UA SILI atu i le 10 tausaga talu ona mavae le aveina e Nepukanesa tagata Isaraelu e sili ona lelei le aʻoaʻoina i Papelonia. Ae vaai atu nei i le mea ua tupu! Ua susunuina i lalo Ierusalema. Ma o tagata Isaraelu e lei fasiotia ua avea i latou ma pagota i Papelonia.

Manatua, o le mea lena na lapataiina e perofeta a Ieova o le a tupu pe afai e le suia ala leaga o tagata. Ae sa le faalogo tagata Isaraelu i perofeta. Na faaauau pea ona latou tapuai i atua sese na i lo Ieova. O lea ua tatau ai ona faasalaina tagata. Ua tatou iloaina lenei mea auā ua taʻu mai e le perofeta a Ieova o Esekielu mea leaga na faia e Isaraelu.

Pe e te iloa o ai Esekielu? O ia o se tasi o tagata talavou na aveina e le Tupu o Nepukanesa i Papelonia e sili atu i le 10 tausaga a o lei oo le faaumatiaga tele i Ierusalema. O le taimi foi lava lena na aveina ai Tanielu ma ana uo e toatolu, o Sataraka, Mesako ma Apeteniko i Papelonia.

A o i ai pea Esekielu i Papelonia, ua faaalia atu i ai e Ieova lenei mea i se vavega. O loo i ai moni lava Esekielu i Papelonia, ae na faavaaia o ia e Ieova i mea leaga uma o loo faia i le malumalu. Ua faateia Esekielu i mea na ia vaaia.

‘Vaai atu i mea inosia o loo faia e tagata i ina i le malumalu,’ o le tuleiga lea a Ieova i a Esekielu. ‘Vaai atu i le puipui ua tumu i ata o gata ma isi mea ola. Ma sei vaai atu i a Isaraelu lena e tapuai atu i ai!’ Ua mafai e Esekielu ona iloa nei mea, ma na ia tusia i lalo mea o loo tutupu.

‘Pe e te iloa mea o loo faia faalilolilo e taʻitaʻi Isaraelu?’ o le fesili lea a Ieova i a Esekielu. Ioe, e mafai ona ia vaai atu i ai. E toa 70 tamaloloa o loo tapuai atu i atua sese. Ma o loo faapea ifo i latou: ‘E le o iloa mai i tatou e Ieova. Ua Ia tuua le nuu.’

Ona faaali atu lea e Ieova i a Esekielu isi fafine o loo i le faitotoa i matu o le malumalu. O loo tapuai atu i le atua sese o Tamusa. Ma sei vaai atu i na tamaloloa e i le ala tatala o le malumalu o Ieova! E tusa e 25 i latou. Ua iloa atu i latou e Esekielu o loo ifo ma tapuai atu i le la!

‘Ua le faaaloalo nei tagata i a te au,’ o afioga ia a Ieova. ‘Ua le gata ina latou fai mea leaga ae ua o mai foi i lou malumalu ma fai ai!’ Ona tulei lea o Ieova: ‘O le a latou faalogoina le malosi o lou ita. Ma o le a ou le faanoanoa pe a faaumatia i latou.’

E na o le tolu tausaga talu ona faaali atu e Ieova i a Esekielu nei mea a e fouvale loa Isaraelu i le Tupu o Nepukanesa. Ona ia alu atu loa lea e tau faasaga i a i latou. Ina ua mavae le tausaga ma le afa ona sao atu lea o Papelonia i le pa o Ierusalema ma susunu i lalo. O le toatele o tagata ua fasiotia po o le ave faapagota i Papelonia.

Aiseā na faataga ai e Ieova lenei faaumatiaga mataʻutia i a Isaraelu? Ioe, talu ai sa latou le faalogo i a Ieova ma le usiusitai i ana tulafono. Ua faaalia ai i lenei mea le taua ona tatou faia i taimi uma mea e fai mai ai Ieova.

I le taimi muamua e toaitiiti e na faatagaina e nonofo i le laueleele o Isaraelu. Na tuuina e le Tupu o Nepukanesa le Iutaia o Ketalia e pule ai. Peitai ua fasiotia Ketalia e ni isi Isaraelu. Ua fefefe nei tagata neʻi o mai Papelonia ma faaumatia i latou ona o lenei mea leaga. O lea sa latou faamalosia ai Ieremia e o faatasi ma i latou, ma latou sosola ai i Aikupito.

Ona tuufua ai lea o le laueleele o Isaraelu. Mo le 70 tausaga sa leai se tasi na nofo ai. Ua matuai gaogao lava. Ae na tauto Ieova na te toe faafoisia mai ona tagata i le laueleele pe a uma le 70 tausaga. Ma o ā mea o tutupu i tagata o le Atua i Papelonia le mea ua ave i ai i latou? Sei o tatou vaai.