PE E te iloa o ai lena fafine ma na tamaloloa e toalua? O Maria le Makatala, o se uo a Iesu. Ma o tamaloloa o loo oofu papae o agelu. O le tamai potu lenei o loo tilotilo i ai Maria i totonu o le tuugamau lea na tuu atu i ai le tino o Iesu ina ua maliu. Ae ua leai nei se tino! O ai na aveina? Sei o tatou vaai i ai.

Ina ua uma le maliu o Iesu, ona fai atu lea o ositaulaga i a Pilato: ‘A o ola Iesu na ia faapea mai, o le a toe faatuina o ia pe a mavae aso e tolu. Ia e poloai atu e leoleoina le tuugamau. Ona le gaoia lea e ona soo lona tino ma faapea mai ua toe faatuina mai o ia!’ Ona fai atu lea o Pilato i le au ositaulaga e aauina atu ni fitafita e leoleo le tuugamau.

Ae i le taeao po o le aso lona tolu talu ona maliu Iesu, na sau faafuasei ai le agelu a Ieova. Na ia fulieseina le maa i le gutu o le tuugamau. Ua fefefe fitafita. Ona latou tilotilo ai lea i totonu, ua leai se tino! Ona o ai lea o isi fitafita i le aai ma taʻu atu i ositaulaga. Pe e te iloa le mea na faia e ositaulaga leaga? Na latou totogia fitafita ia pepelo. ‘Ia outou fai atu na o mai ona soo i le po, a o matou momoe, ma gaoi le tino,’ o le tala lea a ositaulaga i fitafita.

Ua asiasi atu ni isi uo fafine a Iesu i le tuugamau. Na latou tetei ina ua oo atu ua gaogao! Ona tutu faafuasei mai lea o agelu e toalua ma o la ofu pupula. ‘Aiseā ua tou saili ai mo Iesu i inei?’ o la la fesili lea. ‘Ua toe faatuina o ia. Faavave atu nei ma taʻu atu i ona soo.’ Na tamomoe nei fafine, ae na taofia i latou e se tamaloa i le ala! O ai ia? O Iesu! ‘O atu e taʻu atu i ou soo,’ o lana tala lea.

Ina ua taʻu atu e fafine i soo ua toe ola mai Iesu, ma na latou vaai iā te ia, na faigata ona talitonu i ai le au soo. Na tamomoe atu Peteru ma Ioane i le tuugamau e vaai i ai, ae na gaogao le tuugamau! Ina ua o ese Peteru ma Ioane, sa nofo pea Maria le Makatala. Ina ua ia tilotilo na iloa atu agelu e toalua.

Pe e te iloa le mea na tupu i le tino o Iesu? Ua faamou e le Atua. E lei toe faaolaina mai e le Atua Iesu i se tino faaletino. Na ia tuuina atu i a Iesu se tino fou faaleagaga, e pei o agelu. Ae ina ia faaalia atu i ona soo ua toe ola mai o ia, e mafai e Iesu ona faia se tino e mafai e tagata ona iloa, e pei ona o le a tatou aʻoaʻoina mulimuli ane ai.