Tori fu den apostel 3:1-26
3 Wan dei Petrus nanga Yohanes go na a tempel na a ten di sma ben gwenti begi drape. A ben de wan ten fu dri yuru bakadina.*
2 Ne sma tyari wan man kon di ben lan sensi a gebore. Ala dei den ben e tyari en go poti na a tempel portu di nen Moi Portu, so taki a ben kan begi moni na den sma di ben e kon na ini a tempel.
3 Di a si taki Petrus nanga Yohanes ben de fu go na ini a tempel, a bigin begi den moni.
4 Ne Petrus nanga Yohanes luku a man èn den taki: „Opo yu ede luku wi.”
5 Ne a luku den, fu di a ben denki taki a ben o kisi wan sani fu den.
6 Ma Petrus taigi en: „Solfru nanga gowtu mi no abi, ma san mi abi na dati mi o gi yu. Ini a nen fu Yesus Krestes fu Nasaret, mi e taigi yu: Opo, dan yu waka!”
7 Di Petrus taki dati, a grabu a man hori na en ret’anu èn a yepi en fu opo tnapu. Wantewante den futu fu a man kisi krakti.
8 Ne a man dyompo opo èn a bigin waka, dan a go nanga den na ini a tempel. A ben e waka, a ben e dyompodyompo èn a ben e prèise Gado.
9 Ala sma ben si fa a man disi ben e waka e prèise Gado.
10 Den kon si tu taki na a man disi ben gwenti fu sdon begi sma moni na a tempel na a portu di nen Moi Portu. Di den si san psa nanga en, den no ben man bribi.
11 A man ben e hori Petrus nanga Yohanes, di ala sma lon kon na den na a presi di sma ben sabi leki a Gadri fu Salomo.* Den ben ferwondru srefsrefi.
12 Di Petrus si dati, a taigi den sma: „Un Israelsma, fu san ede unu e ferwondru fu a sani disi? Fu san ede unu e luku wi neleki nanga wi eigi krakti wi meki a man disi waka? Unu denki taki na fu di wi e dini Gado fayafaya, meki wi ben man meki a waka?
13 A Gado fu wi afo Abraham, Isak, nanga Yakob, gi en Futuboi Yesus glori. Unu ben taki dati unu no sabi en èn unu tyari en go gi den feanti fu kiri en, aladi Pilatus ben besroiti kba fu lusu en.
14 Unu no ben wani abi noti fu du nanga a sma dati di santa èn di bun. Ne unu aksi Pilatus fu lusu wan tra man di ben de wan kiriman.
15 Dan unu kiri a Moro Prenspari Fesiman di man gi sma libi. Ma Gado gi en wan opobaka èn wi srefi si disi.
16 Fu dati ede a man di unu e si dya èn di unu sabi, kon betre baka nanga yepi fu a nen fu Yesus èn fu di wi e bribi na ini a nen disi. Soleki fa un alamala e si, a man disi kon betre fu di wi e bribi na ini Yesus.
17 We mi brada, mi sabi taki unu no ben sabi san unu ben e du èn so a de tu nanga den tiriman fu unu.
18 Gado gi pasi meki den sani disi psa, so taki den sani di a meki den profeiti taki ben kan kon tru. Den ben taki dati a Krestes fu en ben o pina.
19 Fu dati ede un musu abi berow èn un musu drai un libi, so taki Yehovah srefi kan figi un sondu puru. Dan a o gi unu krakti
20 èn a o seni a sma kon di a poti leki Krestes gi unu. A sma dati na Yesus.
21 A musu tan na hemel teleki a ten doro taki ala sani kon bun baka, soleki fa Gado meki den santa profeiti fu en fu owruten taki.
22 We, Moses srefi ben taki: ’Yehovah,* a Gado fu unu, o teki wan fu unu fu wroko leki profeiti na un mindri. A o de wan profeiti leki mi èn un musu arki ala sani di a e taigi unu.
23 Iya, Gado o kiri ibri sma di no arki a Profeiti dati.’
24 Samuel nanga ala den profeiti di ben kon baka en, iya, ibriwan fu den ben taki profeititori di ben abi fu du nanga a ten disi.
25 Unu na bakapkin fu den profeiti èn na unu o kisi wini fu a ferbontu di Gado meki nanga den afo fu unu, bika Gado ben taigi Abraham: ’Na yu bakapkin o meki taki ala pipel fu grontapu kisi blesi.’
26 Baka di Gado gi en Futuboi wan opobaka, a seni en kon na unu fosi fu yepi ibriwan fu unu fu tapu nanga den ogri sani di unu e du. Na so a blesi unu.”
