ben de na ini Yerusalem. A ferbontu ben o meki den srafu kon fri.
9 Ala sma ben musu meki den Hebrew man nanga uma di ben wroko leki srafu gi den, kon fri. Den no ben musu meki den Dyu, sobun, den eigi kondreman, wroko leki srafu gi den moro.
10 Ne ala den granman nanga ala den sma di ben meki a ferbontu, fri den man nanga uma di ben wroko leki srafu gi den. Den no meki den sma disi wroko gi den moro. Den hori densrefi na a ferbontu èn den seni den sma gwe.
11 Ma bakaten den go teki den man nanga uma di den ben seni gwe èn den dwengi den fu wroko baka leki srafu gi den.
12 Dati meki Yehovah gi Yeremia ete wan boskopu. Yehovah taki:
13 „Yehovah, a Gado fu Israel, taki: ’Di mi tyari den afo fu unu kmoto na a kondre Egepte pe den ben de srafu, mi ben meki wan ferbontu nanga den. Mi ben taigi den:
14 „Efu wan sma bai wan Hebrewsma leki ensrefi èn a wroko leki srafu gi en siksi yari langa, dan a musu seni en gwe na a kba fu a di fu seibi yari. A musu meki en kon fri.” Ma den afo fu unu ben trangayesi mi èn den no ben arki mi.
15 No so langa psa* unu kenki èn unu du san mi feni bun. Unu taigi un kondreman taki den fri èn unu meki wan ferbontu na mi fesi na ini na oso di e tyari mi nen.
16 Ma dan unu kenki prakseri baka èn unu pori mi nen. Unu go teki den man nanga uma baka di ben wroko leki srafu gi unu, aladi den ben wani de fri. Unu dwengi den fu wroko leki srafu gi unu baka.’
17 Dati meki Yehovah taki: ’Unu trangayesi mi. Nowan fu unu meki en kondreman kon fri.’ Yehovah taki: ’Ma a wan-enkri fasi fa mi o meki unu kon fri, na te fet’owru, siki,* nanga angri kiri unu. Ala den kownukondre fu grontapu o skreki te den si san mi du nanga unu.
18 Den man di no hori densrefi na mi ferbontu, mi o libi gi den feanti. Di den ben meki a ferbontu nanga mi, den ben koti wan pkin kaw na tu èn den waka na mindri den tu pisi.* Ma tòg den no du san a ferbontu taki.
19 Den granman fu Yuda nanga Yerusalem, den heihei man, den priester nanga ala den sma fu a kondre di waka na mindri den tu pisi fu a pkin kaw,
20 mi o libi gi den feanti èn gi den sma di wani kiri den. Den busmeti na grontapu èn den fowru na loktu o nyan den dedeskin fu den.
21 Mi o libi Kownu Sedekia fu Yuda nanga den granman fu en gi den feanti, gi den sma di wani kiri den èn gi a legre fu a kownu fu Babilon di hari gwe fu unu.’
22 Yehovah taki: ’Luku, mi o meki den du a sani disi: Mi o tyari den kon baka fu feti nanga a foto disi. Den o teki en abra èn den o bron en nanga faya. Mi o meki den foto fu Yuda tron brokopresi pe nowan sma o tan.’”
Futuwortu
^ Hebrewtongo: „Nebukadresar”. Na so den e skrifi a nen disi son leisi.
^ Hebrewtongo: „tide”.
^ Noso: „takru siki di panya na ala sei”.
^ Na ini owruten Israel, sma ben abi a gwenti fu du disi te den ben meki wan ferbontu.
