Mo Ē Pele e Alolofa iā Ieova:

I le 1971, na matuā olioli ai ē na auai i le Fonotaga Itumalo “Le Suafa o le Atua” i le gagana Peretania, ina ua latou maua ni lomiga fou. Na faamatalaina na lomiga “o se faamanuiaga e leʻi faatalitalia.” Na faapea mai se uso e tusa ai ma se tasi o na lomiga fou: “O se tusi e sili ona mataʻina o mea matagofie o loo fotuaʻi mai!” Na faatatau atu lana faamatalaga i le tusi “The Nations Shall Know That I Am Jehovah”—How? Aiseā na matuā olioli ai le ʻauusufono i lenei lomiga fou? Talu ai na iai ni faamalamalamaga fou o valoaga i le tusi o le Tusi Paia o Esekielu, lea e aafia ai le lumanaʻi o tagata uma lava.

Talu mai le tausaga na tatala ai le tusi ʻKnow Jehovah,’ ua matuā faatupulaʻia le faitau aofaʻi o tagata o le Atua mai i le 1.5 miliona i le silia i le 8 miliona. (Isa. 60:22) E silia i le 1,000 gagana e tautatala ai le faitau miliona o nei auauna a Ieova. (Saka. 8:23) E leʻi suʻesuʻeina e le toʻatele o i latou se tusi o loo faamalamalama auʻiliʻili mai ai valoaga na faamauina e le perofeta o Esekielu.

E faaopoopo atu i lenā, talu mai le 1971, e tele upu moni o le Tusi Paia ua tatou aʻoaʻoina a o tupu pea le malamalama. (Faata. 4:18) I le 1985, na tatou malamalama lelei ai e taʻuamiotonuina “isi mamoe” o ni uō a le Atua. (Ioa. 10:16; Roma 5:18; Iako. 2:23) Na faatoʻā tatou malamalama foʻi i le 1995, e faia le faamasinoga faaiʻu o “mamoe” ma “ʻoti” a o faagasolo “le puapuaga tele” i le lumanaʻi. (Mata. 24:21; 25:31, 32) O lea, ua telē se aafiaga o lo tatou malamalamaga i le tusi o Esekielu ona o na suiga.

O loo faaauau pea ona tupu lo tatou malamalamaga. Seʻi manatu i lesona ua tatou aʻoaʻoina mai i talafaatusa a Iesu. Ua manino le tele o na lesona i o tatou mafaufau ma loto. O nisi o na talafaatusa e faasino atu i mea o le a tutupu a o faagasolo le puapuaga tele lea ua lata tele mai. Ua suia foʻi lo tatou malamalamaga i nisi o valoaga o le tusi o Esekielu. E aofia i nisi o na suiga valoaga e faatatau iā Koku mai i Makoku (mataupu 38 ma le 39), le galuega a le tamāloa o loo iai le fagu vaitusi a le failautusi (mataupu 9), ma le vanu o loo iai ivi mamago ma le tuufaatasia faafaatusa o laau e lua (mataupu 37). O nei suiga ua toe fetuunaʻi ai lo tatou malamalamaga i mea na tusia i tausaga ua teʻa i le tusi ʻKnow Jehovah.’

E lētioa tuufesili le toʻatele o auauna a Ieova, “O afea o le a tatou maua ai se tusi o loo iai faamalamalamaga fou o valoaga a Esekielu?” E tali lenā fesili i lenei tusi Toe Faafoʻisia le Tapuaʻiga Mamā iā Ieova! A o e faitau i mataupu e 22 o loo i lenei tusi ma manatunatu loloto i ata matagofie o loo iai, o le a e maofa ai i le tele o saʻiliʻiliga na alu i le sauniaina o lenei lomiga. Na matou manatunatu loloto ma tatalo faatauanau, ina ia malamalama ai i le māfuaaga na saunia ai e Ieova lenei tusi mataʻina o le Tusi Paia o Esekielu. Na matou mafaufau loloto i fesili nei: O ā ni lesona o loo iai i le tusi o Esekielu mo ē na ola i aso o Esekielu, faapea ma i tatou i aso nei? O ā ni valoaga e faailoa mai ai mea e faatoʻā faataunuuina i le lumanaʻi? Pe e tatau ona tatou taumafai e saʻili ni faaataga ma ni faataunuuga o vala uma o valoaga a Esekielu? O tali o nei fesili ua saunia ai ni malamalamaaga sili ona manino o lenei tusi tāua o le Tusi Paia.

 A o outou faitau i le tusi atoa o Esekielu, e lē taumatea o le a outou matuā maofa i le vaega faalelagi o le faalapotopotoga a Ieova. E mautinoa foʻi o le a outou matuā maofa i le maualuluga o tapulaa a Ieova, mo ana foafoaga i le lagi ma le lalolagi e mananaʻo e tapuaʻi ma le faamaoni iā te ia. O le a atiaʻe e le tusi Tapuaʻiga Mamā lo outou talisapaia o mea na faia e Ieova mo ona tagata, faapea mea o le a ia faia mo ona tagata i le lumanaʻi. O le a outou mātauina foʻi ni matua se lua e faaauau ona faamatilatila i lenei tusi. Muamua, ina ia tatou faafiafiaina le finagalo o Ieova, e manaʻomia ona tatou iloa ma amanaʻia o ia o le Pule Silisili Ese i le aoao o mea. Lua, e tatau ona tatou tapuaʻi iā Ieova i le auala e na te taliaina, ma usiusitaʻi i ana tapulaa maualuluga.

E matou te faamoemoe o le a fesoasoani lenei lomiga, e faamalosia ai lo outou faanaunauga e tapuaʻi iā Ieova i se auala e faamamalu ai lona suafa sili ma paia. Tau ina ia faalaeiauina ai foʻi outou ina ia tulimataʻia le taimi, o le a iloa ai e atunuu uma o ia lava o Ieova.—Eseki. 36:23; 38:23.

Tau ina ia matuā faamanuia e Ieova lo tatou Tamā alofa a outou taumafaiga, e malamalama i le tusi na ia faagaeeina le perofeta o Esekielu e tusia.