A fosi buku fu den Kownu 14:1-31
14 Na a ten dati Abia, a manpikin fu Yerobeyam, kon siki.
2 Sobun, Yerobeyam taigi en wefi: „Opo, weri krosi na so wan fasi taki nowan sma man sabi taki yu na mi wefi. Go na Silo, pe a profeiti Ahia de. Na en ben taigi mi taki mi ben o tron kownu fu a pipel disi.
3 Teki tin brede, wan tu kuku, nanga wan batra oni, èn go na en. Na en o taigi yu san o pasa nanga a boi.”
4 Ne a wefi fu Yerobeyam du san en masra taigi en. A go na a oso fu Ahia na Silo. Ma Ahia no ben man si bun, fu di a ben kon owru kaba.
5 Disiten Yehovah ben taigi Ahia: „Luku, a wefi fu Yerobeyam o kon aksi yu san o pasa nanga a manpikin fu en, fu di a siki. Na so-so-so yu musu taigi na uma. Te a o kon dyaso, yu o si taki a weri krosi na so wan fasi taki yu no man sabi taki na en.”
6 Di Ahia yere na uma e waka kon na a doro, a taki: „Wefi fu Yerobeyam, kon na inisei. Fu san ede yu weri krosi na so wan fasi, taki sma no man sabi taki na yu? Na soso takru nyunsu mi abi gi yu.
7 Go taigi Yerobeyam: ’Disi na san Yehovah, a Gado fu Israel, taki: „Na mi puru yu na mindri a pipel fu yu fu tiri mi pipel Israel.
8 Mi puru* a kownukondre na a anu fu den bakapikin fu David èn mi gi en na yu. Toku yu no du leki mi futuboi David di ben hori den komando fu mi, èn di ben gi yesi na mi nanga en heri ati, fu di a du ala san mi feni bun.
9 Ma yu du moro ogri sani leki den sma di ben e tiri a kondre fosi yu. Fu meki mi ati bron, yu meki wan tra gado gi yusrefi èn yu meki popki, dan yu drai baka gi mi.
10 Dati meki mi o meki ogri miti den bakapikin fu yu, Yerobeyam. Mi o kiri ibri mansma na ini yu famiri, iya, ibri wisiwasi man na ini Israel. Neleki fa wan sma e krin pupe puru na wan presi teleki noti no de moro, na so mi o puru a famiri fu yu na pasi, teleki nowan fu den tan abra.
11 Efu wan sma na ini a famiri fu yu dede na ini a foto, dan den dagu o nyan en. Efu wan fu den dede dorosei fu a foto, dan den fowru di e frei na loktu o nyan en, bika na dati Yehovah taki.”’
12 We, opo go na yu oso. Te yu doro a foto, a pikin fu yu o dede.
13 Ala sma na ini Israel o row gi en, èn den o beri en. Boiti a pikin disi, nowan bakapikin fu Yerobeyam o beri na wan beripe. Na a pikin disi wawan den o beri, fu di Yehovah, a Gado fu Israel, si wan bun sani na ini en.
14 Yehovah o poti wan Kownu di o tiri Israel, èn na wan dei di Gado feni bun, a Kownu disi o kiri den bakapikin fu Yerobeyam. Iya, efu a wani, a kan du disi nownow kaba.
15 Neleki fa winti e wai so tranga, taki a e broko warimbo di e gro na ini watra, na so Yehovah o broko Israel. A o puru Israel na ini a bun kondre disi di a gi den afo fu den. Yehovah o panya den go te na abrasei fu Gran Liba, fu di en ati kon bron di den meki den santa postu fu den.
16 Gado no o luku Israel moro, fu di Yerobeyam du ala den sondu disi di meki taki Israel go du sondu tu.”
17 Ne a wefi fu Yerobeyam drai go baka na Tirsa. Di a ben de na a mofodoro fu en oso, a boi dede.
18 Dan den beri a boi, èn ala sma na ini Israel ben e row gi en, soleki fa Yehovah ben taigi en futuboi Ahia, a profeiti.
19 Ala tra sani di abi fu du nanga Yerobeyam, fa a feti, èn fa a tiri a kondre, skrifi na ini a buku di e taki fu den tori fu den kownu fu Israel.
20 Ala nanga ala Yerobeyam tiri leki kownu tutenti na tu yari langa. Baka dati a dede. Dan en manpikin Nadab bigin tiri leki kownu.
21 Now Rehabeyam, a manpikin fu Salomo, tron kownu fu Yuda. Rehabeyam ben abi fotenti na wán yari di a bigin tiri èn na tinaseibi yari langa a tiri na ini Yerusalem. Na a foto disi Yehovah ben teki na mindri ala den tra foto fu den lo fu Israel, fu di a ben musu tyari en nen. A mama fu Rehabeyam ben de Nama, wan Amon uma.
22 Disiten den sma fu Yuda tan du sani di Yehovah no feni bun. Fu di den trangayesi en, meki a kon dyarusu. Den sondu di den du, ben moro ogri leki den sondu fu den afo fu den.
23 Na tapu ibri pikin bergi èn na ondro ibri bigi bon di abi furu wiwiri, den bow hei presi. Boiti dati, den meki santa pilari nanga santa postu.
24 Man ben de srefi na ini a kondre di ben teki en leki wroko fu abi seks nanga trawan na ini a tempel. Den du ala sortu tegu sani, neleki den trakondre sma. Na den sma disi Yehovah ben yagi komoto na ini a kondre, so taki den Israelsma ben kan go libi drape.
25 Na ini a di fu feifi yari di Rehabeyam ben de kownu, dan Kownu Sisak fu Egepte kon feti nanga Yerusalem.
26 A teki den gudu fu na oso fu Yehovah nanga den gudu fu na oso fu Kownu. Iya, a teki ala den sani dati. Boiti dati, a teki ala den gowtu skelt di Salomo ben meki.
27 Dati meki Kownu Rehabeyam meki tra skelt di ben de fu kopro. Dan a gi den na den edeman fu den srudati di ben musu lon na fesi na asiwagi fu en. Den sma disi ben e hori wakti na a doro fu Kownu oso.
28 Ibri leisi te Kownu ben e go na a oso fu Yehovah, den srudati di ben musu lon na fesi na asiwagi fu en, ben e waka nanga den skelt disi. Baka dati den ben e tyari den go poti baka na a kamra fu den waktiman.
29 Ala tra sani di abi fu du nanga Rehabeyam èn ala sani di a du, skrifi na ini a buku di e taki fu den tori fu den kownu fu Yuda.
30 Rehabeyam nanga Yerobeyam ben e feti ala ten.
31 Te fu kaba Rehabeyam go rostu neleki den afo fu en èn den beri en na a beripe fu den afo fu en na ini a Foto fu David. Rehabeyam mama ben nen Nama èn a ben de wan Amon uma. Dan Abiam, a manpikin fu Rehabeyam, bigin tiri leki kownu.
