Psalm 32:1-11
Wan psalm fu David. Wan Maskil.*
32 Koloku fu a sma di kisi pardon fu a fowtu fu en. Iya, koloku fu en, fu di Gado tapu a sondu fu en.*
2 Koloku fu a sma di Yehovah no krutu te a meki wan fowtu.Koloku fu a sma di no e prakseri fu bedrigi trawan.
3 Di mi no ben e taki fu den sondu fu mi, mi ben e geme heri dei, teleki mi no ben abi krakti moro.
4 Dei nanga neti yu anu ben hebi na mi tapu.*
Ala mi krakti ben drei gwe leki watra na ini dreiten. (Sela)
5 Te fu kba mi ferteri yu sortu sondu mi du.Mi no kibri mi fowtu gi yu.
Mi taki: „Mi o ferteri Yehovah den ogri di mi du.”
Ne yu gi mi pardon fu den fowtu nanga den sondu fu mi. (Sela)
6 Dati meki ibri sma di e tai hori na yu o begi yu,bika now den kan feni yu ete.
Awinsi problema kon na den tapu leki bigi watra, noti no o psa nanga den.
7 Yu na wan kibripe gi mi.Yu o kibri mi te mi de na nowtu.
Yu o meki mi tnapu na mindri sma di e bari fu prisiri fu di yu ferlusu mi. (Sela)
8 Yu ben taki: „Mi o gi yu koni èn mi o sori yu a pasi di yu musu waka.
Mi o gi yu rai, mi ai o de na yu tapu.
9 No du leki wan asi noso wan buriki di no abi ferstan.Den meti disi tranga-ede so te, taki soso te yu poti wan t’tei na den mofo yu o man dwengi den.Na a fasi disi nomo den o kon na yu.”
10 Na ogriwan abi furu problema.Ma te wan sma e fertrow tapu Yehovah, dan Gado o sori en taki a lobi* en.
11 Un ret’ati sma, prisiri nanga Yehovah èn breiti srefsrefi.Bari fu prisiri, ala un krin-ati sma.
Futuwortu
^ Noso: „gi en pardon fu a sondu fu en”.
^ Noso: „Dei nanga neti mi ben e firi taki yu ati bron na mi tapu”.
