Psalm 10:1-18
ל [Lamed]
10 Yehovah, fu san ede yu e tnapu so fara fu mi?
Fu san ede yu e go kibri te mi de na nowtu?
2 Fu di den ogriwan abi bigifasi, meki den e lon baka den sma di no man yepi densrefi.Ma den srefi ogri di den wani du nanga trawan, na dati o miti den.
3 Na ogriwan e meki bigi fu den ogri di a wani duèn a e blesi a sma di abi bigi-ai.*נ [Nun]A no e sori lespeki gi Yehovah.
4 Fu di na ogriwan abi heimemre, meki a no wani kon sabi Gado.A e prakseri nomo: „Gado no de.”
5 Ala ten sani e waka bun nanga en.Ma a no man ferstan den wet fu yu.A e wiswasi ala den feanti fu en.
6 A taki na ini en ati:„Noti no kan meki mi fadon.*Noiti ogri o miti mi.”
פ [Pe]
7 En mofo furu nanga fluku, a e taki soso lei èn a lobi tapu skreki gi sma.Den sani di a e taki nanga en mofo e tyari problema gi sma. Na soso hati sani a e taki.
8 A e seti luru krosbei fu den dorpu.A de na en kibripresi èn fu drape a e kiri wan sma di no du noti.
ע [Ayin]
A e luku suma a kan kiri.
9 Neleki fa wan lew e d’don e luru na ini wan busbusi, na so na ogriwan e seti luru gi sma.
A e tan luru fu grabu a sma di no man yepi ensrefi.
A e fanga en te a e hari a nèt fu en tapu.
10 A e naki en trowe na gron.Den sma di fadon na ini en anu no man du noti.
11 A taki na ini en ati: „Gado fergiti den ogri di mi du.
A drai en fesi.
Noiti a e si san mi e du.”
ק [Kof]
12 Yehovah, mi e begi yu, opo. Mi Gado, opo du wan sani.
No fergiti den sma di no man yepi densrefi.
13 Fu san ede na ogriwan no e lespeki Gado?
A taki na ini en ati: „Yu no o aksi mi frantwortu fu den sani di mi e du.”
ר [Resj]
14 Ma yu e si den problema di e miti sma èn fa den e sari.
Yu e si san e psa èn yu e du wan sani fu yepi den.
A sma di de na nowtu e kon suku yepi na yu.Na yu e yepi den pkin di no abi p’pa.*
ש [Syin]
15 Broko na anu fu den sma di ogri èn di ati takru.Dan den no o man du nowan ogri moro.
16 Yehovah na Kownu fu ala ten, iya, fu têgo.
A strafu den pipel,* so taki den no de moro na grontapu.
ת [Taw]
17 Ma Yehovah, mi sabi taki yu o arki a begi fu den safr’ati sma.
Yu o gi den dek’ati èn yu o arki den nanga ala yu prakseri.
18 Yu o meki sani waka na wan reti fasi gi den pkin di no abi p’pa èn gi den sma di trawan e pina.Dan noiti moro den sma di e libi na grontapu o meki den frede.
Futuwortu
^ Noso kande: „a sma di abi bigi-ai e blesi ensrefi”.
^ Noso: „Noiti mi o degedege”.
^ Noso: „den pkin di no abi p’pa nanga m’ma”.
^ Dati na „den pipel di no e dini Gado”.
