INA ua o ese mai Peteru ma Ioane mai le tuugamau o Iesu, na tuua ai na o Maria. Ona tagi lea o ia. Ona ia autilo atu lea i totonu o le tuugamau, e pei ona i ai i le ata ua tea. O i ina na ia vaaia ai agelu e toalua! Ona la fesili lea iā te ia: ‘Aiseā ua e tagi ai?’

Ua tali atu Maria: ‘Ua latou aveeseina lou Alii, ma ou te le iloa po o fea ua latou tuuina ai.’ Ona liliu lea o Maria i tua ma ia vaaia ai se tamaloa. Ua fesili mai o ia: ‘O ai lena e te sueina?’

Ua manatu Maria o lenei tamaloa o se fai togalaau, ma atonu ua ia aveina le tino o Iesu. Ona ia fai atu ai lea: ‘Afai ua e aveina o ia, ia e taʻu mai po o fea ua e tuuina i ai o ia.’ O lenei tamaloa o Iesu. Ua i ai sona tino ua le iloa e Maria. Ae ina ua ia taʻua lona igoa, ona iloa ai lea e Maria o ia o Iesu. Ona ia momoe lea ma taʻu i le au soo: ‘Ua ou vaai i le Alii!’

Mulimuli ane i lena aso, a o savavali soo e toalua i le nuu o Emau, na faatasi atu i ai se tamaloa. Ua faanoanoa tele le au soo auā ua fasiotia Iesu. Ae a o latou savavali, na faamatala atu e lenei tamaloa le tele o mea mai le Tusi Paia na faafiafia ai laua. Ina ua latou malolo mo se mea ai, ona iloa ai lea e nei soo o lenei tamaloa o Iesu. Ona mou ai lea o Iesu, ona toe o faanatinati lea o nei soo i Ierusalema e taʻu atu i le au aposetolo e uiga iā te ia.

A o tutupu na mea, sa faaali atu foi Iesu i a Peteru. Na ofo isi ina ua latou faalogo i lenei mea. Ona o lea o nei soo e toalua i Ierusalema ma sue le au aposetolo. Sa la taʻuina atu i a i latou le faaali atu o Iesu i a i laua i le auala. Ma a o la faamatalaina lenei mea, pe e te iloa le mea ofoofogia na tupu? Vaai i le ata. Na faaali Iesu i totonu o le potu, e ui lava sa loka le faitotoa. Ua fiafia tele le au soo! Pe e le o se aso uiga ese lena aso? Pe e mafai ea ona e faitauina taimi na faaali atu ai Iesu i ona soo? Pe ua e faitauina taimi e lima?

E lei i ai le aposetolo o Toma ina ua faaali atu Iesu. Ona taʻu atu lea e le au soo iā te ia: ‘Ua matou vaai i le Alii!’ Ae na fai atu Toma, faatoa ia talitonu pe a vaai o ia i a Iesu. Ia, e tusa e valu aso mulimuli ane ai ua toe faatasi foi le au soo i se potu na tapunipuni, ma sa i ai Toma. Na faafuasei lava ona faaali atu Iesu i ina i le potu. Ma ua talitonu nei Toma.