Psalm 18:1-50
Gi a fesiman fu den pokuman. Wan singi di David, a futuboi fu Yehovah, ben singi gi Yehovah na a dei di Yehovah ferlusu en fu ala den feanti fu en èn fu Saul. David ben singi:
18 Mi lobi yu Yehovah. Yu na mi krakti.
2 Yehovah na mi stonbergi nanga mi fortresi.* En na mi Ferlusuman.
Mi Gado na mi bigi ston pe mi e lon go kibri.En na mi schild. Iya, en na a wan di e ferlusu mi nanga en krakti.* A de wan bergi pe mi kan go kibri.
3 Mi o suku yepi na Yehovah, a sma di musu kisi glori.A o kibri mi gi den feanti fu mi.
4 Den t’tei fu dede ben tai mi hori.Mi ben frede fu di den wiswasi man ben kon na mi tapu leki wan bigi frudu.
5 Den t’tei fu Grebi* ben tai mi hori.Dede ben seti val gi mi.
6 Di mi ben de na nowtu, mi kari Yehovah.Mi tan kari mi Gado fu a yepi mi.
A ben de na ini en tempel di a yere mi sten.A yere fa mi kari en fu a yepi mi.
7 Ne grontapu bigin seki èn a bigin beifi.Den fundament fu den bergi ben e seki.Den seki go-kon fu di Gado ati ben bron.
8 Smoko ben e kmoto na en noso-oloèn a faya di ben e kmoto na en mofo, ben e bron ala sani.Faya krofaya ben e sutu kmoto fu en.
9 A beni hemel kon na ondro di a saka kon.Na ondro en futu ala sani ben dungru pikapika.
10 A rèi na tapu wan kerub-engel èn a frei kon.
A kon es’esi na tapu den frei fu wan yeye.*
11 Dan a tapu ensrefi lontu na ini dungru.Dungru ben tapu en lontu leki wan tenti,leki blaka wolku di lai nanga watra.
12 Leti ben de na en lontuèn pispisi ijs nanga krofaya di ben e bron, fadon kmoto fu den wolku.
13 Dan Yehovah meki dondru bari na hemel.A Moro Heiwan meki sma yere en stenèn pispisi ijs nanga krofaya di ben e bron, fadon kmoto fu hemel.
14 A sutu den peiri fu en kon na tapu den feanti fu mi èn a panya den go na ala sei.A meki faya koti na hemel èn a bruya den.
15 A gron fu den liba ben kon de fu si.Yehovah, den fundament fu grontapu ben kon de fu si di yu pir’ai gi denèn di wan tranga winti kmoto na ini yu noso-olo.
16 Kmoto fu hemel a langa en anu gi mi.A grabu mi hori, dan a hari mi puru na ini bigi watra.
17 A puru mi na ini na anu fu a tranga feanti fu mi.A ferlusu mi fu den sma di e teige mi èn di ben tranga moro mi.
18 Den suku fu du mi ogri na a dei di problema miti mi,ma Yehovah ben e horbaka gi mi.
19 A tyari mi go na wan presi pe nowan ogri ben kan miti mi.*A ferlusu mi fu di a ben lobi mi.
20 Yehovah e pai mi fu a reti fasi fa mi e tyari misrefi.A e pai mi fu di mi no du nowan ogri.*
21 Bika ala ten mi waka den pasi fu Yehovah.Mi no du ogri, nôno, mi no gwe libi mi Gado.
22 Mi no o fergiti nowan fu den wet fu en.Mi no o poti den na wan sei.
23 Mi o libi na wan fasi di a feni bun.Mi o tyari misrefi na wan reti fasi.
24 Meki Yehovah pai mi fu a reti fasi fa mi e tyari misrefi.Meki a pai mi fu di mi no du nowan ogri.
25 Te wan sma e tai hori na yu, dan yusrefi o tai hori na en.Te wan sma e tyari ensrefi na wan reti fasi, dan yu o du sani gi en na wan reti fasi tu.
