A di fu tu brifi gi den Tesalonikasma 2:1-17
2 Ma brada, wi wani aksi unu wan sani di abi fu du nanga a ten te wi Masra Yesus Krestes o kon èn te a o tyari wi kon makandra fu de nanga en:
2 Kon meki wi taki dati unu yere taki a dei fu Yehovah doro kaba fu di unu yere wan boskopu di gersi leki a kon fu Gado noso fu di sma fruteri unu taki a dei disi doro. Noso kande sma e seni wan brifi kon gi unu di e taki fu a srefi tori disi èn den e du leki na wi skrifi a brifi. No meki sma bruya un denki so esi nanga den tori disi èn no lasi unsrefi.
3 No meki nowan sma kori unu na nowan fasi, bika a dei dati no o kon solanga sma no drai baka gi a bribi èn solanga a no kon na krin suma na a sma di e du kruktudu, a sma di o kisi pori.
4 A e gens Gado èn a e si ensrefi moro hei leki ala den wan di sma e kari „gado”, noso di sma e anbegi. Na so a go sidon na ini a tempel fu Gado èn a fruklari taki ensrefi na wan gado.
5 Unu no e memre taki di mi ben de nanga unu ete, mi ben e taigi unu den sani disi?
6 Now unu sabi san e gens a sma di e du kruktudu, so taki na en eigi reti ten a o kon na krin suma na en.
7 A tru taki a sma dati bigin du a kruktudu disi kaba. A kruktudu fu en o tan wan kibritori teleki a sma di e gens en nownowde, no de moro.
8 Dan a o kon na krin suma na a sma di e du kruktudu. Masra Yesus o puru en na pasi nanga a krakti fu den sani di a e taki.* Te a kon de krin fu si taki Masra kon, a o meki a sma disi kon tron noti.
9 Ma a sma di e du kruktudu de ete, fu di Satan e horibaka gi en. A sma dati e du ala sortu kefalek sani èn a e sori sma bigi sani nanga wondru fu kori den.
10 Na ala sortu ogri fasi a e bedrigi den sma di e dede gowe. Na so a e strafu den, fu di den no ben angri fu kon sabi san na den tru tori di ben kan frulusu den.
11 Fu dati ede Gado e gi pasi meki trawan bedrigi den, so taki den kan bribi lei.
12 Na so fasi a kan krutu den alamala, bika den no ben bribi den tru tori di den ben yere. Na presi fu dati den ben e prisiri nanga ogridu.
13 Ma wi musu taki Gado tangi gi unu ala ten, mi brada di Yehovah lobi, bika sensi a bigin Gado teki unu fu frulusu unu te fu kaba. Disi a du di a gebroiki en yeye fu meki unu kon santa èn di unu ben bribi den tru tori di unu yere.
14 A kari unu fu di wi ben preiki a bun nyunsu gi unu, so taki unu kan kisi glori tu neleki wi Masra Yesus Krestes.
15 We dan, mi brada, tanapu kánkan èn tan hori den sani di unu ben leri, awansi unu ben leri den di wi ben taki nanga unu, noso di wi ben seni wan brifi kon gi unu.
16 Wi Masra Yesus Krestes srefi nanga Gado wi Tata, ben lobi wi èn den gi wi trowstu fu ala ten. Den e meki taki wi kon abi wan moi howpu tu fu di den sori wi bun-ati.
17 Sobun, meki den trowstu unu. Meki den gi unu deki-ati, so taki ala ten unu e du èn e taki san bun.
Futuwortu
^ Grikitongo: „nanga a yeye fu en mofo.”
