JEHOVAI e krahason vazhdimisht veten me një bari të tillë. Në Fjalën e tij, na siguron: «Do t’i kërkoj vetë delet e mia dhe do të kujdesem për to.»​—Ezekieli 34:11, 12.

Cilët janë delet e Jehovait? E thënë thjesht, janë njerëzit që e duan dhe e adhurojnë. Bibla thotë: «Ejani ta adhurojmë e të përkulemi para tij! Le të biem në gjunjë para Jehovait, Bërësit tonë! Se ai është Perëndia ynë, kurse ne jemi populli i kullotës së tij, delet që u prin me dorën e vet.» (Psalmi 95:6, 7) Ashtu si delet ndjekin bariun, edhe adhuruesit e Jehovait janë të gatshëm të ndjekin Bariun e tyre. A janë të patëmetë? Jo. Shërbëtorët e Jehovait ndonjëherë bëhen si ‘dele të shpërndara’, si ‘dele të humbura’ dhe ‘si dele që po humbin rrugën’. (Ezekieli 34:12; Mateu 15:24; 1 Pjetrit 2:25) Gjithsesi, kur  dikë e merr rryma, Jehovai nuk e braktis sikur të mos kishte më shpresë.

A mendon se Jehovai është ende Bariu yt? Si e tregon sot Jehovai se është Bari? Shqyrto tri mënyra.

Na ushqen frymësisht. «Do t’i kullot në kullota të mira,​—thotë Jehovai.—​Atje do të pushojnë në një vathë të mirë dhe do të kullotin në kullotat e majme.» (Ezekieli 34:14) Jehovai gjithmonë na ka dhënë lloj-lloj ushqimesh në kohën e duhur që na përtërijnë. A të kujtohet ndonjë artikull, ndonjë fjalim ose ndonjë video që iu përgjigj lutjes sate për ndihmë? A nuk të bindi se Jehovai kujdeset për ty?

Na mbron dhe na mbështet. Jehovai premton: «Do të kthej të larguarën, do ta fashoj të vrarën dhe do t’i jap forcë të sëmurës.» (Ezekieli 34:16) Jehovai u jep forcë atyre që janë ‘të sëmurë’ ose që i ka mbytur ankthi. Ai i fashon delet e tij, duke i ndihmuar të shërohen nëse janë lënduar, qoftë edhe nga bashkëbesimtarët. Gjithashtu, ai i kthen ata që janë larguar dhe që ndoshta po luftojnë me ndjenjat negative.

Ndihet përgjegjës për ne. «Unë do të kujdesem për delet e mia. . . . Do t’i mbledh në një ditë me re dhe terr të zi nga të gjitha vendet ku janë shpërndarë,​—thotë Jehovai.—​Do ta kërkoj të humburën.» (Ezekieli 34:12, 16) Për Jehovain, një dele e humbur nuk është një rast i pashpresë. Ai e di kur humb një dele, e kërkon atë dhe gëzohet kur e gjen. (Mateu 18:12-14) Në fakt, Jehovai i quan adhuruesit e vërtetë «delet e kullotës sime». (Ezekieli 34:31) Ti je një nga ato dele.

Pse Jehovai po të kërkon dhe po të fton të kthehesh tek ai? Sepse do që ti të jesh i lumtur. Ai premton se do t’i bekojë delet e tij. (Ezekieli 34:26) Ky nuk është një premtim bosh. Tashmë e ke provuar vetë këtë.

Kujto përvojat që ke pasur kur njohe Jehovain. Për shembull, si u ndjeve kur mësove për herë të parë të vërtetat emocionuese për emrin e Perëndisë dhe qëllimin e tij për njerëzimin? A të kujtohet sa përtëriheshe kur ishe bashkë me të krishterët e tjerë në asamble dhe kongrese? Kur i flitje për lajmin e mirë dikujt që tregonte interes të sinqertë, a nuk ktheheshe në shtëpi i lumtur dhe shend e verë?

Mund ta provosh sërish këtë gëzim. Shërbëtorët e Perëndisë në kohët e lashta u lutën: «Na kthe pranë teje, o Jehova, dhe ne do të kthehemi me gatishmëri. Sillna ditë të reja si kohë më parë.» (Vajtimet 5:21) Jehovai iu përgjigj kësaj lutjeje dhe populli i tij u kthye që t’i shërbente me gëzim të përtërirë. (Nehemia 8:17) Jehovai do të bëjë të njëjtën gjë edhe për ty.

Por, të kthehesh te Jehovai është më e lehtë të thuhet se të bëhet. Shqyrto se cilat janë disa vështirësi dhe si mund t’i kapërcesh.