Në raste nevoje Dëshmitarët e Jehovait ndihmojnë bashkëbesimtarët e të tjerët. E bëjnë këtë të nxitur nga dashuria, e cila është shenjë dalluese e të krishterëve të vërtetë.​—Gjoni 13:35.

Më poshtë jepet një listë e pjesshme e ndihmës që është dhënë gjatë një periudhe 12-mujore, që përfundoi nga mesi i vitit 2012. Në listë nuk përmenden ndihma emocionale dhe forcimi i besimit që shoqërojnë gjithmonë përpjekjet tona.

Një pjesë të mirë të ndihmës e organizuan Komitetet e Ndihmës në Rast Katastrofash, të krijuara nga zyrat e degëve të Dëshmitarëve. Gjithashtu, edhe kongregacionet vendëse dhanë vazhdimisht ndihmë.

Japoni: Më 11 mars të vitit 2011, një tërmet e më pas një tsunami goditën Japoninë Veriore, dhe kjo ndikoi te qindra mijë veta. Dëshmitarët e Jehovait anekënd botës ofruan pa u kursyer paratë, aftësitë dhe gjëra të tjera për të ndihmuar.

Brazil: Përmbytje, rrëshqitje dheu e balte sollën vdekjen e qindra njerëzve. Menjëherë, Dëshmitarët e Jehovait dërguan atje 42 tonë ushqim të konservuar, 20.000 shishe ujë, 10 tonë rroba, 5 tonë produkte higjienike, si edhe ilaçe e gjëra të tjera.

Kongo (Brazavil): Kur shpërtheu një depo armësh, u shkatërruan 4 shtëpi të Dëshmitarëve të Jehovait dhe 28 shtëpi të tjera Dëshmitarësh u dëmtuan. Viktimave iu dhanë ushqim e rroba, dhe Dëshmitarët vendës strehuan familje që u prekën nga katastrofa.

Kongo (Kinshasë): Të sëmurëve nga kolera iu dhanë ilaçe. Viktimave të përmbytjes së shkaktuar nga shirat e rrëmbyeshëm iu dhuruan veshje. Kurse atyre në kampet e refugjatëve iu dhanë ndihmë mjekësore, fara për kultivim dhe veshje me shumicë.

Venezuelë: Rrebeshet sollën përmbytje e rrëshqitje dheu. Komitetet e Ndihmës në Rast Katastrofash ndihmuan 288 Dëshmitarë të prekur. U ndërtuan më tepër se 50 shtëpi të reja. Përveç kësaj, komitetet e ndihmës po ndihmojnë ata, shtëpitë e të cilëve rrezikojnë nga niveli gjithnjë në rritje i liqenit Valencia.

Filipine: Tajfunet sollën përmbytje në një pjesë të vendit. Dega u dërgoi ushqime e veshje viktimave dhe Dëshmitarët atje ndihmuan me pastrimin, pasi ra niveli i ujit.

Kanada: Pas një zjarri të madh në pyjet e Albertës, kongregacioni Slave Lake mori goxha kontribute nga Dëshmitarët e asaj zone për të ndihmuar me pastrimin. Ngaqë nuk nevojiteshin të gjitha paratë, kongregacioni ua dhuroi më tepër se gjysmën e shumës viktimave të katastrofave në pjesë të tjera të botës.

Bregu i Fildishtë: Të mira materiale, strehim e kujdes mjekësor iu dhanë nevojtarëve para, gjatë dhe pas një lufte në vend.

Fixhi: Për shkak të përmbytjeve nga shirat e rëndë, shumica e 192 familjeve të Dëshmitarëve që u prekën, humbën fermat, burimin e ushqimit e të të ardhurave. Atyre iu dhanë ndihma në ushqime.

Ganë: Viktimave të përmbytjes në lindje të vendit iu dhanë ushqime, fara dhe strehim.

Shtetet e Bashkuara: Tornadot dëmtuan 66 shtëpi të Dëshmitarëve në tri shtete dhe shkatërruan 12 shtëpi të tyre. Edhe pse shumica e pronarëve kishin siguracion, prapëseprapë u siguruan fonde për të ndihmuar.

Argjentinë: Kongregacione të Dëshmitarëve të Jehovait ndihmuan ata në jug të vendit, shtëpitë e të cilëve u dëmtuan nga hiri vullkanik.

Mozambik: Iu sigurua ushqim më shumë se 1.000 njerëzve të prekur nga thatësira.

Nigeri: Ndihmë financiare iu dha 24 Dëshmitarëve të plagosur nga një aksident i rëndë me autobus. Gjithashtu u ndihmuan shumë veta në veri të vendit, të cilët mbetën pa shtëpi për shkak të konflikteve fetare etnike.

Benin: Ilaçe, veshje, rrjeta mushkonjash, ujë i pijshëm dhe strehim iu siguruan viktimave të përmbytjeve të rënda.

Republika Domenikane: Pas uraganit Irena, kongregacionet vendëse ndihmuan për riparimin e shtëpive dhe dhanë ndihma materiale.

Etiopi: Në dy zona me thatësirë dhe në një zonë të përmbytur u dhanë fonde për të plotësuar nevojat e të prekurve.

Kenia: U dhanë fonde për të ndihmuar të prekurit e thatësirës.

Malavi: Iu dha ndihmë atyre që jetojnë në kampin e refugjatëve në Dzaleka.

Nepal: Një rrëshqitje dheu dëmtoi shtëpinë e një Dëshmitareje. Asaj iu sigurua shtëpi e përkohshme dhe ndihmë nga kongregacioni atje.

Papua Guineja e Re: Zjarrvënësit dogjën tetë shtëpi Dëshmitarësh. U morën masa që të rindërtoheshin.

Rumani: Disa Dëshmitarë humbën shtëpitë si pasojë e përmbytjes. U sigurua ndihmë për rindërtimin e tyre.

Mali: Senegali fqinj dha fonde për ata që nuk kishin ushqim nga të korrat jo të mbara për shkak të thatësirës.

Sierra-Leone: Mjekët Dëshmitarë nga Franca u dhanë ndihmë mjekësore Dëshmitarëve të Jehovait në zonat që më parë ishin rrënuar nga lufta.

Tajlandë: Përmbytje katastrofike sollën mjaft dëme në disa provinca. Skuadra ndihmash riparuan dhe pastruan 100 shtëpi e 6 Salla Mbretërie.

Republika Çeke: Pasi përmbytjet dëmtuan disa shtëpi në Republikën Çeke, Dëshmitarët në Sllovakinë fqinje dhanë ndihmën e tyre.

Sri-Lankë: Përfundoi shumica e punës për dhënien e ndihmës pas një tsunami.

Sudan: Ushqim, veshje, këpucë dhe çarçafë plastikë iu dërguan Dëshmitarëve të Jehovait që ngelën të pastrehë për shkak të luftimeve në vend.

Tanzani: Gjatë një përmbytjeje të rëndë, 14 familje humbën zotërimet. Kongregacionet e zonës dhuruan veshje dhe pajisje shtëpiake. U rindërtua një shtëpi.

Zimbabve: Thatësira solli uri në një pjesë të vendit. Të prekurve iu dhanë ushqim e para.

Burundi: Refugjatëve po u jepet ndihmë, përfshirë kujdesin mjekësor.