Gi den Efeisesma 3:1-21
3 Dati meki mi, Paulus, de na strafu, fu di mi na fu Krestes Yesus èn fu di mi yepi unu di de trakondre sma.
2 A musu fu de taki unu yere taki mi kisi a frantwortu fu yepi unu, so taki Gado kan sori unu bun-ati.
3 A ben tyari kon na krin gi mi san na a santa kibritori èn mi ben skrifi pikinso fu a tori disi kaba.
4 Fu dati ede te unu e leisi disi, unu o man frustan omeni mi sabi fu a santa kibritori di abi fu du nanga Krestes.
5 Na ini owruten sma no ben sabi a kibritori disi, soleki fa a yeye tyari en kon na krin now gi den santa apostel èn gi den profeiti fu Gado.
6 A santa kibritori disi, na taki den trakondre sma di tron wán nanga Krestes Yesus nanga yepi fu a bun nyunsu, o kisi a gudu tu. Den ben o tron wan pisi fu a srefi skin èn den ben o tron sma di kisi a srefi sani di Gado pramisi wi.
7 Fu di Gado sori mi bun-ati, meki mi tron wan dinari di musu fruteri sma a santa kibritori disi. A bun-ati disi de leki wan kado di a gi mi fu sori mi en krakti.
8 Gado sori mi a bun-ati disi, aladi mi na a moro pikinwan fu ala den santawan. Dati meki mi kan fruteri den trakondre sma a bun nyunsu di abi fu du nanga a kefalek bigi gudu fu Krestes
9 èn mi kan sori fa a santa kibritori kon na krin. Na ini a ten di pasa Gado di meki ala sani, no tyari a santa kibritori disi kon na krin.
10 Disi pasa so taki Gado ben o gebroiki a gemeente now fu meki den tirimakti nanga den makti na hemel sabi fa a e sori a koni fu en na furu difrenti fasi.
11 Ala den sani disi a du soleki fa a ben abi na prakseri ala ten kaba èn den abi fu du nanga wi Masra Yesus Krestes.
12 Wi kan de seiker taki nanga yepi fu en wi man taki sondro frede èn wi man go na Gado o ten wi wani, fu di wi e bribi na ini Krestes.
13 Fu dati ede mi e aksi unu fu no lasi-ati te mi e kisi banawtu, bika dati o meki unu kisi wini nanga glori.
14 Na fu dati ede mi e saka kindi gi a Tata
15 di gi ibri famiri na hemel èn na grontapu a nen fu den.
16 Mi e begi taki Gado, a sma di abi bigi glori, o gebroiki a krakti fu en yeye fu tranga un ati.
17 Mi e begi en tu taki a bribi fu unu musu meki taki Krestes èn a lobi di unu musu abi gi makandra, de na ini un ati. Mi e aksi en tu fu meki unu tanapu steifi na tapu a fondamenti, neleki fa rutu e meki wan bon tanapu steifi.
18 Na so unu nanga ala den santawan o man frustan finifini san na a bradi nanga a langa nanga a hei nanga a dipi fu den sani di abi fu du nanga Gado.
19 Boiti dati, unu o kon sabi a lobi fu Krestes di bigi moro sabi. Dan Gado kan gi unu ala den fasi fu en.
20 We, fu di Gado na a sma di e meki a krakti fu en wroko na ini wi, meki a kan du moro leki iniwan sani di wi e aksi noso prakseri.
21 Na en musu kisi glori nanga yepi fu a gemeente èn nanga yepi fu Krestes Yesus fu têgo, iya, fu ala ten. Amen.
