Yeremia 19:1-15
19 Disi na san Yehovah taki: „Go bai wan prapi na wan man di e meki prapi. Kari wan tu prenspari man fu a pipel nanga wan tu prenspari priester,
2 dan un go na Hinom-lagipresi* di de na fesi a Brokopatu-portu. Drape yu musu taki san mi o taigi yu.
3 Yu musu taki: ’Un kownu fu Yuda nanga un sma di e tan na ini Yerusalem, arki san Yehovah abi fu taki. Yehovah di e tiri den legre, a Gado fu Israel, taki:
„Mi o meki wan bigi ogri psa na a presi disi. Nowan sma o wani bribi te den yere san psa.
4 Ogri o miti den sma fu a presi disi fu di den gwe libi mi èn fu di den kenki a heri presi disi. Den tyari ofrandi gi tra gado di den, den afo fu den nanga den kownu fu Yuda no ben sabi. Den furu a presi disi nanga a brudu fu den sma di den kiri fu soso.
5 Den bow hei presi fu anbegi Bâal. Den tyari den manpkin fu den fu bron na ini faya leki bron-ofrandi gi Bâal. Noiti mi ben taigi den fu du dati. So wan sani no ben kon na ini mi prakseri* srefi.”’
6 ’Yehovah taki: „Fu dati ede wan ten o kon te sma no o kari a presi disi Tofet moro noso Hinom-lagipresi.* Na presi fu dati den o kari en a lagipresi pe den e kiri sma.
7 Na a presi disi mi o meki taki den sma fu Yuda nanga Yerusalem no o man du moro san den abi na prakseri. Mi o meki feanti kiri den nanga fet’owru. Iya, mi o libi den gi ala sma di wani kiri den. Mi o meki den dedeskin fu den tron n’nyan gi den fowru na loktu èn gi den busmeti na grontapu.
8 Sma o skreki te den si san mi du nanga a foto. Den o froiti fu di den o ferwondru srefsrefi. Iya, solanga wan sma psa a foto, a o luku nanga opo mofo èn a o froiti fu di a o ferwondru taki someni ogri miti den.
9 Mi o meki den feanti lontu den, dan den o pina èn den o bruya. Te den sma di wani kiri den o lontu den, dan den o nyan den eigi manpkin nanga den eigi umapkin èn den o nyan makandra.”’
10 Dan yu musu broko a prapi na fesi den man di kon nanga yu.
11 Yu musu taigi den: ’Yehovah di e tiri den legre taki: „Mi o broko a pipel nanga a foto disi neleki fa wan sma e naki wan prapi broko. Nowan sma no o man meki en moro. Den o beri so furu sma na Tofet taki presi no o de moro fu beri sma.”’
12 Yehovah taki: ’Na dati mi o du nanga a presi disi èn nanga den sma di e tan dyaso. Mi o meki a foto disi tron leki Tofet.
13 Den oso na ini Yerusalem èn den oso fu den kownu fu Yuda o tron leki a presi Tofet. Den oso disi no krin, fu di sma tyari ofrandi gi den sani na hemel èn den kanti dringi-ofrandi gi tra gado na tapu den dak.’”
14 Baka dati Yeremia kmoto na Tofet pe Yehovah ben seni en go fu taki profeititori. Dan a go tnapu na ini a dyari fu na oso fu Yehovah èn a taigi ala sma:
15 „Disi na san Yehovah di e tiri den legre, a Gado fu Israel, taki: ’Luku, mi o tyari rampu kon na tapu a foto disi èn na tapu ala den tra foto na ini a birti, soleki fa mi ben taki. Mi o du disi fu di den sma tranga-ede* èn den no wani du san mi taki.’”
