Lukas e fruteri 11:1-54
11 Wan leisi a ben de na wan presi e begi. Di a kaba begi, wan disipel fu en taigi en: „Masra, leri wi fa fu begi, neleki fa Yohanes leri den disipel fu en fu begi.”
2 Dan a taigi den: „Te unu e begi, un musu taki: ’Tata, meki yu nen kon santa. Meki yu Kownukondre kon.
3 Gi wi tide a brede di wi abi fanowdu gi a dei disi.
4 Gi wi pardon fu den sondu fu wi, bika wisrefi e gi ala sma pardon di sondu* teige wi. No meki tesi kon na wi tapu.’”
5 A taigi den sosrefi: „Kon meki wi taki dati wan fu unu abi wan mati èn a go na en na mindrineti, dan a taigi en: ’Mati, leni mi dri brede,
6 bika didyonsro wan mati fu mi komoto na wan presi kon na mi èn mi no abi noti fu gi en.’
7 Dan a sma di de na inisei piki en: ’No trobi mi. A doro sroto kaba, èn mi nanga den yongu pikin fu mi e sribi. Mi no man opo fu gi yu wan sani.’
8 Mi e taigi unu: Srefi efu a sma no wani opo fu gi en wan sani fu di na en mati, toku a o gi en san a abi fanowdu fu di a e tan aksi en nomonomo.
9 Fu dati ede mi e taigi unu: Tan aksi, dan unu sa kisi. Tan suku, dan unu sa feni. Tan naki na tapu a doro, dan a doro sa opo gi unu.
10 Bika a sma di e aksi, e kisi èn a sma di e suku, e feni èn a sma di e naki na tapu a doro, a doro sa opo gi en.
11 Iya, suma fu unu di de wan papa o gi en manpikin wan sneki te a pikin aksi en wan fisi?
12 Sosrefi, te a e aksi wan eksi, dan unu no o gi en wan kruktutere, a no so?
13 Fu dati ede, efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!”
14 Wan tra leisi, Yesus yagi wan ogri yeye puru na wan sma tapu di ben meki a sma kon babaw. Baka di na ogri yeye komoto na a sma tapu, a babaw-man ben man taki. Ala den sma ben fruwondru.
15 Ma wan tu fu den taki: „A e yagi ogri yeye puru na sma tapu nanga yepi fu Beyelsebub, a tiriman fu den ogri yeye.”
16 Ma fu di tra sma ben wani tesi Yesus, meki den ben wani en fu sori den wan marki fu hemel.
17 Fu di a ben sabi san den ben prakseri, meki a taigi den: „Ibri kownukondre di prati sa fadon èn wan osofamiri di prati, sa fadon.
18 We, efu Satan en kownukondre prati, dan fa a kownukondre fu en sa man tan? Toku unu e taki dati mi e yagi ogri yeye puru na sma tapu nanga yepi fu Beyelsebub.
19 Efu mi e yagi ogri yeye puru na sma tapu nanga yepi fu Beyelsebub, dan nanga yepi fu suma den sma fu unu e yagi den puru? Fu a sani disi ede, meki den sma fu unu o krutu unu.
20 Ma efu mi e yagi ogri yeye puru na sma tapu nanga yepi fu Gado,* dan a Kownukondre fu Gado kon sondro taki unu sabi.
21 Te wan tranga man abi furu fetisani èn a e hori wakti na en oso, dan nowan sma man fasi den sani fu en.
22 Ma te wan sma di tranga moro en kon feti nanga en èn a wini en, dan a sma dati o puru ala den fetisani fu en di a ben gebroiki fu kibri den gudu fu en. Dan a o prati den sani di a fufuru fu a tranga man.
23 A sma di no de na mi sei, de teige mi. A sma di no e tyari sani kon na wán makandra nanga mi, e tyari bruya kon.
24 Te wan ogri yeye komopo na wan sma tapu, dan a e waka lontu na ini den sabana fu suku wan presi fu rostu. Te a no feni noti, dan a e taki: ’Mi o drai go baka na a oso pe mi ben froisi komopo.’
25 Ma te a doro drape, dan a e si taki na oso sibi krin èn a kon moi.
26 Dan na ogri yeye e gowe èn a e tyari ete seibi yeye kon nanga en di ogri moro en èn baka te den go na inisei, den e tan libi drape. Na so a fasi fa a sma de now, kon ogri moro leki fa a ben de fosi.”
27 Di Yesus ben e taki den sani disi, wan uma opo en sten na mindri den sma èn a taki: „Koloku fu na uma di ben tyari yu na ini en bere èn di ben gi yu bobi!”
