Danièl 9:1-27
9 A ben de a fosi yari di Darius ben e tiri. Darius ben de a manpkin fu Ahasferos, wan Mediasma. Den ben poti en leki kownu fu a kownukondre fu den Kaldeyasma.
2 Na ini a fosi yari di a ben e tiri leki kownu, mi, Danièl, go ondrosuku den buku.* Ne mi si omeni yari Yerusalem ben o tan wan brokopresi. Yehovah ben taigi a profeiti Yeremia taki Yerusalem ben o tan so 70 yari langa.
3 Ne mi begi Yehovah, a tru Gado, fayafaya èn mi ben faste.* Boiti dati, mi weri krosi di sma gwenti weri te den e sari èn mi trowe asisi na tapu mi skin.
4 Mi begi Yehovah mi Gado èn mi taigi en sortu sondu wi du. Mi taki:
„Tye Yehovah, yu na a tru Gado, yu na wan Gado di bigi srefsrefi èn sma abi bigi lespeki gi yu. Yu e hori yusrefi na a ferbontu di yu meki èn yu e sori bun-ati* gi den sma di lobi yu èn di e hori densrefi na den wet fu yu.
5 Wi sondu èn wi no du san bun. Na soso ogri wi du èn wi trangayesi yu. Wi no hori wisrefi na den wet nanga den besroiti fu yu.
6 Wi no arki den profeiti, den futuboi fu yu. Na ini yu nen den ben taki nanga den kownu, den granman, nanga den afo fu wi èn nanga a heri pipel fu a kondre fu wi.
7 Yehovah, yu na wan Gado di e du san reti. Ma wi fu wi sei, na soso syen wi e firi tide. Den sma fu Yuda nanga den sma di e libi na Yerusalem, iya, heri Israel e firi syen. Yu ben yagi den go na kondre di de krosbei noso farawe fu di den no du san yu taki.
8 Tye Yehovah, na soso syen wi e syen. Den kownu, den granman nanga den afo fu wi e syen tu fu di wi sondu teige yu.
9 Yehovah wi Gado, yu na wan Gado di abi sar’ati èn yu e gi sma pardon, ma wi opo wisrefi teige yu.
10 Yehovah wi Gado, yu ben taigi den profeiti, den futuboi fu yu, fu gi wi den wet fu yu. Ma wi trangayesi den èn wi no du san yu taki.
11 Ala sma na ini Israel trangayesi yu Wet. Den no du san yu taigi den fu du. Na so den gwe libi yu. Dati meki yu fluku wi, soleki fa yu ben sweri fu du na ini a Wet di yu ben gi yu futuboi Moses. Iya, wi sondu teige yu.
12 Fu dati ede, soleki fa yu ben taki, yu meki bigi ogri miti wi nanga den tiriman di ben e tiri wi.* A sani di psa nanga Yerusalem noiti no psa ete na wan tra presi na grontapu.
13 Iya, ala den ogri disi di miti wi, skrifi na ini a Wet di yu ben gi Moses. Yehovah wi Gado, tòg wi no du muiti fu meki yu prisiri nanga wi baka,* ma wi tan du sondu èn wi no ben wani poti prakseri na den tru leri fu yu.*
14 Ma Yehovah, yu ben sabi san ben e psa èn te fu kba yu meki ogri miti wi fu di yu, Yehovah wi Gado, e du ala ten san reti. Ma tòg wi no du san yu taki.
15 We Yehovah wi Gado, nanga yu bigi krakti yu puru yu pipel na ini a kondre Egepte. Yu meki ala sma kon sabi a nen fu yu te na a dei fu tide. Wi sondu èn wi du soso ogri.
16 Yehovah, yu na wan Gado di e du san reti ala ten. Sobun, mi e begi yu, no meki yu ati bron moro nanga yu foto Yerusalem di de a santa bergi fu yu, bika na den sondu fu wi nanga den fowtu fu wi afo, meki taki ala sma na wi lontu e teki Yerusalem nanga a pipel fu yu leki spotpopki.
