Psalm 74:1-23
Wan Maskil.* Wan psalm fu Asaf.
74 Mi Gado, fu san ede yu gwe libi wi fu ala ten?
Fu san ede yu ati e bron* nanga den skapu di de na den weigron fu yu?
2 Memre a pipel di yu ben tyari kon na wán na ini owruten,iya, a pipel di yu ferlusu fu kon tron a gudu fu yu.
Memre Sion-bergi pe yu ben e tan.
3 Poti prakseri na den presi di broko so langa kba.
Den feanti pori ala sani na ini a santa presi.
4 Den feanti fu yu bari fu prisiri na ini a presi pe sma ben e kon makandra fu anbegi yu.
Den poti den eigi fraga drape fu sori taki den wini.
5 Den ben de leki man di e koti wan heri busi trowe nanga den aksi.
6 Den teki aksi nanga krubal fu broko ala den moimoi sani puru na ini a santa presi.
7 Den sutu faya gi a santa presi fu yu.
Den pori na oso fu yu di e gi yu nen grani èn den broko en te na gron.
8 Den sma disi nanga den bakapkin fu den taki ini densrefi:
„Wi o bron ala den presi na ini a kondre pe sma e kon makandra fu anbegi Gado.”
9 Wi no e si den fraga fu wi moro.Nowan profeiti no de moroèn nowan fu wi sabi o langa a sani disi o go doro.
10 Gado, o langa den gensman o wiswasi yu?
Na fu têgo den feanti o sori taki den no abi lespeki gi yu nen?
11 Fu san ede yu no e langa yu ret’anu fu du wan sani?
Langa yu anu* èn kiri den.
12 Ma Gado na mi Kownu sensi owruten.Na en e ferlusu sma na grontapu.
13 Nanga yu krakti yu meki a se kon krasi.Yu broko na ede fu den bigi meti na ini se.
14 Yu naki na* ede fu Lefiatan* broko pispisi.Yu gi en leki n’nyan na a pipel, na den sma di e libi na den drei sabana.
15 Na yu priti a gron opo fu meki watra nanga liba lon kmoto na ini.Na yu meki den liba pe watra ben e lon ala ten, kon drei.
16 A dei nanga a neti na fu yu.
Na yu meki a leti fu hemel, iya, a son.
17 Na yu ben taki o bigi den difrenti pisi fu grontapu musu de.Na yu seti dreiten nanga alenten.
18 No fergiti fa den feanti wiswasi yu, Yehovah.Den sma di no abi ferstan no e lespeki a nen fu yu.
19 No meki ogri meti nyan a doifi fu yu.
No fergiti den mofinawan fu yu fu têgo.
20 No fergiti a ferbontu di yu meki nanga wi,bika den dungru presi fu grontapu kon lai nanga sma di e du ogri.
21 No meki den sma di e pina kisi syen.Meki den mofinawan nanga den pôtiwan prèise yu nen.
22 Mi Gado, opo taki gi yusrefi èn krin yu nen.
Memre taki den sma sondro ferstan e wiswasi yu heri dei.
23 No fergiti san den feanti fu yu e taki.
A b’bari fu den sma di e gens yu e tan opo go na hemel.
Futuwortu
^ Hebrewtongo: „puru smoko”.
^ Noso: „Puru yu anu na ini den fow fu yu krosi”.
^ Hebrewtongo: „den”.