28 Ma Yesus taki: „Nôno, koloku fu den sma di e yere a wortu fu Gado èn di e du san a wortu e taki!”
29 Di ipi-ipi sma ben e kon makandra, a bigin taki: „Den sma fu a ten disi na ogri sma. Den wani si wan marki. Ma mi no sa gi den wan marki, boiti a marki fu Yona.
30 Bika neleki fa Yona ben tron wan marki gi den Ninefeisma, na so a Manpikin fu libisma o tron wan marki tu gi den sma fu a ten disi.
31 Na umakownu fu zuidsei sa opo baka na tapu a Krutudei, makandra nanga den sma fu a ten disi èn a o krutu den. A komopo te na den farawe presi fu grontapu fu yere a koni fu Salomo. Ma wan sma de dya di bigi moro Salomo.
32 Den man fu Ninefei sa opo baka na a Krutudei, makandra nanga den sma fu a ten disi èn den sa krutu den sma fu a ten disi, bika di den yere san Yona ben preiki, den ben abi berow. Ma wan sma di bigi moro Yona de dya.
33 Te wan sma leti wan lampu, a no e poti en na wan kibripresi noso na ondro wan baskita. Na presi fu dati a e poti en na tapu wan hei presi, so taki den sma di e kon na inisei kan si a leti.
34 A lampu fu a skin na yu ai. Efu yu ai krin, dan yu heri skin o brenki tu. Ma efu yu ai e luku sani di no bun, dan yu heri skin dungru tu.
35 Fu dati ede, de na ai. Luku bun taki a leti di de na ini yu, no kon dungru.
36 Sobun, efu yu heri skin e brenki èn nowan pisi fu en dungru, dan a heri skin o brenki neleki te wan lampu e skèin leti gi yu.”
37 Baka di a taki den sani disi, wan Fariseiman aksi en fu kon nyan nanga en. Dati meki Yesus go na inisei èn a go sidon na tafra.
38 Ma a Fariseiman fruwondru di a si taki Yesus no ben wasi en anu fosi a go nyan a brekten nyanyan.
39 Ne Masra taigi en: „Un Fariseiman, unu e krin dorosei fu a kan èn fu a preti, ma soso gridi nanga ogri de na inisei fu unu.
40 Un donman! A sma di meki dorosei, meki inisei tu, a no so?
41 Fu dati ede un musu du bun gi pôti sma èn un musu gi den san de na ini unu, dan ala tra sani fu unu o de krin.
42 Ma helu fu unu, un Fariseiman, bika unu e gi Gado a di fu tin pisi fu a menti-wiwiri, fu a wijnruit-wiwiri, èn fu ala sortu gruntu, ma unu no e prakseri a retidu nanga a lobi fu Gado! Unu de fruplekti fu gi Gado a di fu tin pisi, ma un musu sorgu taki unu du den tra sani tu.
43 Helu fu unu, un Fariseiman, bika unu lobi sidon na fesisei na ini den snoga èn unu lobi te sma e gi unu odi na wowoyo!
44 Helu fu unu, bika unu de leki den grebi di no de fu si, èn sma e waka na den tapu sondro fu den sabi!”
45 Dan wan fu den sma di ben sabi a Wèt heri bun piki en: „Leriman, te yu e taki den sani disi, dan yu e kosi wi tu.”
46 Ne a taki: „Helu fu unu di sabi a Wèt heri bun, bika unu e poti lai na sma tapu di hebi fu tyari, ma unu srefi no e fasi a lai nanga wán finga srefi!
47 Helu fu unu, bika unu e meki den grebi fu den profeiti, ma na den afo fu unu kiri den!
48 Unu sabi den sani di den afo fu unu du èn toku unu e agri nanga den. Den kiri den profeiti, ma unu e meki den grebi fu den.
49 Fu dati ede, fu di Gado koni, meki a taki tu: ’Mi o seni profeiti nanga apostel go na den, sma o kiri sonwan fu den, èn den o frufolgu den.
50 Dati meki Gado o aksi den sma fu a ten disi frantwortu fu a brudu fu ala den profeiti di den kiri sensi a ten di grontapu seti,
51 dati na a brudu fu Abel te nanga a brudu fu Sakaria di den kiri na mindri na altari nanga a tempel.’ Iya, mi e taigi unu: Gado o aksi den sma fu a ten disi frantwortu fu dati.
52 Helu fu unu! Unu sabi a Wèt heri bun, ma unu puru a sroto di e opo a doro fu kon sabi Gado. Unu srefi no e go na inisei èn unu e pruberi fu tapu a pasi gi den sma di wani go na inisei!”
53 We, di a komopo fu drape, den leriman fu Wèt nanga den Fariseiman bigin trobi en srefisrefi èn den ben aksi-aksi en wan lo tra sani,
54 fu di den ben suku fu meki a taki wan sani di no bun.