17 Yu na wi Gado, arki a begi fu yu futuboi, iya, arki den fayafaya begi fu mi. Yehovah, du bun gi yu santa presi di kon de wan brokopresi, so taki yu nen kisi glori.
18 Mi Gado, mi e begi yu, poti yesi arki mi! Opo yu ai èn luku fa a foto di ben e tyari yu nen fosi, kon tan. A no fu di wi e du san reti, meki wi e begi yu fayafaya, ma na fu di yu na wan Gado di abi furu sar’ati.
19 Yehovah, mi e begi yu, arki mi. Yehovah, mi e begi yu, gi wi pardon. Yehovah, grantangi, poti prakseri na wi èn du wan sani! Mi Gado, mi e begi yu, fu yu nen ede, no draidrai, fu di a foto fu yu nanga a pipel fu yu e tyari yu nen.”
20 Na so mi ben e taki èn mi ben e begi, iya, mi ben e taki krin sortu sondu mi nanga mi pipel Israel du. Mi ben e begi Yehovah mi Gado fu du bun gi a santa bergi fu en.
21 Mi ben e begi ete di a man Gabrièl kon na mi. Na a man disi mi ben si na ini wan fu den fisyun di mi ben kisi. A ben de a ten fu a mofoneti-ofrandi èn mi ben weri srefsrefi.
22 Ne a meki mi kon ferstan sani moro krin. A taigi mi:
„Danièl, mi kon dya now fu yepi yu fu man si sani moro krin èn fu meki yu kon ferstan sani moro bun.
23 Di yu bigin begi Gado fayafaya, a seni mi kon fu ferteri yu san na a piki tapu a begi fu yu. Mi kon fu di Gado lobi yu srefsrefi.* Sobun, poti prakseri na den sani di mi o ferteri yu èn pruberi fu ferstan a fisyun.
24 Gado poti 70 wiki* gi yu pipel èn gi a santa foto fu yu. Na a pisi ten dati, ogri nanga sondu o kon na wan kba. A o de a ten fu meki sma kisi pardon fu den sondu èn fu tyari retidu kon fu têgo. Na a pisi ten dati, wan stampu o poti na tapu den fisyun èn na tapu den profeititori* fu sori sma taki den tru. Boiti dati, Gado o salfu a Moro Santa Presi na a ten dati.
25 Yu musu sabi èn yu musu ferstan taki baka te den taki dati sma musu meki Yerusalem kon bun baka èn taki den musu bow en baka, 7 wiki nanga 62 wiki o psa, fosi a Mesias,* a Fesiman, doro. A foto disi o kon bun baka èn sma o bow en baka. A o abi wan pren* nanga wan kanaal. Ma te den o bow a foto baka, a o de wan tranga ten.
26 Baka den 62 wiki den o kiri a Mesias èn a no o abi noti gi ensrefi.
Wan tiriman o kon èn a legre fu en o pori a foto nanga a santa presi. A o de leki wan frudu pori a santa presi. Te na a kba feti o de. A besroiti teki kba taki sani o kisi pori.
27 A Mesias o meki a ferbontu tan ete wán wiki gi furu sma. Ma te afu fu a wiki disi psa, a no o gi sma pasi moro fu tyari srakti-ofrandi nanga tra ofrandi.
Na tapu den frei fu sani di no krin, a sma o kon di e tyari pori kon. Solanga a pisi ten no psa fu tyari pori kon, a sani di kon de wan brokopresi o tan so, fu di dati na a besroiti di teki.”
Futuwortu
^ Dati na den santa buku.
^ Hebrewtongo: „krutuman di ben e koti krutu gi wi”.
^ Noso: „fu safu yu fesi”.
^ Noso: „poti prakseri na yu, wan Gado di e taki ala ten san tru”.
^ Noso: „abi furu lespeki gi yu”.
^ Dyaso wán wiki na 7 yari. Sobun, 70 wiki na 490 yari.
^ Hebrewtongo: „profeiti”.
^ Noso: „a Salfuwan”.
