Psalm 104:1-35
104 Mi o prèise Yehovah.
Yehovah mi Gado, yu bigi srefsrefi.
Glori nanga grani de leki krosi na yu skin.
2 Yu domru na ini leti. A de leki wan krosi na yu skin.Yu bradi hemel leki wan tentikrosi.
3 Yu bow den sodrokamra fu yu na tapsei fu den wolku.*Yu meki den wolku tron yu asiwagièn yu e rèi na tapu den frei fu a winti.
4 Yu meki den engel fu yu tron yeye di abi furu krakti.Yu meki den dinari fu yu de leki wan faya di e bron sani.
5 Yu seti grontapu na tapu wan steifi fundament.Fu ala ten, iya, fu têgo nowan sma o man puru en na en presi.*
6 Yu tapu grontapu nanga bun furu watra, neleki yu tapu en nanga wan krosi.
Watra ben tapu den bergi.
7 Di yu bari den watra, den lowe.Di den yere a b’bari fu yu dondru, den bruya èn den lon go
8 na den presi di yu ben seti gi den.Bergi bigin opo kon na tapu èn den lagipresi saka gwe moro dipi.
9 Yu taki te o fara a watra musu doro.Na so den no o sungu grontapu noiti moro.
10 Na yu e meki liba lon na den lagipresi.A watra fu den liba disi e lon na mindri den bergi.
11 Den e meki taki ala den busmeti abi watra fu dringi.Den sabanaburiki e go dringi drape te watra e kiri den.
12 Den fowru e meki nesi na ini den bon na sei a watra.Den e froiti na mindri den w’wiri fu den bon.
13 Kmoto na den sodrokamra fu yu, yu e nati den bergi nanga watra.
Grontapu lai nanga den sani di yu meki.
14 Yu e meki grasi gro gi den meti.Yu e meki sani gro gi libisma,so taki den kan prani èn feni n’nyan.
15 Yu e gi libisma win, so taki den ati kan prisiri.Yu e gi den oli fu meki den fesi brenkièn yu e gi den brede fu nyan teleki den bere furu.
16 Den bon fu Yehovah e kisi nofo watra,iya, den sedrebon fu Libanon di a prani e kisi nofo watra.
17 Na drape den fowru e meki den nesi.
Den nengrekopu* e meki den nesi na ini den yaneifer-bon.
18 Den hei bergi na fu den bergikrabita.Den bigi ston na kibripresi gi den bergi-konkoni.
19 Yu meki a mun fu marki a ten.A son sabi heri bun o ten a musu dongo.
20 Na yu e tyari a dungru, dan neti e fadon.Na ini dungru ala den busmeti e waka lontu.
21 Den yongu lew* e bari, fu di den e onti tra meti.Den e suku a n’nyan di Gado gi den.
22 Te a son e opo,den e go kibri baka èn den e go d’don na ini den olo fu den.
23 Libisma e go du a wroko fu denèn den e wroko teleki neti tapu.
24 Yehovah, den sani di yu meki furu srefsrefi!
Yu meki den alamala na wan koni fasi.
Grontapu lai nanga den sani di yu meki.
25 A se bigi èn a bradi srefsrefi.Bun furu meti e libi na ini, pkinwan nanga bigiwan.
26 Na drape den sipi e waka.Na yu meki Lefiatan* fu prei na ini.
27 Ala den libisani disi e wakti yufu gi den a n’nyan di den abi fanowdu.
28 Na den sani di yu e gi den, na dati den e nyan.
Te yu e opo yu anu, yu e gi den soso bun sani.
29 Te yu e kibri yu fesi gi den, den e bruya.
Efu yu teki a libikrakti fu den, den e dede èn den e tron doti baka.
30 Efu yu seni a krakti fu yu, dan ala sani e kon de.Yu e meki ala sani na grontapu kon nyun baka.
31 A glori fu Yehovah o tan fu têgo.
Yehovah o prisiri nanga den sani di a meki.
32 Na luku a e luku grontapu nomo, dan a grontapu e beifi.Na fasi a e fasi den bergi nomo, dan den e puru smoko.
33 Mi heri libi langa mi o singi gi Yehovah.Solanga mi de na libi, mi o singi prèisesingi* gi a Gado fu mi.
34 Meki den sani di mi e prakseri, gi en prisiri.*
Mi o prisiri nanga Yehovah.
35 Den sondari o dede gwe na grontapu.Den ogrisma no o de moro.
Mi o prèise Yehovah. Prèise Yah!*
Futuwortu
^ Hebrewtongo: „na ini den watra”.
^ Noso: „seki en”.
^ Bakratongo: „ooievaar”.
^ Noso: „yongu lew di abi w’wiri na den neki kba”.
^ Noso: „prei poku”.
^ Noso kande: „Meki a gi mi prisiri fu denki dipi fu en”.
^ Noso: „Haleluyah!” „Yah” na a syatu fasi fa sma e skrifi a nen Yehovah.