26 Te sma e libi bun, dan yu e du bun gi den.Te sma kruka, dan yu o sori taki yu koni moro den.
27 Yu e ferlusu den mofinasma.*Ma yu e lagi den sma di abi heimemre.
28 Yehovah, na yu e leti mi lampu.Na a Gado fu mi e meki leti skèin gi mi te mi de na dungru.
29 Na yu e meki taki mi man lon go feti nanga den man di e roof sma.Nanga a krakti fu Gado mi man kren wan skotu.
30 Ala ten a tru Gado e du bun.Den sani di Yehovah e taki de soifri.
A de wan schild gi ala sma di e suku kibri na en.
31 Sortu Gado de boiti Yehovah?
Èn suma na wan stonbergi boiti wi Gado?
32 Na a tru Gado e gi mi kraktièn a o krin mi pasi gi mi.
33 A e meki mi lon leki wan dia.Na en e meki taki mi man tnapu steifi na bun hei presi.
34 A e leri mi fa fu feti.Nanga mi anu mi man beni wan kopro bo.
35 Yu gi mi yu schild fu ferlusu mi.Yu e horbaka* gi mi nanga yu ret’anu.Na a sakafasi fu yu e meki mi kon bigi.
36 Yu o meki wan bradi pasi gi mi fu mi waka na tapu.Mi futu no o grati.
37 Mi o lon baka den feanti fu mi fu kiri den.Mi no o drai kon baka solanga mi no kiri den alamala.
38 Mi o masi den, so taki den no o man opo tnapu moro.Den o fadon èn mi o trapu na den tapu.
39 Yu o gi mi krakti fu go na feti.Yu o meki den feanti fu mi fadon na mi fesi.
40 Yu o meki den feanti fu mi lon gi mi.*Den wan di e teige mi, mi o puru na pasi.*
41 Den e bari suku yepi, ma nowan sma no de fu ferlusu den.Den e bari kari Yehovah srefi, ma a no e piki den.
42 Mi o stampu den teleki den kon de leki fini doti di winti e wai gwe.Mi o trowe den leki tokotoko di de na mindri strati.
43 Yu o opo taki gi mi te a pipel e krutu mi.
Yu o meki mi tron na edeman fu difrenti pipel.
Wan pipel di mi no ben sabi o dini mi.
44 Na yere sma o yere fu mi nomo, dan den o du san mi taki.Trakondre sma o kroipi kon na mi.
45 Den trakondre sma o las’ati.*Beifibeifi den o kmoto na ini den fortresi* fu den.
46 Yehovah na wan libilibi Gado! Prèise a Stonbergi fu mi!
Gi grani na a Gado di e ferlusu mi.
47 A tru Gado e puru atibron tapu den feanti fu mi.A e meki sma saka densrefi na mi ondro.
48 A e ferlusu mi fu mi feanti di ati e bron nanga mi.A poti mi na tapu wan hei presi, so taki den feanti fu mi no kisi mi.A puru mi na ini na anu fu a man di e du ogri.
49 Yehovah, na fu dati ede mi o prèise yu na mindri den pipel.Mi o singi fu prèise* yu nen.
50 Gado e du bigi wondru fu ferlusu a kownu fu en.Ala ten a e sori lobi* gi a salfuwan fu en,iya, gi David nanga den bakapkin fu en.
Futuwortu
^ Noso: „a winti”.
^ Noso: „wan presi pe mi ben kan de fri”.
^ Hebrewtongo: „fu di mi anu krin”.
^ Noso: „den sma di trawan e pina”.
^ Noso: „tranga”.
^ Noso: „Yu o gi mi a baka fu den feanti fu mi”.
^ Hebrewtongo: „mi o tapu a mofo fu den”.
^ Noso: „drei gwe”.
^ Noso: „prei poku gi”.
