Genesis 3:1-24
3 Fu ala den busimeti di Yehovah Gado meki, a sneki ben de a wan di ben luku bun fosi a du wan sani. Ne a sneki taigi na uma: „A de so trutru taki Gado taki dati un no musu nyan fu ala den bon na ini a dyari?”
2 Na uma piki a sneki: „Wi kan nyan den froktu fu den bon na ini a dyari.
3 Ma fu den froktu fu a bon di de na mindrisei fu a dyari, Gado taki: ’Un no musu nyan den, nôno, un no musu fasi a bon srefi, noso unu o dede.’”
4 Ma a sneki taigi na uma: „Unu no o dede kwetikweti,
5 bika Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri.”
6 Dan na uma kon si taki den froktu fu a bon ben bun fu nyan èn taki a bon ben moi fu si, iya, a no ben man puru en ai fu a bon. Ne a piki wan froktu fu a bon, dan a nyan fu en. Bakaten di en masra ben de nanga en, a gi en masra meki a nyan tu. Ne en masra srefi bigin nyan.
7 Dan den ai kon opo èn den ala tu kon si taki den ben de nanga sososkin. Sobun, den teki wiwiri fu wan figabon èn den nai den na makandra fu meki wan sani fu tapu den syenpresi.
8 Bakaten, di Yehovah Gado ben e waka na ini a dyari, a man nanga en wefi yere en sten. A ben de mofoneti èn wan switi winti ben e wai. Ne den go kibri gi Yehovah Gado na mindri den bon fu a dyari.
9 Yehovah Gado tan kari a man, taki: „Pe yu de?”
10 Te fu kaba a man piki en: „Di mi yere yu sten na ini a dyari, mi kon frede, fu di mi ben de nanga sososkin. Dati meki mi go kibri.”
11 Ne Gado aksi en: „Suma taigi yu taki yu de nanga sososkin? Yu nyan a froktu fu a bon, aladi mi taigi yu fu no nyan en?”
12 A man piki en: „Na a uma di yu gi mi, na en gi mi a froktu fu a bon, dan mi nyan.”
13 Ne Yehovah Gado aksi na uma: „San yu du?” Dan na uma piki en: „Na a sneki kori mi, ne mi nyan.”
14 Ne Yehovah Gado taigi a sneki: „Fu di yu du a sani disi, meki yu tron a moro frufruktuwan fu ala den osometi èn fu ala den busimeti. Na tapu yu bere yu o kroipi èn yu heri libi langa yu o nyan doti fu a gron.
15 Mi o meki yu nanga na uma tron feanti èn yu pikin nanga en pikin o de feanti. A pikin fu na uma o masi yu ede èn yu o gi a pikin fu na uma mankeri na en bakafutu.”
16 A taigi na uma: „Mi o meki a pen di yu abi te yu de nanga bere kon furu moro nanga moro. Nanga skin-ati yu o meki pikin. Yu o angri fu yu masra èn a o basi yu.”
17 Dan a taigi Adam: „Fu di yu arki a sten fu yu wefi èn yu nyan a froktu fu a bon, aladi mi gi yu a komando: ’Yu no musu nyan fu en,’ meki mi e fluku a gron fu yu ede. Yu heri libi langa yu o abi fu wroko bun tranga* fu prani gron fu kan feni nyanyan.
18 Makabon nanga takru wiwiri o gro na a gron fu yu èn den tra sani di e gro drape na dati yu o nyan.
19 Yu o broko sweti, fu di yu o abi fu wroko tranga fu feni nyanyan. Na so a o de teleki yu dede èn yu drai go baka na a gron di mi teki yu puru na ini, bika na fu doti yu meki èn na doti yu o tron baka.”
20 Baka dati Adam gi en wefi a nen Eva, fu di a ben o tron a mama fu ala libisma.
21 Ne Yehovah Gado meki langa krosi fu metibuba gi Adam nanga en wefi, meki den weri.
22 Dan Yehovah Gado taki: „Luku, a libisma kon de leki wi. A kon sabi san bun èn san ogri. We now, fu no meki a langa en anu tu fu piki wan froktu fu a bon di nen ’Libi’, so taki a nyan èn libi fu têgo, . . .”
23 Dan Yehovah Gado poti en na dorosei fu a dyari fu Eden fu wroko a gron pe a ben teki en puru na ini.
24 Na so a yagi a libisma puru na ini a dyari fu Eden, dan a poti kerub-engel* na owstusei fu a dyari. A poti wan feti-owru tu di ben e bron nanga faya èn di ben e drai lontu doronomo, fu tapu a pasi di e go na a bon di nen „Libi”.
