INA ua latou o ese mai le potualuga, ona o ai lea o Iesu ma ona aposetolo i fafo i le togalaau i Ketesemane. E masani ona latou o i ina. Ua fai atu nei Iesu, ia latou mataala pea ma tatalo. Ona alu lea o ia mo sina mamao ese atu ma ifo i le eleele ma tatalo.

Ona toe foi lea o Iesu i le mea o i ai ona aposetolo. O le a sou manatu, o ā a latou mea o fai? Ua momoe! E faatolu ona fai i ai Iesu e mataala, ae o taimi uma lava e foi mai ai, ua momoe. ‘E faapefea ona tou momoe i se taimi faapenei?’ o upu ia a Iesu i le taimi mulimuli na ia toe foi mai ai. ‘Ua oo mai nei le itula e tuuina atu ai aʻu i oʻu fili.’

I le taimi lava lena, na faalogoina ai leo o le motu o tagata e toatele. Vaai! Ua o mai tagata ma pelu ma laau! Ma o loo umia mai ni moli ina ia faamalamalaina ai. Ina ua latalata atu i latou, ona laa mai lea o se tasi ma sau i a Iesu. Ua ia sogi atu iā te ia e pei ona e vaai atu i ai. O ia o Iuta le Sekara! Aiseā ua ia sogi ai i a Iesu?

Na fesili atu Iesu: ‘Iuta e te faalataina ea au i le sogi?’ Ioe, o le sogi o se faailoga. E faailoa ai i tagata o loo faatasi ma Iuta, o Iesu lea, o lē o loo latou mananao i ai. Ona pue ai lea o Iesu e ona fili. Ae e le faatagaina e Peteru i latou e aveina Iesu e aunoa ma se taua. Na sei lana pelu ma ta ai le tamaloa o i ona tafatafa. Na ela le ta i le ulu o le tamaloa ae tipiesea ai lona taliga. Ae na paʻi atu Iesu ma toe faamalolo lona taliga.

Ona fai atu lea o Iesu i a Peteru: ‘Ia toe sulu lau pelu i lona faamoega. Pe e te le manatu ea e mafai ona ou fai atu i loʻu Tamā mo ni afe o agelu e laveai i a te aʻu?’ Ioe, e mafai e ia! Ae na te lei faia, auā ua na iloa ua oo mai le taimi e pueina ai o ia e ona fili. Ona ia faataga lea o i latou e ave iā te ia. Sei o tatou vaai po o le a ua tupu nei i a Iesu.